१२ जिल्लाको मतपत्र छपाइ सकियो : आयोग

काठमाडौं : निर्वाचन आयोगले स्थानीय तह निर्वाचनको १२ जिल्लाका लागि मतपत्र छाप्ने काम सम्पन्न भएको जनाएको छ। चैत ६ बाट जनक शिक्षा सामग्री केन्द्रले रातदिन मतपत्र छाप्ने काम गरिरहेको आयोगले जनाएको छ।

‘बिहीबारसम्म १२ जिल्लाको मतपत्र छाप्ने काम सम्पन्न भएको छ,’ आयोग प्रवक्ता सूर्यप्रसाद शर्माले अन्नपूर्णसँग भने, ‘अन्य जिल्लाका लागि पनि मतपत्र छाप्ने काम रातदिन भइरहेको छ। अहिलेको स्थिती हेर्दा हामीले तोकेको समयभित्रै मतपत्र छाप्ने काम सम्पन्न गर्न सकिने अवस्था छ।’

आयोगले केही जिल्लामा दर्ता हुन छुटेका दललाई पुनः दर्ता गरेर चुनाव चिन्ह दिने निर्णय गरेको छ। डोल्पामा कांग्रेस,९ जिल्लामा राप्रपा र केही जिल्लामा राष्ट्रिय जनमोर्चा, संघीय समाजवादी पार्टीको दर्ता छुटेकाले उनीहरुले स्वतन्त्र हैसियतमा मात्र चुनाव लडने अवस्था थियो। तर दलहरुले आयोगमा निवेदन दिएपछि उनिहरुको पुनः दर्ता गरेर दलगत नै चुनाव चिन्ह दिइएको आयोग प्रवक्ता शर्माले जानकारी दिए।

यता आयोगले मतदान अघि र मतदानपछिको सुरक्षा व्यवस्था मिलाउन सरकारलाई निर्देशन दिएको छ। निर्वाचन आयोगका पदाधिकारी र सुरक्षा निकायका प्रमुखबीच बिहीबार भएको छलफलमा प्रमुख आयुक्त अयोधिप्रसाद यादवले निर्वाचनमा सुरक्षाको कमजोरी हुन नदिनतर्फ सतर्क रहन निर्देशन दिएका थिए।

प्रमुख आयुक्त यादवले मतदान कार्यपछिको मतपेटिका ढुवानी, मतगणना कार्यको सुरक्षा तथा समग्र निर्वाचनको व्यवस्थापनमा समेत सचेत र चनाखो रही सुरक्षा व्यवस्था मिलाउन निर्देशन दिएको प्रवक्ता शर्माले जानकारी दिए। त्यस क्रममा गृहसचिव लोकदर्शन रेग्मीले क्षेत्रीयस्तरदेखि वडास्तरसम्म सुरक्षा व्यवस्था मिलाउने तयारी गरिएको र हरेक मतदाता तथा उम्मेदवारलाई सुरक्षा प्रत्याभूति दिने किसिमले सरकारले काम गरिरहेको जानकारी दिएका थिए।