कर्णाली रोजगारलाई ६० लाख पाउन्ड
काठमाडौं : कर्णाली रोजगार कार्यक्रमका लागि बेलायती सहयोग नियोगले ६० लाख स्टर्लिङ पाउन्ड दिने भएको छ । सरकारले संघीय मामिला तथा स्थानीय विकास मन्त्रालयमार्फत दुर्गम मानिएको कर्णाली अञ्चलका ५ जिल्लामा आर्थिक वर्ष २०६३/६४ देखि रोजगार कार्यक्रम सञ्चालन गर्दै आएको थियो ।
कार्यक्रमका लागि पहिलो दातृ निकाय नियोगले उक्त जिल्लाका साथै बाजुराका ९ वटा गाउँका गरिब तथा विपन्न परिवारका लागि उक्त रकम दिने भएको हो ।उक्त रकम आगामी आर्थिक वर्ष २०७४/७५ देखि लागू हुने भएको हो । बेलायती सहयोग नियोगका नेपालस्थित कार्यालयका निमित्त प्रमुख मार्क स्मिथ र मन्त्रालयका सचिव केदारबहादुर अधिकारीबीच बुधबार सिंहदरबारमा उक्त सम्झौता भएको हो ।
नियोगले प्रदान गर्ने उक्त रकम सरकारले सन् २०१९ को डिसेम्बर महिनाभित्र खर्च गरिसक्नुपर्ने सम्झौतामा उल्लेख छ । मन्त्रालयको कर्णाली रोजगार कार्यक्रमका प्रमुख भूपेन्द्र सापकोटाले कार्यक्रमबाट हालसम्म २ लाख ९८ हजार २ सय १३ लाभग्राहीले ३७ लाख ३१ हजार ९ सय ११ दिन रोजगार पाइसकेको जानकारी दिए । उनका अनुसार १ हजार ६ सय ७५ वटा संरचनामध्ये ग्रामीण सडक, लघु जलविद्युत्, कुलो, खेलमैदान, बगैंचाजस्ता सामुदायिक सम्पत्ति निर्माण भइसकेका छन् ।
कर्णाली रोजगार कार्यक्रमको प्रभावकारी कार्यान्वयनका लागि २०७१ सालमा मन्त्रालयले कार्यक्रम सञ्चालन निर्देशिका जारी गर्नुका साथै आवधिक अनुगमन, मूल्यांकन, समस्या समाधानका लागि मन्त्रालयका सचिवको अध्यक्षतामा केन्द्रीय समन्वय समिति र प्राविधिक मार्गदर्शनका लागि वैदेशिक सहयोग समन्वय तथा योजना महाशाखा प्रमुख केदारनाथ शर्माको अध्यक्षतामा प्राविधिक समितिसमेत गठन गरिएको छ ।
प्रतिक्रिया दिनुहोस !
