कोमल साँझमा अतीतको सम्झना

काठमाडौं : कलेजका सहपाठीले धेरै पछि कलेज जीवनमै गाउने गरेको लोकप्रिय गीत नसुनी सुवास नेम्बाङलाई उठेर हिँड्न मन लागेन । एकैछिनमा 'अल्झेछ क्यारे पछ्यौरी तिम्रो चियाको बुटामा' गीतले सभा कक्ष गुञ्जिएपछि नेम्बाङ भावुक बने । आफ्नो पुरानो दौंतरीका बारेमा बोल्न उनी स्टेजमा उक्लिए । उनले इलामका डाँडाकाँडा मादल र गितार बोकेर गाउँदै हिँडेका पुराना यादहरू उत्खनन गरे । उनको घरमा पहिलो र अन्तिमपल्ट रूख टमाटरको तरकारी खाएको सम्झिए ।

संविधानसभाका पूर्वअध्यक्ष सुवास नेम्बाङका ती मित्र थिए वरिष्ठ गायक कोमल निरौला । उनले इलाममै बसेर संगीत यात्रालाई निरन्तरता दिए । राजधानीमा बस्ने इलामवासीको संस्था 'नाम्सालिङ सहयोग मञ्च' ले हालै आयोजना गरेको गायक निरौलाको दोस्रो एकल साँझ अतीत, प्रेम र भावुकताले भरिपूर्ण थियो । आयोजकका अनुसार उनको पहिलो एकल सांगीतिक साँझ २०४५ सालमा इलाममा भएको थियो । मोफसलबाट राजधानी आएर यहाँका वाद्यवादकसँग गाउन उनलाई सजिलो भएन । धेरै मेहनत गरे ।

गायक स्वयंले विगतका सम्झना ताजा गराउने किसिमका आफ्ना र स्वर सम्राट् नारायणगोपाल गुरुवाचार्य, दीप श्रेष्ठ, फत्तेमान, माणिकरत्न, भक्तराज आचार्यलगायत गायकका कालजयी गीत गाए । कोमलले चानचुन डेढ दर्जन गीत सुनाएर माइक अफ गर्न खोज्दा श्रोतामग्न थिए । सरस्वती बन्दना गरेर सुरु भएको कोमलको ओजपूर्ण गायन शृंखला उनको चर्चित युगल गीत 'चील होइन बेसारा' मा पुगेर वि श्राम लिएको थियो । साँझमा उनले 'अखण्ड शक्ति हौ युवा, अञ्जलीका गुराँस थुँगा, जीवनदेखि धेरै धेरै नै थाकेर, नआऊ जून कोठमा राति, हे फूल चुँडेर लाने हो, म हिमाल उठाइदिन्छु, प्रिय तिम्रो मुहारमा, पर लैजाऊ फूलहरू, मर्न बरु गाह्रो हुन्नलगायतका' लोकप्रिय गीत गाए ।

उमेरले ६ दशक पुगेका निरौलाले आफ्नो प्रस्तुतिको अवधिभरि ऊर्जासाथ प्रस्तुत भए । २०२६ सालमा रेडियो नेपाल प्रवेश गरेका उनको संगीतयात्रा आज पनि जारी छ । आधा शताब्दी बितिसक्दा संघर्ष धेरै गरेका छन् । शिक्षण पेसाबाट सेवानिवृत्त उनी संगीत साधनामै छन् । भन्छन्, 'अझै पोख्त हुन बाँकी छ ।' राजधानीमै बसेर संगीत कर्म गर्न पाएको भए अहिलेको भन्दा अग्लो उचाइमा पुग्ने थिएँ भन्ने उनलाई लाग्छ ।

समाजका विभिन्न पेसा, व्यवसाय र क्षेत्रमा आबद्ध स्थापित व्यक्तित्वसमेतको उल्लेख्य उपस्थिति रहेको कोमल साँझमा नेपाल संगीत तथा नाट्य प्रज्ञा प्रतिष्ठानका कुलपति सरुभक्त, वरिष्ठ गायकहरू दीप श्रेष्ठ, शम्भुजित बाँस्कोटा, गणेश रसिक, रविन शर्मा र कुबेर राईसमेत सहभागी थिए ।