साओमीको एमआई नोट-२ सार्वजनिक

काठमाडौं : साओमीले आफ्नो नयाँ उत्पादन एमआई नोट-२ नेपाली बजारमा भित्र्याएको छ । कम्पनीले मोबाइल उत्पादनमा फड्को मार्दै नविनतम प्रविधियुक्त एमआई मिक्स पछिको प्रिमियम फोनको रूपमा एमआई नोट-२ सार्वजनिक गरेको हो । साओमीको नेपालका लागि आधिकारिक बिक्रेता शारदा गु्रपअन्तर्गतको बत्सल इम्पेक्स प्रालिले गत वर्षदेखि बजारमा सोओमीका स्मार्टफोन बिक्रीवितरण गर्दै आएको छ ।

नेपाली बजारमा भित्रिएको एक वर्षको अवधिमा साओमीको उत्पादनले उत्साहजनक सफलताले पाएको छ । साओमीका स्मार्टफोन र विभिन्न इलेक्ट्रोनिक सामग्रीको लागि आधिकारिक अनलाइन स्टोरको रूपमा साओमी नेपाल डट कम डट एनपी रहेको कम्पनीले जनाएको छ । कम्पनीले बजारमा ल्याएको नयाँ समार्टफोनको दुवै साइडमा कर्भ विशेषता छ । फोनमा ५.७ इन्च ओएलईडी डिस्प्ले, ६ जीबी र्याम, १२८ जीबी रोम छ ।

२२.५६ मेगापिक्सल रियर क्यामरा रहेको यस स्मार्टफोनमा आठ मेगापिक्सल अटोफोकस फ्रन्ट क्यामार छ । ४०७० एमएएच ब्याट्री रहेको यस स्मार्टफोनमा प्रयोग भएको ब्याट्री चार गुणा चाडो चार्ज हुने कम्पनीले जनाएको छ । कम्पनीले एमआई नोट-२ को पहिलो चरणमा चैत १० गतेदेखि १५ सम्म बुकिङ खुला गरेको छ ।

यस फोनको उपभोक्ता मूल्य ७६ हजार नौ सय ९९ रुपैयाँ छ । बुकिङ अवधिभर कम्पनीले एमआई नोट-२ किन्ने उपभोक्तालाई चार हजार चार सय ९९ रुपैयाँ बराबरको एमआई ब्यान्ड-२ फोन नि:शुल्क प्रदान गर्ने जनाएको छ ।