अनिकालले भेनेजुएलामा हाहाकार

काराकसः भेनेजुएलाको सरकारले आर्थिक स्थिति नियन्त्रण बाहिर जान थालेपछि रेस्टुराँ र बेकरीमा छापा मार्न सुरु गरेको छ । सरकारले कैयौं फुड लाइन्स स्टोरलाई पनि नियन्त्रणमा लिएको छ । हालैमात्र सात सयभन्दा बढी बेकरीमा छापा मारेको हो ।

लामो समयदेखि कम्युनिस्ट शासनसत्ता रहेको भेनेजुएलामा आर्थिक एवं खाद्यान्न संकट बढेको छ । त्यहाँ ती पसलले चर्को मूल्य लिई ठगी गरेको सरकारको भनाइ छ । भेनेजुएलामा महँगा खाद्य पदार्थ बनाउन विदेशबाट आयातित पीठो प्रयोग गरिन्छ । ती खाद्य व्यवसायीले अनुदान पाएको सामान प्रयोग गरेर महँगा खाद्य पदार्थ पाउने गरेको सरकारको भनाइ छ ।

सरकारका अनुसार देशले आर्थिक संकट झेलिरहेका बेला बेकरी र रेस्टुराँले अनुदानको पीठोबाट महँगा खानेकुरा बनाउनु अपराध हुने स्पष्ट पारेको छ । यसखालका अपराध रोक्न सरकारले कारबाही सुरु गरेको बताइएको छ । कतिपय सहरमा सरकारले अनुमति दिएबाहेकका खानेकुरा बनाएको आरोपमा गिरफ्तार गर्न सुरु गरिएको छ । बुधबार यस्तै अभियोगमा दुईजनालाई हिरासतमा राखिएको छ ।

बेकरीले आफूसँग भएको ९० प्रतिशत पीठोको रोटी (ब्रेड) बनाउनुपर्ने सरकारी आदेश जारी गरिएको छ । उपराष्ट्रपतिले गत साता देशभरका सबै बेकरीलाई उपलब्ध पीठोको ब्रेड बनाउनैपर्ने सूचना जारी गरेका थिए । यसका साथै प्रत्येक बेकरीले बिहान ७ बजेसम्म ब्रेड विक्रीका लागि राख्नुपर्ने निर्देश दिएका थिए । यो नियम पालना नगर्ने बेकरी मालिकलाई सरकारले हिरासतमा लिने र बेकरी उद्योग सरकारीकरण गरिने चेतावनी दिइएको छ ।

यो अवधिमा सरकारले कैयौं फुड लाइन्सका पसललाई नियन्त्रणमा लिइसकेको छ । आगामी तीन महिनासम्म ती पसल सरकारै कब्जामा रहनेछन् । सरकार समर्थक समितिलाई भने घरघर गई अन्न आपूर्ति गर्ने जिम्मा लगाइएको छ ।

व्यापारीले भने सरकारी कदमको विरोध गरेका छन् । बेकरी र रेस्टुराँ नियन्त्रणमा लिएर सरकारले रोजगार खोसेको आरोप लगाएका छन् । धमाधम कारबाही गरिन थालेपछि भेनेजुएलामा ब्रेडको अभाव निकै बढेको छ । ५७ वर्षीय मिलाग्रोस क्याबरेराले सरकारी कदमको विरोध गर्दै भने, ‘सरकारले सुरु गरेको कदमले हाम्रो स्थिति मुस्किल भएको छ ।' ब्रेड जस्तो दैनिक उपभोग्य वस्तु किन्न पनि कठिन भएको छ । ब्रेड पाउन पनि कैयौं किलोमिटर पर जानुपर्छ ।'

सरकारले भने जनतालाई सेवा पुर्‍याउन यस्तो कदम चाल्नुपरेको दाबी गर्दै आएको छ । न्यूनतम मूल्यमा खाद्यान्न उपलब्ध गराउन आफूले सक्दो प्रयास गरेको सरकारी भनाइ छ । ब्रेड भेनेजुएलाका आम मानिसको भोजनको ठूलो हिस्सा हो । यहाँ खानेकुराको भाउ तीन गुनासम्म बढेको छ । देशभर खानेकुराको अभाव सिर्जना भएको छ ।

कतिपय व्यापारीले यसै बेला निकै भाउ बढाई अत्यधिक नाफा कमाउन खोजिरहेका छन् । गत वर्षको नोभेम्बरमा भेनेजुएलाका तीनवटा विश्वविद्यालयले गराएका सर्वेक्षणमा ९३ प्रतिशत जनतासँग खानेकुरा किन्ने पैसा पनि नभएको थाहा भएको थियो । लाखौं नागरिकले एक छाक मात्रै खाने गरेको बताएको उल्लेख गरिएको थियो ।