चीन-अस्ट्रेलिया सम्बन्ध सुदृढ
सिड्नीः चिनियाँ प्रधानमन्त्री ली खछ्याङको अस्ट्रेलिया भ्रमणले चीन र अस्ट्रेलियाबीचको सम्बन्ध थप सुदृढ बनेको बताइएको छ । चिनियाँ प्रधानमन्त्री ली खछ्याङले आइतबार अस्ट्रेलियाको पाँचदिने भ्रमण सम्पन्न पूरा गरेका छन् । पाँचदिने भ्रमण सकेर आइतबारै उनी न्युजिल्यान्डतर्फ प्रस्थान गरेका छन् ।
चीनको प्रधानमन्त्रीको हैसियतमा ११ वर्षपछिमात्र लीले अस्ट्रेलियाको भ्रमण गरेका हुन् । उनको भ्रमणसँगै दुई देशको बीचमा सम्बन्ध थप प्रगाढ बन्नुका साथै यसले थप उचाइ पनि हासिल गरेको विश्लेषण अस्ट्रेलियाली मिडियाले गरेका छन् । उक्त भ्रमणले यी दुई देशका बीचमा लगानीका थप सम्भावनाको खोजी गर्नुका साथै यसले आगामी दिनमा दुई देशबीचको आर्थिक सम्बन्धलाई बलियो बनाएको विश्लेषण पनि अस्ट्रेलियामा गरिएको विभिन्न अन्तर्राष्ट्रिय सञ्चारमाध्यमले जनाएका छन् ।
अस्ट्रेलियन भिटामिन निर्माण गर्ने कम्पनी ब्ल्याकमोर्सका प्रमुख कार्यकारी अधिकृत क्रिस्टिना होल्ग्याटले भनिन्, ‘यो भ्रमणले यी दुई देशको बीचमा आवश्यक मानिएको स्वतन्त्र व्यापारका क्षेत्रमा आपसी हित प्रवर्धन गर्ने काममा सघाउ पुर्याएको छ ।' उनले विश्वमा बढ्दो व्यापारिक मोडेलहरूमा चीन र अस्ट्रेलिया स्वतन्त्र व्यापारका क्षेत्रमा आपसी रूपमा लाभान्वित हुनसक्ने अवस्था रहेकाले यी दुई देशले यस विषयमा साझेदारी गर्नुपर्नेमा जोड दिइन् । उनले आफू यो भ्रमणबाट निकै नै उत्साहित र उत्प्रेरित पनि भएको धारणा राखिन् । उनको कम्पनीले पनि चीनसँग संयुक्त लगानीका लागि गत बिहीबार सम्झौता गरेको छ ।
‘विश्वमा बढ्दो व्यापारिक विश्वव्यापीकरणका माध्यमबाट यी दुई देश संयुक्त लगानी, व्यापारमा साझेदारी एवं स्वतन्त्र व्यापारका क्षेत्रबाट लाभान्वित हुन सक्छन्', उनले भनिन् । चीनसँगको संयुक्त साझेदारीका लागि अस्ट्रेलियाली व्यापारिक समुदाय पनि तयार रहेको उनको धारणा छ । चिनियाँ प्रधानमन्त्री लीले अस्ट्रेलियासँगको स्वतन्त्र व्यापारका लागि व्यक्त गरेको प्रतिबद्धताले गर्दा पनि चिनियाँ व्यापारिक समुदायमा उत्साह थपेको सञ्चारमाध्यमले जनाएका छन् ।
आठ वर्षयता चीन अस्ट्रेलियाको एक प्रमुख आर्थिक साझेदार राष्ट्र हो । चीनले अस्ट्रेलियाबाट कम्पनीका लागि कैयौं कच्चा पदार्थ आयात गर्ने गर्दछ । त्यसैगरी चीनले अस्ट्रेलियाबाट फलाम, वाइन, अन्य खाद्य पदार्थ र उसका टेलिकम्युनिकेशन एवं अन्य सञ्चारका कारखानाहरूका लागि कच्चा पदार्थ किन्ने गर्दछ । त्यस्तै अस्ट्रेलियाले चीनबाट ठूलो मात्रामा कपडा, टेलिकम्युनिकेशनका साधन र सामान एवं सूचना प्रविधिका सामान किन्ने गर्दछ । रासस/सिन्ह्वा
प्रतिक्रिया दिनुहोस !
