बुटवल पावर कम्पनीको स्वर्ण महोत्सव
काठमाडौः बुटवल पावर कम्पनी लिमिटेडको स्वर्ण महोत्सव कार्यक्रम सम्पन्न भएको छ । लिमिटेडले आइतबार ऊर्जामन्त्री जनार्दन शर्माको उपस्थितिमा कार्यक्रम सम्पन्न गरेको थियो । स्वर्ण महोत्सवमा दुई वटा विद्युत् आयोजनाको शिलान्यास गरिएको कम्पनीका सञ्चालक समितिका अध्यक्ष पद्म ज्योतिले जानकारी दिए ।
शिलान्यास भएका दुई आयोजनाबाट २०२० सम्म ६७.६ मेगावाट विद्युत् उत्पादन गर्ने लक्ष्य रहेको कम्पनीको भनाइ छ । २०२२ सालमा प्राइभेट कम्पनीका रूपमा स्थापना भएको कम्पनीलाई २०४९ सालमा पब्लिक लिमिटेड कम्पनीमा परिणत गरिएको थियो ।
२०५९ सालमा निजीकरण गरी निजी, सरकारी, कर्मचारी तथा सर्वसाधरणलाई सहभागी गराई कम्पनीलाई अगाडि बढाइएको छ । कम्पनीले १२ मेगावाटको झिमरुक विद्युत् केन्द्र तथा ९.४ मेगावाटको आँधीखोला विद्युत् केन्द्र सञ्चालनमा ल्याएको छ ।
कम्पनीले आफ्नै वितरण प्रणालीमार्फत स्याङ्जा, पाल्पा, प्युठान र अर्घाखाँची जिल्लाका ग्रामीण भेगका ५० हजारभन्दा बढी घरधुरीलाई विद्युत् सेवा प्रदान गर्दै आएको छ ।कम्पनीको मुख्य लगानीमा ताप्लेजुङ तथा पाँचथर जिल्लामा पर्ने काबेली नदीमा ३७.६ मेगावाटको काबेली ए जलविद्युत् आयोजना तथा लमजुङ जिल्लामा पर्ने न्यादी नदीबाट ३० मेगावाटको न्यादी जलविद्युत् आयोजनाको शिलान्यास भएको हो ।
काबेली ए आयोजनामा इन्फ्राको एसिया, सिंगापुर साझेदार रहेको छ भने न्यादी आयोजनामा स्थानीय कम्पनी लमजुङ विद्युत् विकास कम्पनीको साझेदार छ । नविकरणीय ऊर्जाको क्षेत्रमा नर्वेकै ठूलो कम्पनी स्ट्याटक्राफ्टसँगको सहकार्यमा ६० मेगावाटको खिम्ती प्रथम जलविद्युत् आयोजना र क्यानाडाको कम्पनी एससीपी हाइड्रोसमेतको सहकार्यमा चार मेगावाटको खुदी जलविद्युत् आयोजना हाल सञ्चालनमा छन् ।
प्रतिक्रिया दिनुहोस !
