सडक खनेको हेर्न गाउँलेको भीड

बझाङ : झनानादेखि खोली जोड्ने सडकखण्डमा एस्काभेटरले खनेको हेर्न पिखेतका बासिन्दाको दिनहुँ भीड लाग्ने गरेको छ । सेती नदी तारेर मेसिन ल्याएपछि पिखेतको चौरबाट सडक खन्ने काम भइरहेको हेर्न यहाँका मानिसको भीड लाग्ने गरेको हो ।

'एस्काभेटरले सडक काटेको हेर्न मानिसको सधैं लाइन हुन्छ', पिखेतका कृष्ण खोतीले भने, 'यसरी मेसिनले काम गरेको कहिल्यै देखेका थिएनौं । यो गाउँलेका लागि जात्राजस्तै भएको छ ।' गाउँका बूढापाका, महिला, बालबालिका मेसिनले काम गरेकै स्थानमा गएर दिनभर बसिरहन्छन् । 'मेसिनले यसरी काम गरेको देख्दा अचम्म लागेर आयो', पिखेतकी शान्तिदेवी विष्टले भनिन्, 'मेसिनले काम गरेको जति हेरे पनि रहर मेटिँदैन । लामो बकेटले माटोढुंगा एकैसाथ फालेको देख्दा यस्तो पनि हुने रहेछ भनेर अचम्मै लाग्छ ।'

एस्काभेटरले सडक काटेको हेर्न मानिसको सधैं लाइन हुन्छ । यसरी मेसिनले काम गरेको कहिल्यै देखेका थिएनौं । यो गाउँलेका लागि जात्राजस्तै भएको छ । - कृष्ण खोती, स्थानीय, थलारा गाउँपालिका

मेसिनले यसरी काम गरेको भारतमा देखे पनि आफ्नो देशमा पनि यस्तो प्रविधि आउँदा खुसी लागेको स्थानीय मानबहादुर रोकायाले बताए । गाउँमा सडक निर्माणमा सघाएपछि स्थानीयले एस्काभेटर मेसिन चालकलाई फूलमालाले सम्मान पनि गर्दै आएका छन् । 'हाम्रो गाउँमा पनि सडक आएपछि मोटर आउने भए', अर्का स्थानीय आनन्द रोकायाले भने, 'नदी तारेर मेसिन ल्याइएको हो । अब नदीमा पक्की पुल आवश्यक छ ।'

झनानास्थित सेती नदीमा अहिले पक्की पुलको पनि काम भइरहेकाले अब थलारा क्षेत्रमा पनि गाडी गुड्ने झनाना पक्की पुलका ठेकदार नवराज थापाले बताए । झनानाबाट सडक खन्न सुरु गरिएको यो बाटोले खोली-माडुकाट्ने-थामलेख-छान्ना हुँदै चैनपुर र डोटी-दिपायललाई समेत जोड्नेछ ।