रूसमा विपक्षी नेता थुनामा, २० हजार रुबल्स जरिवाना
वासिङटन: रूसको अदालतले सोमबार प्रमुख विपक्षी नेता एलेक्सी नावाल्नीलाई १५ दिन जेल सजाय दिने निर्णय गरेको छ । प्रतिबन्धित क्षेत्रमा प्रदर्शन आयोजना गरेका भन्दै उनीमाथि २० हजार रुबल्स पनि जरिवाना तोकिएको छ ।
उनको आह्वानमा रूसका ८० भन्दा बढी सहरमा आइतबार भ्रष्टाचारको विरोधमा प्रदर्शन भएका थिए । हजारौं प्रदर्शनकारीले रूसमा भ्रष्टाचार भएको भन्दै नारा जुलुस गरेका थिए । मस्को र सेन्ट पिटर्सबर्गमा ठूलो संख्यामा भेला भएर उनीहरूले विरोध गरेका थिए । मस्को प्रहरीलाई उद्धृत गर्दै तास समाचार समितिले ५ सयभन्दा बढी प्रदर्शनकारीलाई हिरासतमा लिएको उल्लेख गरेको छ । हिरासतमा लिइएका व्यक्तिमाथि प्रशासनिक कारबाही गरिने प्रहरीले जनाएको छ । उनीहरूलाई थुनामै राखिने वा आर्थिक जरिवाना गर्न सकिने छ ।
यसैबीच संयुक्त राज्य अमेरिकाको विदेश विभागले रूसी विपक्षी नेता एलेक्सेई नावाल्नी समेत सयौं प्रदर्शनकारीलाई थुनामा नराख्न चेतावनी दिएको छ । प्रदर्शनकारीलाई थुन्नु गैरप्रजातान्त्रिक भएको भन्दै अमेरिकाले निन्दा गरेको छ । मानवाधिकार संस्था ओभीडी इन्फोले मस्कोमा ७ सयभन्दा बढीलाई हिरासतमा लिइएको दाबी गरेको छ । ओभीडीले आगामी वर्ष रूसमा हुने राष्ट्रपतीय निर्वाचनमा भ्लादिमिर पुटिनविरुद्ध उम्मेदवारी दिन सक्ने भएकाले एलेक्सेई नावाल्नीलाई गिरफ्तार गरिएको आरोप लगाएको छ ।
अमेरिकी विदेश विभागका प्रवक्ता मार्क टोनरले नावाल्नीलाई गिरफ्तारी गरेको खबरले अमेरिका चिन्तित भएको बताए । शान्तिपूर्ण ढंगले प्रदर्शन गरिरहेका व्यक्तिलाई पक्राउ गरेर रूसले प्रजातान्त्रिक मूल्य मान्यतामाथि आक्रमण गरेको उनको कथन थियो ।टोनरले भने, ‘शान्तिपूर्ण ढंगले प्रदर्शन गरिरहेका प्रदर्शनकारी, मानवाधिकारवादी र पत्रकारलाई हिरासतमा लिइनु प्रजातान्त्रिक मूल्य मान्यताको अपमान हो ।’
अमेरिकाले यस्तो गतिविधिको निगरानी गरिरहने उनले बताए । प्रदर्शनकारीलाई तत्काल रिहा गर्न उनले रूससँग आग्रह गरेका छन् । नावाल्नीले एउटा फिलिम बनाएर रूसी प्रधानमन्त्री दिमित्रि मेदभेदेभले शंकास्पद तरिकाले अकुत सम्पत्ति कमाएको देखाएका छन् । फिलिम प्रदर्शन गरिएसँगै सरकारले भ्रष्टाचार गरेको भन्दै त्यहाँका जनता प्रदर्शनमा उत्रिएका हुन् ।
को हुन् नावाल्नी
भ्रष्टाचारविरोधी अभियान चलाइरहेका रूसका मुख्य विपक्षी नेता एलेक्सेई नावाल्नी लामो समयदेनि राष्ट्रपति पुटिनको विरोध गर्दै आएका व्यक्ति हुन् । गतवर्ष नै उनले सन् २०१८ मा हुने रूसी राष्ट्रपतीय निर्वाचनमा उम्मेदवारी दिने घोषणा गरेका थिए । गत वर्ष रूसको अदालतले उनीमाथि धोका दिएको विषयमा सजाय दिएको थियो । अदालतबाट धोकाधडीको सजाय पाएका हुजाले उनले उम्मेदवारी दिन पाउने देखिँदैन । यद्यपि उनले यसको खण्डन गरेका छन् । राजनीतिक प्रतिशोध लिन आफूलाई फसाइएको उनको भनाइ छ ।
सन् २००८ मा सरकारी निगममा भएको भ्रष्टाचार र लापर्वाहीका विषयमा उनले ब्लग लेख्न सुरु गरेका थिए । यसका लागि उनले तेल कम्पनी, बैंकका सेयर किनेका थिए । ती संस्थामा भएका घोटलाका बारेमा सामाजिक सञ्जालको प्रयोग गर्दै राजनीतिमा आएका हुन् । उनले राष्ट्रपति पुटिनको विरोध गर्छन् । यसैकारण उनी युवामाझ चर्चित छन् । पुटिनको विरोध गरेर लोकप्रिय बनेपछि उनले पुटिनको दल युनाइटेड रसियाको विरोध गर्दै आएका छन् । सन् २०११ मा भएको राष्ट्रपतीय निर्वाचनमा उम्मेदवारी भने दिएनन् । यद्यपि उनले पुटिनको दललाई भोट नदिन आह्वान गरेका थिए ।
पुटिनको विरोध गर्नेहरू पनि नावाल्नीका विरोधी छन् । रूसी राष्ट्रवादीले नावाल्नी राष्ट्रप्रति बफादार नभएको बताउँछन् । उनीहरूले नावाल्नी अमेरिकी एजेन्ट भएको बताउँदै आएका छन् । अमेरिकाबाट सञ्चालित भएको र रूसलाई कमजोर गराउने उनको मूल ध्येय भएको राष्ट्रवादीहरूको भनाइ छ । उनले अमेरिकाको येल विश्वविद्यालयमा एक सेमेस्टेर पढेका थिए । अध्ययन पूरा नगरी उनी रूस फर्किएका थिए । पुटिनको कडा विरोध गरेकै कारण विपक्षीले उनलाई सन् २०१२ को अक्टोबरमा आफ्नो नेता चुनेका थिए ।