भत्किएको बक्राहा बाँध निर्माण सुरु

विराटनगर : बर्खामा बाढीले भत्काएको बक्राहा नदीमा तटबन्ध निर्माणको काम सुरु भएको छ । जल उत्पन्न प्रकोप नियन्त्रण डिभिजन कार्यालय विराटनगरले तटबन्ध निर्माण तथा मर्मतका लागि ठेक्का लगाएर काम अघि बढाएको हो । बक्राहा नदीमा गत असार र साउनमा आएको बाढीले १७ स्थानमा बाँध भत्काई क्षति पुर्याएको थियो । बाढी बस्ती र खेतीयोग्य जमिनतिर पस्दा ठूलो नोक्सानी भएको थियो ।

जल उत्पन्न प्रकोप नियन्त्रण डिभिजन कार्यालय विराटनगरका प्रमुख देवनारायण साहले भने, 'क्षति पुगेका ठाउँको मर्मत र बाँध निर्माणका लागि ठेक्का प्रक्रिया तथा उपभोक्ताबाट काम सुरु गरिएको छ ।' उनले स्पर निर्माणदेखि बाँध मर्मतसम्मका काम गरिने जानकारी दिए ।

जल उत्पन्न प्रकोप नियन्त्रण डिभिजन कार्यालयले मोरङको मधुमल्लामा दुई, गोविन्दपुरमा दुई र बरडंगामा एक स्थानमा टेन्डरमार्फत र बाँकी स्थानमा उपभोक्ताबाट काम अघि बढाएको छ । २२ वर्षअघि निर्माण भएको बक्राहा बाँधलाई नयाँ ढंगले पुनर्निर्माण नगर्ने हो भने एकातिर बनायो अर्कोतिर भत्कने समस्या दाहोरिरहने जल उत्पन्न प्रकोप नियन्त्रण डिभिजन कार्यालयले जनाएको छ ।

साउन ७ गते हसन्दहबाट बक्राहा गाउँतर्फ पस्दा बाढीले डायनियामा हुलाकी मार्ग बगाएको थियो । चार हजार हेक्टर जमिन बगरमा परिणत भएको थियो । हसन्दहका हर्कबहादुर खड्का भन्छन्, 'स्थायी तटबन्ध बनाउन ध्यान नदिने हो भने बक्राहाको विनाश हरेक वर्ष खप्नु पर्ने छ । हाम्रो त बिल्लीबाठ नै लाग्न आँट्यो ।'

क्षति पुगेका ठाउँको मर्मत र बाँध निर्माणका लागि ठेक्का प्रक्रिया तथा उपभोक्ताबाट काम सुरु गरिएको छ । स्पर निर्माणदेखि बाँध मर्मतसम्मका काम गरिने छ । -देवनारायण साह, प्रमुख, जल उत्पन्न प्रकोप नियन्त्रण डिभिजन कार्यालय विराटनगर

स्थायी तटबन्ध निर्माणका लागि चार अर्बको डीपीआर र साढे तीन अर्ब रुपैयाँको बहुवर्षीय ठेक्काको कामका लागि पनि प्रक्रिया अगाडि बढाइएकोमा स्थानीय चुनावको मिति घोषणा भएसँगै आचारसंहिता लागू भएकाले काम अघि बढ्न नसकेको हो । बरडंगा २ का किसनलाल ठाकुरले हरेक वर्ष बाढीले बिघाका बिघा खेत कटान गर्दै आएकाले अब स्थायी बाँध बाँध्नुपर्ने माग गरे ।

जल उत्पन्नले दिगो तटबन्धका लागि दुई महिनाअघि डीपीआर तयार गरेको थियो । प्रमुख साहले भने, 'दुई दशकअघि बनेको बाँध अब धेरै टिक्दैन । नयाँ संरचना नबनाए हरेक वर्ष मर्मत गरेर बस्ती र खेतीयोग्य जमिन बचाउन सक्ने अवस्था छैन ।' सरकारले बाँध मर्मतका लागि प्रारम्भमा १५ करोड रुपैयाँ बजेट दिएको छ ।

बक्राहा खोलामा आउने बाढी र यसको कटानबाट उत्तरी मोरङको चुलीदेखि दक्षिणको तल्लो फेदीसम्मका १० वटा गाविस प्रभावित हुँदै आएका छन् । योपटक ठेक्काको क्रममा सरकारले धरौटी रकम बढाएकाले ठेकदारलाई उक्त रकम जम्मा गराउन भने समस्या भएको बताइएको छ ।