चोरीमा संलग्न प्रहरी हवल्दार पक्राउ
जनकपुरधाम : भारतीय नागरिकसँग पैसा लुटेको घटनामा संलग्न एक प्रहरी हवल्दार जनकपुरमा पक्राउ परेका छन् ।
जनकपुरको श्याम चोक नजिकै एक भारतीय व्यापारीबाट रकम लुटेको आरोपमा प्रहरी हवल्दार धमेन्द्र पासवानलाई प्रहरीले नियन्त्रणमा लिएको हो । भारतको मधुवनी जिल्ला ग्रामपञ्चायत कलना निवासी जीवछ यादवबाट दुई लाख रुपैयाँ लुटपाट गरेको आरोपमा प्रहरीले पासवानलाई नियन्त्रणमा लिएको हो ।
धनुषाको साविक डेवडिहा गाविस अकौडा घर रहेका पासवानले भारतीय नागरिक यादवसँग मंगलबार श्याम चौकबाट दक्षिण हनुमान मन्दिर नजिकै दुई लाख रुपैयाँ लुटपाट गरेका थिए ।
पासवान प्रहरी पोशाकमै भारतीय नागरिकसँग लुटपाट गरेका थिए । यादवको साथमा रहेको दुई लाख १० हजार नगदमध्ये १० हजार छाडेर पासवानले दुईलाख लुटेका हुन् ।
लुटपाटपछि पीडित भारतीय नागरिक यादव तथा स्थानीयवासीले हो हल्ला गरेपछि हनुमाननगर चौकीको प्रहरी टोलीले प्रहरी हवल्दार पासवानलाई पक्राउ गरेको धनुषाका प्रहरी नायब उपरीक्षक मनोज यादवले जानकारी दिए ।
प्रहरी नायब उपरीक्षक यादवका अनुसार पीडितको आरोपको आधारमा प्रहरीले पासवानको डेरामा छापामारी गर्दा लुटेको १÷१ हजारको दरको नोटसहित दुई लाख रुपैंयाँ बरामद गरेको हो ।
प्रहरी हवल्दार पासवानमाथि चोरी मुद्दा दर्ता गरी आवश्यक अनुसन्धान अघि बढाइएको छ । धनुषाको अकौडा निवासी पासवान रातेमाटो हेटौडा गणमा कार्यरत छन् ।
करिब १७/१८ वर्षदेखि नेपाल प्रहरीमा कार्यरत पासवान विगत ५ महिना पूर्व मात्र थप सहयोगका लागि काजमा जिप्रका धनुषामा आएका थिए । चोरीको मुद्दा दर्ता भएसंगै पासवान जागिरबाट निलम्बनमा परेका छन् ।
प्रतिक्रिया दिनुहोस !
