पेरिसमा तनावः प्रहरीको गोलीबाट एक चिनियाँकाे मृत्यु
पेरिसः चिनियाँमूलका एकजना स्थानीय बासिन्दा प्रहरीद्वारा मारिएपछि राजधानी पेरिस तनावग्रस्त बनेको छ । फ्रान्समा रहेका चिनियाँ आप्रवासीहरू तथा चीन सरकारले समेत फ्रान्सेली प्रहरीको यस्तो रबैयाप्रति कडा आपत्ति जनाएका छन् ।
सरकारविरोधी प्रदर्शनको दोस्रो दिन मंगलबार राति पेरिसको उत्तरपूर्वी इलाकामा ठूलो संख्यामा चिनियाँ मूलका फ्रान्सेलीहरू भेला भई प्रहरी-अत्याचारको घोर विरोध गर्दै हिंसात्मक प्रदर्शनीमा उत्रिएका छन् । प्रदर्शनकारीहरूले यस घटनाको उच्चस्तरीय कूटनीतिक अनुसन्धान गरिनुपर्ने र हत्यारा प्रहरीलाई कडाभन्दा कडा सजाय दिइनुपर्ने माग गरेका छन् ।
गत आइतबार साँझ चिनियाँ मूलका एकजना पेरिसवासी - ५६ वर्षीय साओयो लिउलाई उनी बस्ने अपार्टमेन्टमा पुगेर फ्रान्सेली प्रहरीले गोली हानी हत्या गरेको थियो । हत्या भएपछि फ्रान्सवासी सम्पूर्ण चिनियाँहरू आक्रोशित भएका थिए । उनीहरूले त्यसको विरोधमा प्रदर्शन गर्दा घटनाले अकल्पनीय रूप लिन पुगेको जनाइएको छ ।
घटनाको प्रारम्भिक र उत्पन्न कारणको सम्बन्धमा स्थानीय बासिन्दा, प्रदर्शनकारी तथा सरकारको आ-आफ्नै भनाइ र दाबी रहेको छ । मृतक लिउले नशाको सुरमा प्रहरीलाई बिनाकारण ठूलो र धारिलो हतियारले प्रहार गरी मार्ने प्रयास गरेको प्रहरीको आरोप छ । उनले आक्रमण गरेपछि आत्मरक्षाका लागि प्रहरीले गोली चलाउँदा दुर्भाग्यपूर्वक उनको मृत्यु हुन पुगेको प्रहरीको दाबी छ । प्रहरीले जानाजानी मारेको होइन भन्ने सरकारी कथन छ।
स्थानीय बासिन्दा तथा मृतकका आफन्तहरूले भने सरकारको यस्तो भनाइप्रति आपत्ति जनाएका छन् । आफ्नो घरभित्र बालबच्चा तथा परिवारजनसँगसँगै बसी रमाइलो गरी बसेका व्यक्तिले प्रहरीमाथि आक्रमण गरेको भन्ने तर्क गर्नु हास्यास्पद रहेको चिनियाँहरूको भनाइ छ । मृतकका आफन्त र परिवारजनले बेलुका खानाका लागि माछाको तरकारी काटिरहेको अवस्थामा प्रहरी जबरजस्ती घरभित्र घुसेर आतंक मचाएको बताएका छन् । प्रहरीले जानीजानी ताकेरै गोली हानी लिउको हत्या गरेको, लिउको हातमा कुनै ठूलो र धारिलो हतियार पनि थिएन, कसैलाई कुनै चोट पनि पुर्याएको थिएन भन्दै उनीहरूले घटनामा प्रहरीले गल्ती गरेको उनीहरूको भनाइ छ । परिवनरजनले भने, ‘प्रहरीले नै उनको ठाडो र निर्मम हत्या गरेको छ ।'
अत्यन्त आक्रोशित प्रदर्शनकारीहरूद्वारा गत सोमबार राति पेरिसमा गरिएको हिँसात्मक विरोध प्रदर्शनले भयानक रूप लिएको थियो । चिनियाँ प्रदर्शकारी र प्रहरीबीच घण्टौंसम्म भएको झडपमा तीनजना प्रहरी अधिकारीहरू नराम्ररी घाइते भएका थिए । प्रहरीले भने आफूमाथि जथाभावी ढुंगामुढा गरिएको, सार्वजनिक सम्पत्ति तोडफोड गरिएको, यातायात अवरुद्ध पारिएको र सडकमा गुडिरहेका थुप्रै गाडीमा आगजनी गरिएकाले आफूले भीडमाथि कारबाही गर्नु बाध्य भएको जनाएको छ । आइतबार र सोमबार दुई दिनमा ७५ जनाभन्दा बढी प्रदर्शनकारीहरूलाई पक्राउ गरिएको प्रहरीले स्पष्ट पारेको छ ।
फ्रान्समा बसोवास गर्दै आउने एसियाली आप्रवासीहरूको संख्यामध्ये चिनियाँहरूको संख्या नै सबभन्दा बढी रहेको जनाइन्छ । करिब ६ करोड साठी लाख जनसंख्या रहेको फ्रान्समा बीस लाख जति चिनियाँ आप्रवासी तथा चिनियाँ मूलका पुराना बासिन्दा स्थायी बसोवास गर्दै आएका छन् । जनसंख्या यो हिस्साले आफूहरूलाई फ्रान्सेली रैथाने बासिन्दा र सरकार समेतले जहिले पनि थिचोमिचो र अन्याय गरिरहने, विदेशी हरिकंगालहरू भनी हेप्दै बारम्बार घृणा र अवहेलना गरिरहने, सरकारले पनि कहिल्यै कुनै सामाजिक संरक्षण उपलब्ध नगराउने उनीहरूको गुनासो छ ।
यता, चीन सरकारले बेइजिङस्थित फ्रान्सेली राजदूतावाससँग उक्त घटनाको कारण र मानव क्षतिका सम्बन्धमा स्पष्टीकरण मागेको छ । चीनले फ्रान्सेली सरकारसँग उक्त घटनाको गहिराइसम्म पुगी छानबिन गर्न र चिनियाँ नागरिकले विश्वको जुनसुकै कुनामा शान्तिपूर्ण मार्गबाट आफ्ना भावना र आकांक्षा व्यक्त गर्न पाउनुपर्ने माग गरेको चिनियाँ विदेश मन्त्रालयका प्रवक्ता ह्वा छुनयिङले जानकारी दिए । —रासस/एपी