इयुबाट बेलायत बाहिरिन सुरु

लन्डनः बेलायतले युरोपेली संघ (इयु)बाट बाहिरिने प्रक्रिया (ब्रेक्जिट) बुधबार सुरु गरेको छ । पुरानै अवस्थामा नरहने र ऐतिहासिक मोडतर्फ मुलुकलाई लैजान चाहेकाले संघबाट बाहिरिने प्रक्रिया सुरु गरेको बेलायतले जनाएको छ । इयुको ६०औं वार्षिकोत्सव मनाएको केही दिनपछि बेलायत त्यसबाट बाहिरिने पहिलो देश बनेको हो ।

‘यो एउटा ऐतिहासिक क्षण हो, जहाँबाट हामी पछाडि फर्कन चाहन्नौं', बेलायतकी प्रधानमन्त्री थेरेसा मेले संसद्मा भनिन् । बेलायतका जनताले इयुबाट बाहिरिने पक्षमा मतदान गरेको केही महिनापछि प्रधानमन्त्री मेले आगामी दुई वर्षमा बेलायत बाहिरिने गरी प्रक्रिया सुरु गरेकी हुन् । उनले भनिन्, ‘अनुच्छेद ५० को प्रक्रिया सुरु भएको छ । बेलायतका जनताको चाहनाको सम्मान गर्दै बेलायत इयुबाट अलग भएको छ ।' यसका साथै थेरेसाले बेलायतमा रहेका इयुका सदस्य देशका नागरिक र इयुमा रहेका बेलायती नागरिकको अधिकारको सुनिश्चितता गरिनुपर्नेमा उनले जोड दिएकी छन् । यसका निम्ति ‘प्रारम्भिक सम्झौता' चाहेको उनले स्पष्ट पारिन् ।

ब्रसेल्सस्थित युरोपेली संघका लागि बेलायती राजदूत सर टिम ब्यारोले संघबाट बाहिरिनका लागि युरोपेली परिषद्का अध्यक्ष डोनल्ड टस्कलाई प्रक्रिया अगाडि बढाउन बुधबार पत्र हस्तान्तरण गरेका थिए । ब्यारोले पत्रकारको उपस्थितिमा बेलायतका तर्फबाट आधिकारिक पत्र टस्कलाई बुझाएका थिए । पत्रमा इयुका अरू २७ सदस्यहरूलाई आधिकारिक सूचना दिएर बेलायतले लिस्बन सन्धिको अनुच्छेद ५० लागू गरेको जानकारी दिइएको छ । अनुच्छेद ५० मा अहिले तोकिएको समयसीमा नबढाइएको अवस्थामा बेलायत सन् २०१९ देखि इयुबाट अलग हुने व्यवस्था छ ।

पत्र पाएपछि अध्यक्ष टस्कले आफूहरूले बेलायतलाई गुमाउनुपर्दा दुःख लागेको बताउँदै यस बारेमा चाँडै छलफल सुरु गर्ने जानकारी दिएका थिए । सम्बन्ध विच्छेद बारेको सहमति र भविष्यमा बेलायत र इयुको सम्बन्धका बारेमा छलफल हुने भएको हो । गत जुनमा भएको जनमत संग्रहमा ब्रेक्जिट पक्षधर विजयी भएपछि इयुसँग बेलायतको लामो सम्बन्ध तोडिने निश्चित भएको थियो ।

बेलायत बाहिरिनु इयुका लागि नराम्रो

स्लोभानियाः स्लोभानियाका विदेशमन्त्री कार्ल इर्जाभेकले इयुबाट बेलायत बाहिरिँदा बेलायत र संघ दुवैलाई राम्रो नहुने बताएका छन् । इयुबाट बाहिरिनका लागि बेलायतले युरोपेली परिषद्का अध्यक्ष डोनल्ड टुस्कलाई प्रक्रिया अगाडि बढाउन पत्र दिएपछि उनले दुःख व्यक्त गरेका हुन् । उनले बेलायत र इयुको आगामी दिनको सम्बन्धका बारेमा स्लोभानियाका लागि बेलायती राजदूत सोफी होनीसँग आफूले विचार आदानप्रदान गर्न लागेको जानकारी दिएका थिए । विदेशमन्त्री इर्जाभेकले बेलायत र स्लोभानियाको सहकार्यमा यसले कुनै असर नपार्ने विश्वास व्यक्त गरेको स्लोभानियाको सरकारी समाचार संस्था स्लोभानियन प्रेस एजेन्सीले जनाएको छ ।