सितापाइलामा सनराइज बैंकको शाखा

काठमाडौंः  सनराइज बैंक लिमिटेडले काठमाडौं जिल्लाको नागार्जुन नगरपालिका वडा नम्बर १ सितापाइला चोकमा शाखा स्थापना गरेको छ । उक्त शाखाको उद्घाटन बुधबार एक कार्यक्रमकाबीच बैंकका अध्यक्ष मोतीलाल दुगड र प्रमुख कार्यकारी अधिकृत रत्नराज बज्राचार्यको उपस्थितिमा नेपाल राष्ट्र बैंकका बैंक सुपरिवेक्षण विभागका कार्यकारी निर्देशक महेश्वरलाल श्रेष्ठले गरेका थिए ।

बैंकले नारायणी नेसनल फाइनान्स लिमिटेडलाई प्राप्ती गर्दा शंखमुलमा दोहरिएको शाखाको कारोबार एउटै शाखामा एकीकृत गरी अर्को शाखा सितापाइलामा स्थानान्तरण गरिएको बैंकले जनाएको छ । उक्त नयाँ शाखाबाट ग्राहकलाई लकर सेवासमेत उपलब्ध गराइएको छ । हाल सनराइज बैंक लिमिटेडले नेपाल अधिराज्यभर ६८ वटा शाखा र ७६ वटा एटीएमद्वारा ग्राहकलाई बैंकिङ सेवा प्रदान गर्दै आएको छ ।

साथै बीपी कोइराला स्वास्थ्य विज्ञान प्रतिष्ठान धरान, चितवन मेडिकल कलेज नारायणगढ र मलेसिया भिएलएन काठमाडौंमा एक्सटेन्सन काउन्टर तथा नेपालका विभिन्न १३ स्थानमा शाखारहित बैंकिङ सेवा सञ्चालन गरेको छ । यसका साथै निकट भविष्यमा बैंकले खुसिबु, बुधबारे, सुर्खेत, कालिकास्थान, हेटौंडामा शाखा खोल्न लागेको जनाएको छ ।