कर्मपा लामाद्वारा विवाह
नयाँ दिल्लीः बौद्ध धर्मावलम्बीका एक अवतारी धर्मगुरुले विवाह गर्नका लागि भिक्षु जीवनको त्याग गरेका छन् । सानैदेखि आफूलाई कर्मा काग्यु सम्प्रदायको कर्मपा लामाको अवतारी मानिन्दै आएका थिन्ले थाए दोर्जेले ३३ वर्षको उमेरमा भिक्षु जीवन त्याग गरेको बुधबार सार्वजनिक भएको छ । उनले भिक्षु जीवन त्यागसँगै विवाह गरेको घोषणा पनि गरेका छन् ।
बुधबार सत्रौं ग्याल्वा कर्मपा थाए दोर्जेको कार्यालयले वेबसाइटमार्फत निजी समारोहबीच उनको विवाह सम्पन्न गरेको घोषणा गरेको हो । भुटानमा जन्म भएकी भारत र युरोपमा बस्दै आएकी ३६ वर्षीया रिन्चेन यान्जोनसँग गत शनिबार विवाह गरेको जनाइएको छ ।
‘विवाह गर्ने मेरो निर्णयले ममाथि मात्रै होइन पूरै वंशका लागि नै सकारात्मक प्रभाव पार्नेछ', दोर्जेले भनेका छन्, ‘यसबाट हामी सबैका लागि सुन्दर र लाभदायी कुरा मिल्नेछ ।' थाए दोर्जे चीनको स्वशासित क्षेत्र तिब्बतमा जन्मिएका हुन् । उनले डेढ वर्षको उमेरदेखि नै आफू कर्मपा लामा भएको बताउँदै आएको जनाइएको छ । सन् १९९४ मा उनी परिवारसहित नेपाल हुँदै भारत पुगेका थिए ।
आफूलाई कर्मा काग्युको शीर्ष अवतारी लामा दाबी गर्ने उनी एक्ला व्यक्ति होइनन् । उर्गेन ट्रिन्ले नामक अर्का लामाले पनि आफू अवतारी लामा भएको बताउँदै आएका छन् ।
प्रतिक्रिया दिनुहोस !
