राष्ट्रपति चुनावमा रूसी हस्तक्षेपबारे २० जनासँग सोधपुछ गरिँदै

राष्ट्रपति चुनावमा रूसी हस्तक्षेपबारे २० जनासँग सोधपुछ गरिँदै

वासिङटनः गत वर्ष भएको अमेरिकी राष्ट्रपतिको निर्वाचनमा रूसी साइबर आक्रमण भएको भन्ने विषयमा छानबिन गरिरहेको समितिले २० जनासँग सोधपुछका लागि अनुमति मागेको छ । समितिमा रिपब्लिकन पार्टीका अध्यक्ष रिचर्ड बरले २० जनामध्ये कसैको नाम भने भन्न चाहेनन् । सोधपुछ गरिने व्यक्तिहरूमध्ये एकजना अमेरिकी राष्ट्रपतिका ज्वाइँ जेरेड कुसनर पनि रहेका छन् । उनलाई सोधपुछका लागि बोलाइएको खबर सोमबार नै सार्वजनिक भएको थियो ।

रिचर्डका साथ छानबिन समितिमा डेमोक्र्याटिक पार्टीका वरिष्ठ सांसद मार्क वोर्नरले यो समितिमा कुनै पनि खालको राजनीतिक प्रभाव पर्न नदिने बताएका छन् । उनले भने, ‘म र हैस् मार्क वोर्नर यस विषयमा मिलेर छानबिन गरिरहेका छौं । यो छानबिनलाई निष्पक्ष रूपमा सहयोग गरी सहयोग गर्न हामी दुवै तयार छौं । यो विवादमा हामी दुवैले पूरापूर सहयोग गर्नेछौं ।'

वोर्नरले राष्ट्रपतीय निर्वाचनका बेला विरोधी शक्तिले हस्तक्षेप गर्न खोजेको आरोप लगाए । उनले भने, ‘हाम्रो दुस्मन देशले हाम्रो सबैभन्दा उत्तम पद्धति लोकतान्त्रिक प्रक्रियामा आधारित चुनावमा डकैती गर्न खोज्यो । यसै बेला उसले एक उम्मेदवारलाई हराएर अर्को उम्मेदवारलाई फइदा पुर्‍याउने निर्णय गर्‍यो । रूसले अमेरिकी जनताको भलाइका लागि नगरेको स्पष्ट पार्न चाहन्छु ।' उनले रूसी राष्ट्रपति भ्लादिमिर पुटिनले अमेरिकाको उन्नति नचाहने गरेको दाबी गरे ।

अमेरिकालाई कमजोर पारेर आफू हावी हुन खोजेको उनको भनाइ छ । संसारमा रहेको अमेरिकी प्रभाव ध्वस्त पार्न पुटिनले यस्तो काम गर्न आदेश दिएको भन्दै उनले आलोचना गरे । आर्थिक र अन्य हिसाबले संसारभर रहेको अमेरिकी शक्ति घटाउन पुटिन लागिपरेको भन्दै उनले आक्रोश व्यक्त गरे । उनले भने, ‘तपाईं जुनसुकै पार्टीको समर्थक हुनुहोस्, अमेरिकी नागरिक भएको नाताले यो विषयमा चिन्तित हुनु आवश्यक छ ।'

ट्रम्पको चुनाव अभियानमा रिचर्ड बरले उनको सुरक्षा सल्लाहकारको भूमिका निर्वाह गरेका थिए । ट्रम्पसँग उनको निकट सम्बन्ध भएकै कारण उनलाई थुप्रै कुरा थाहा भएको हुनसक्ने आशंका गरिएको छ । बरले आफूले छानबिन समितिलाई पूर्ण सहयोग गर्ने स्पष्ट पारे । आफूले ट्रम्पलाई भोट दिएको र अमेरिकालाई हानि हुने कुनै काम नगरेको बताए ।

अमेरिकी राष्ट्रपतिको कार्यालय ह्वाइट हाउसले ट्रम्पका ज्वाइँ कुसनरले छानबिन समितिलाई आफूले जवाफ दिने निर्णय गरेको जानकारी दिएको छ । कुसनर राष्ट्रपति ट्रम्पकी जेठी छोरी इभानका ट्रम्पका श्रीमान् हुन् । उनलाई राष्ट्रपति ट्रम्पका वरिष्ठ सल्लाहकार नियुक्त गरिएको छ । अमेरिकाका लागि रूसी राजदूत सरगेइ किसल्याकलाई भेटेका कारण उनीमाथि छानबिन गरिनुपर्ने अवस्था देखिएको हो । ट्रम्प टावरमा भएको बैठकमा पूर्वराष्ट्रिय सुरक्षा सल्लाहकार माइकल फ्लिन पनि उक्त बैठकमा सहभागी थिए । यसै बैठकका कारण सुरु भएको विवादले फ्लिनले राजीनामा दिनुपरेको थियो । कुसनरले रूसी राजदूतका साथै थुप्रै रूसी अधिकारीसँग भेट गरेको बताइएको छ ।


प्रतिक्रिया दिनुहोस !

Unity

working together is no longer optional-it is a matter of compulsion

Annapurna Media Network has announced the Unity for Sustainability campaign which comes into force from January 1, 2022. The main aim of this campaign is to 'lead the climate change dialogue' working closely with all the stakeholders on sustainable development mode, particulary focusing on climate-change issues.