किन सुन्दर करिश्मा
नाम नै ‘ब्रान्ड' जस्तै लाग्छ करिश्मा मानन्धरको । नेपाली चलचित्र उद्योगमा नायिकामाथि टिप्पणी हुँदा सायद पहिलो सूचीको पहिलो, दोस्रो नम्बरमै आउँछिन् करिश्मा मानन्धर । हुन त करिब चार वर्षयता उनले कुनै चलचित्रमा अभिनय गरेकी छैनन् । तर, उनीप्रति दर्शकको आकर्षण भने उस्तै छ । चर्चा उत्तिकै भइरहन्छ । सम्झनेहरूले पनि उसैगरी सम्झिरहेको उनी ठान्छिन् । ललितपुरको झरुवारासीमा जन्मिएर नयाँबानेश्वरमै हुर्किएकी करिश्माले २०४२ सालमै पहिलो चलचित्र ‘सन्तान'मा दोस्रो मुख्य भूमिकामा अभिनय गरिन् ।
शुभतारा स्कुलबाट प्रवेशिका गरेकी उनले त्यसपछि नेपाली चलचित्र उद्योगमा आफूलाई स्थापित मात्रै गराइनन्, वर्ष दिनमा एक, दुई चलचित्र बन्ने समयलाई डोर्याउँदै लगेर उद्योगलाई नै अगाडि बढाउने काम गरिन् । त्यसपछि दंगाफसाद (हिन्दी), भाउजू, रणभूभि, वसन्ती, ट्रक ड्राइभर, गोपीकृष्ण, पापीमान्छेजस्ता दर्जनौं चलचित्र खेलिन् । करिब दुई सयभन्दा धेरै चलचित्र खेलिसकेकी करिश्माले ‘बाबुसाहेब' चलचित्र आफैं बनाइन् । उनले ‘फागु' बनाइन् । हाल उनी नयाँ चलचित्रको स्क्रिप्टमा काम गरिरहेकी छन् । नायिकाको भूमिकामा रहँदा जति प्रख्याति र सफलता भने निर्मात्री हुँदा पाइनन् ।
अभिनेत्रीभन्दा पनि पछिल्लोपटक करिश्मा नेतृको रूपमा स्थापित हुँदैछिन् । डा. बाबुराम भट्टराई नेतृत्वको नयाँ शक्तिमा उनी निकै सक्रिय रूपमा लागेकी छन् । अबको यात्रा कसरी तय गर्दैछिन् त ? उनीसँगको छोटो संवादः
हिजो र आजको परिचयमा कहीँ कतै परिवर्तन आए झैं महसुस हुन्छ कि हुँदैन ?
सबैभन्दा पहिला त म पब्लिक फिगर हुँ । जनताको मान्छे हुँ । झन्डैझन्डै मेरो जीवनका ३० वर्ष मैले कलाकारितामा बिताएँ । त्यसबेला पनि म जनताकै थिएँ । प्रत्यक्ष, अप्रत्यक्ष जनताकै लागि केही गरेँ हुँला । अहिले थालेको राजनीतिक यात्रा पनि जनताकै लागि हो । म राजनीतिमार्फत जनताका लागि केही गर्न चाहन्छु ।
अहिले राजनीतिक गतिविधिमा बढी सक्रिय हुनुहुन्छ, यसले कलाकारितालाई ओझेल पार्दैन र ?
मैले कलाकारितामा बिताएको समय, गरेको लगानी र त्यहाँबाट पाएको माया मेरा लागि अमूल्य छ, अहिले अलिक समय कताकता नमिलेजस्तो भएको मात्र हो, म दुवै क्षेत्रलाई सँगै लिएर जान्छु । एउटा चलचित्रको स्क्रिप्टमा पनि काम गरिरहेकी छु ।
करिश्माजीले राजनीति गर्नु ठूलै पार्टीमा गर्नुपर्ने, माओवादीबाट फुटेर गएको सानो पार्टीमा किन लाग्नुपरेको होला' भन्नेहरू पनि छन्, के भन्नुहुन्छ ?
कोही पुरानो भन्दैमा ठूलो हुँदैन । पुरानो पार्टीले कतिपय अवस्थामा आफ्नो लोकप्रियता गुमाइरहेका छन् । विश्वास कायम राख्न सकेका छैनन् । ठूलो भन्ने राजनीतिक दलबाट देशका लागि राम्रो काम नभएको अवस्थामा नयाँ शक्ति जन्मियो । मेरो विचारमा विचार ठूलो हो । यसको विचारले मलाई आकर्षित गर्यो । म अवसरवादी मान्छे होइन, त्यसो भएको भए म ठूला वा पुराना पार्टीमा लाग्थे होला । म समाज र देशका लागि केही गर्न सकियोस् भन्ने चाहन्छु । त्यो विचारले सम्भव छ । त्यही विचारसँग सहमत भएर म यसमा लागेकी हुँ ।
नयाँ शक्तिको कुन त्यस्तो एजेन्डा छ, जसले तपाईंलाई आकर्षित गर्यो ?
मुख्य त समृद्धि हो । हुन त सबै पार्टीले यो नारा लगाइरहेका हुन्छन्, तर अवलम्बन हुनुपर्यो नि ? अहिले विभिन्न राजनीतिक चरणपछि देशले गणतन्त्र प्राप्त गरेको अवस्था छ, संविधान संशोधनको मुद्दा समाधान गर्ने हो भने मुलुक अगाडि जान्छ त्यसपछि हामीले गर्ने के त ? अबको माग भनेको देशको समृद्धि नै हो, विकास नै हो ।
नयाँ शक्तिले अवलम्बन गर्ला त ?
मान्छेले सकारात्मक हुन जान्नुपर्छ । भर्खर स्थापित भएर विचार प्रवाहको चरणमा पार्टी छ । दुईतीन सय वर्ष पहिला यो देशमा आफ्नै बलबुताले ठूलाठूला मठमन्दिर, दरबार, देवल, बाटा, पुलेसा बनेका छन् तर अहिले आएर हेर्नुस् त, करेसाबारीमा तरकारी रोप्न पनि विदेशी सहयोगको अपेक्षा गरिन्छ । यो त विकास होइन नि ! भएको युवा शक्ति बिदेसिएको छ । स्रोतसाधन त्यत्तिकै अलपत्र अवस्थामा छन् । यसरी त विकास सम्भव छैन । आत्मनिर्मर हुनै पर्छ । हाम्रो एजेन्डा त्यही हो । हाम्रो पार्टी अग्र्यानिक पार्टी हो । हामी बिना पैसा चुनाव लड्दै छौं । आफंै गोजीको पैसा हालेर कार्यक्रम गर्दै हिँडेका छौं । यही सिद्धान्तलाई स्थापित गरेर व्यवहारमा लग्ने हो ।
अग्यानिक भन्नुभयो, यहाँको नेतृत्वलाई भारतपरस्त भन्ने आरोप लाग्छ नि ?
त्यही त अचम्म लाग्छ । किन यस्तो टिप्पणी हुन्छ । आज हामी पार्टीको कार्यक्रम गर्दैछौं, पार्टीमा आबद्ध हरेक साथीले हजार रुपैयाँ उठाएर त्यो व्यवस्थापन गर्दैछौं । हामी के हौं भनेर समय लाग्छ बुझाउन, सबै कुरालाई नकारात्मक आँखाले मात्रै हेरेन प्रगति सम्भव छैन भन्ने पनि हामीले बुझ्न जरुरी छ ।
यहाँलाई कुन दिन, कुन क्षणले अभिनेता र नेता बन्न प्रेरित गर्यो ?
खासगरी मेरो जीवनमा हरेक कुरा आइपर्दै गए । म कहिल्यै पनि महत्ववाकांक्षी भइन् । सामान्य उद्देश्य मैले जहिले पनि राखेरै हिँडे । भगवान्ले सबैकुरा मलाई दिँदैदिँदै जानुभयो र मैले त्यसमा मनैदेखि मेहनत गर्दै गएँ । मैले कलाकारिता गर्दा सिनेमा क्षेत्र अहिलेजस्तो बृहत् थिएन । त्यसताका एउटा, दुईटा आक्कलझुक्कल चलचित्र बन्थ्यो । अहिले दुई सयको हाराहारीमा बन्छ । अर्बौं लगानी छ । त्यसबेला कार्यक्षेत्र निर्माण गर्ने समयमा म यो उद्योगमा थिएँ । त्यस अर्थमा म आफूलाई भाग्यमानी ठान्छु । ३० वर्षको यो यात्राका क्रममा मैले समाजसँगै रहँे । अहिले आएर समाजका लागि केही गर्नुपर्छ भन्ने सोचमा थिएँ । यहीबेला मेरो विचार मिल्ने गरी नयाँ शक्ति आयो मैले आफूलाई यो पार्टीमा फिट देखेँ र यसैमा लागेँ ।
पहिलो चलचित्र खेल्दाको क्षण सम्झनु हुन्छ ?
करिब ३० वर्षअघि सन्तानमा दोस्रो लिड रोलमा थिएँ । त्यसबेला सानो भूमिकाले पनि कलाकारलाई ‘स्ट्यान्ड आउट' गथ्र्यो । धेरै दर्शकले चिन्थे । त्यसमा मेरो अलिकति नकारात्मक भूमिका पनि थियो । तै पनि त्यो मन पराइएको थियो ।
अहिले पनि यहाँको सुन्दरताको बयान गर्नेहरू धेरै छन् । सुन्दरताको रहस्य के हो ?
म जहिले पनि खुसी भइरहने प्रयास गर्छु । मान्छेको चोला हो, यो जतिखेर पनि नास हुन सक्छ । त्यसलाई बचाउन सक्नुपर्छ । म पनि कहिल्यै डाक्टर भेट्ने गर्दिनँ । आफूलाई भित्रैदेखि खुसी राख्ने प्रयास भने सधैं गरेँ । नकारात्मक कुराभन्दा सकारात्मक धारणाले आफूलाई घेरेँ ।
खानपान नि ?
खानपानमा पनि ध्यान दिनै पर्छ । उमेरअनुसार बानी परिवर्तन गर्नुपर्छ । मीठो लाग्छ भन्दैमा जे पनि, जति पनि र जतिबेला पनि खानु हुँदैन । खाने कुरामा म आफ्नो शरीरको भाषा सुन्छु । सामान्य योग, ध्यान र क्लब जान्छु । साथीभाइ बनाउने, मनमा जे आयो त्यही गर्ने, खुसी भइरहने मेरो जीवन जिउने सूत्र हो । ऊर्जा भनेकै खुसी हो । उत्साह र खुसी ठूलो बल हो ।
चलचित्र नै थोरै बन्ने जमानामा चलचित्र खेल्दा के कस्ता अनुभव बटुल्नुभयो ?
म त त्यतिबेलै मोडर्न थिएँ । काठमाडौंमा बस्थेँ । त्यसबेलै कट्टु लगाएर हिँड्थेँ । टपलेस लगाएर हिँड्थेँ । अहिले पनि गाउँमा रुढिवादी छ भने त्यो बेलामा नहुने कुरै भएन तर मैले भोग्नु परेन । मैले नै बरु पत्रिकामा पहिलोपटक ग्ल्यामरस फोटो दिएँ ।
आफैंलाई मन नपर्ने बानी ?
म अलि धेरै इमानदार छु, म सोच्छु कि यदि कसैले विश्वासघात गर्छ भने त्यो उसले आफैंलाई पनि विश्वासघात गरेको हो ठान्छु । तर कहिलेकाहीँ अप्ठ्यारो लाग्छ ।
आफैंलाई गर्व लाग्ने बानी ?
खै, त्यस्तो त केही छ कि जस्तो लाग्दैन । तर अहिले चारपाँच वर्षदेखि चलचित्रमा नखेले पनि मलाई दर्शकले उत्तिकै माया गर्छन्, ‘हाम्री करिश्मा' भन्छन् । अर्कै आनन्द आउँछ ।
अचेल अफर आउँछ कि आउँदैन ?
ए...आउँछन् नि ! पब्लिक फिगर भनेकै त्यही हो । म म्यासेन्जर खोल्दै खोल्दिनँ । तर म त्यस्ता कतिपय आँखा परेका म्यासेजको सकारात्मक र परिपक्व जवाफ दिन्छु ।
सधैं सुन्दर हुने टिप्स ?
सबैभन्दा पहिला त सकारात्मक सोच राख्ने । हाँसिरहने । सकारात्मकताको सञ्चार गरिरहने हो । अनि महिलाले प्राकृतिक कुरालाई पच्छ्याउनै पर्छ । आमाले दूध चुसाउने, सुत्केरीमा पटुका बाँध्ने, मसाज गर्ने आफूलाई केयर गर्नु जरुरी छ । पेट सफा राख्ने, मन सफा राख्ने, मैदा, जंकफुड, कोक आदि नपिउनु राम्रो हुन्छ ।
प्रतिक्रिया दिनुहोस !
