फेसन डिजाइनरका रोजाइमा सेलिब्रेटी

फेसन डिजाइनर रोजिना श्रेष्ठले धेरै सेलिब्रेटीका लागि पहिरन डिजाइन गरिसकेकी छन् । कमलपोखरीस्थित सिटी सेन्टरमा ६ वर्षदेखि कायरा बुटिक सञ्चालन गर्दै आएकी उनको अनुभवमा पहिलाभन्दा अहिले नेपाली सेलिब्रेटीहरू फेसनप्रति बढी सचेत हुन थालेका छन् । नेपाली सेलिब्रेटीहरू पहिरन छनोट र रुचिमा फरकफरक धारणा राख्छन् । सबैको आआफ्नै विशेषता र पक्ष छन् । उनलाई नायिका श्वेता खड्काको पहिरन रुचि मनपर्छ । श्वेताले सरल प्रकारका पहिरन लगाए पनि सभ्य र सानदार देखिने रोजिनाको भनाइ छ । 'श्वेताले सामान्य पहिरन लगाए पनि उनमा रोयल लुक देखिन्छ', रोजिनाले भनिन् ।

फेसन डिजाइनर रोजिनाका अनुसार नायिका प्रियंका कार्कीलाई 'हट एन्ड बोल्ड' पहिरन सुहाउँछन् । चलचित्र 'ए मेरो हजुर', 'कथा काठमाडौं', 'राधा', 'छक्का पञ्जा २' लगायतका विभिन्न चलचित्रमा पनि ड्रेस डिजाइनरका रूपमा काम गरिसकेकी रोजिनालाई नन्दिता केसी, करिश्मा मानन्धरलगायतका केही नायिकाको फेसन सेन्स मन पर्छ ।

नायिका श्वेता खड्काले सामान्य पहिरन लगाए पनि रोयल लुक देखिन्छ । प्रियंका कार्कीलाई 'हट एन्ड बोल्ड' पहिरन सुहाउँछन्
-रोजिना श्रेष्ठ

अर्का फेसन डिजाइनर सुजन पन्थीले लाजिम्पाटमा लाफ डिजाइन स्थापना गरेको दुई वर्ष भयो । भारतको नयाँदिल्लीस्थित नेसनल कलेज अफ फेसन एन्ड टेक्नोलोजीबाट फेसन डिजाइनिङ र फेसन मर्केन्डाइजिङमा स्नातक गरेका पन्थीलाई भने नायिका प्रियंका कार्कीको फेसन सेन्स मन पर्छ । प्रियंकाले विभिन्न चलचित्र प्रिमियर र अन्य कार्यक्रममा जाँदा लगाएको ड्रेस अपबाट उनी प्रभावित छन् । पन्थीले 'फूलैफूलको मौसम तिमीलाई', 'निर्भय'लगायतका चलचित्रमा फेसन डिजाइनरका रूपमा काम गरिसकेका छन् । नायकमा उनलाई अनुपविक्रम शाहीको क्याजुयल ड्रेसअप मनपर्छ ।

नायिका प्रियंका कार्कीको फेसन सेन्स मनपर्छ । प्रियंकाले विभिन्न चलचित्र प्रिमियर र अन्य कार्यक्रममा जाँदा लगाएको ड्रेस अपबाट प्रभावित छु । -सुजन पन्थी

दर्शकमाझ लोकप्रिय नयाँ पुस्ताकी नायिका साम्राज्ञीराज्य लक्ष्मी शाहको फेसन सेन्स मन नपराउने कमै होलान् । मोडलिङ हुँदै रजतपटमा आएकी उनको फेसन सेन्सबाट फेसन डिजाइनर नवीना महर्जन पनि प्रभावित छिन । ६ वर्षदेखि सर्मन एपेरेल बालकुमारीमा डिजाइनरको रूपमा काम गर्दै आएकी नवीना भन्छिन्, 'चलचित्रमा साम्राज्ञीले लगाएको क्याजुयल वेयर मलाई असाध्यै मनपर्छ । सारीले पनि साम्राज्ञीलाई त्यत्तिकै सुहाउँछ ।' नवीनाको विचारमा नायकहरूमा राजेश हमालको व्यक्तित्व जुनसुकै गेटअपमा खुल्छ । त्यसैगरी नयाँ पुस्ताका नायकमा अनमोल केसी 'क्याजुयल वेयर'मा 'योङस्टर लुक' देखिन्छन् ।

न्युरोडमा सृजनी फेसन वेयर सञ्चालन गर्दै आएकी सृजनी तुलाधरलाई अहिलेका सेलिब्रेटीभन्दा पहिलेकै सेलिब्रेटी फेसनप्रति सचेत रहे जस्तो लाग्छ । 'मलाई त चलचित्र सिन्दूरकी मीनाक्षी सेशाधरको फेसन मनपर्छ । अहिले नायिका करिश्मा मानन्धरको फेसन सेन्सबाट प्रभावित छु', उनले भनिन् ।

चलचित्रमा साम्राज्ञीराज्य लक्ष्मी शाहले लगाएको क्याजुयल वेयर मलाई असाध्यै मनपर्छ । सारीले पनि साम्राज्ञीलाई त्यत्तिकै सुहाउँछ । नायकमा राजेश हमालको व्यक्तित्व जुनसुकै गेटअपमा खुल्छ । -नवीना महर्जन

फेसन डिजाइनरको हितमा काम गर्दै आएको संस्था नेपाल फेसन महासंघका अध्यक्ष नवीन लुइँटेलको अनुभवमा दुई तीन वर्षको अन्तरालमा नेपाली सेलिब्रटीमा फेसन सेन्स बढ्दै गएको छ । उनका अनुसार प्रायः सबै मिस नेपाल आफ्नो पहिरनप्रति सचेत देखिएका छन् । त्यसैगरी नायिकाहरूको कुरा गर्दा प्रियंका कार्की र रीमा विश्वकर्माले औपचारिक र अनौपचारिक कार्यक्रममा सहभागी हुँदा कार्यक्रमको प्रकृतिअनुसारको पहिरनमा देखिने गर्छन् ।

प्रियंका र रीमाले आफू जाने कार्यक्रमअनुसार ड्रेस अप मिलाउन फेसन डिजाइनरसँग सल्लाह लिएर पहिरन एवं गरगहना मिलाउने गरेको उनको बुझाइ छ । पूर्वीय र पश्चिमेली पहिरनमा मात्रै नभई उनीहरू सारी, लेहेंगालगायतका 'इथ्निक डिजाइन'मा पनि सुन्दर देखिन्छन् । नायकको कुरा गर्दा जीवन लुइँलेट अलि 'चुजी' लाग्छ उनलाई । त्यसैगरी सौगात मल्ल, अनमोल केसी पनि फेसन कन्सस भएको उनको भनाइ छ ।

नेपाली सेलिबे्रटीमा फेसन सेन्स बढ्दै गएको छ । प्रायः सबै मिस नेपाल आफ्नो पहिरनप्रति सचित देखिएका छन् । प्रियंका कार्की, रीमा विश्वकर्मालगायतका नायिका कार्यक्रमको प्रकृतिअनुसारको पहिरनमा देखिन्छन् । - नवीन लुइँटेल अध्यक्ष, नेपाल फेसन महासंघ

बिर्तामोडकी फेसन डिजाइनर वर्षा श्रेष्ठलाई पनि नायिका प्रियंका कार्कीको ड्रेसअप मनपर्छ । अरूले लगाएका पहिरनभन्दा प्रियंकाले लगाउने पहिरन नौलो र राम्रो लाग्छ । उनले लगाउने परम्परागत पहिरनमा कुर्ती, लेहेंगा, वन पिस, गाउनलगायतका लुगा वर्षालाई मन पर्छ । मिस पूर्वाञ्चल, मिस पूर्वाञ्चल आइकन, मिस मेचीलगायत थुप्रै प्रतियोगितामा ड्रेस डिजाइनरको रूपमा काम गरिसकेकी उनी टेरेसा फेसन बुटिककी सञ्चालिका हुन् । 'पहिलेभन्दा अहिले नेपाली सेलिब्रेटी आफूले लगाउने पहिरनप्रति सचेत देखिन थालेका छन्', उनले भनिन् ।