१२ हिमाल आरोहण गर्न २३९ लाई अनुमति

काठमाडौः हिमाल आरोहणको मौसम सुरु भएसँगै पर्यटन विभागले १२ वटा हिमाल आरोहणका लागि दुई सय ३९ जना विदेशीलाई आरोहण अनुमति दिएका छन् । सोमबारसम्म विभागले १२ हिमालमा ३० वटा आरोहण दल रहने गरी आरोहणका लागि अनुमति दिएको विभागका निमित्त महानिर्देशक दुर्गादत्त ढकालले बताए ।

पर्वतारोहणसम्बन्धी नियमावली, २०५९ को ३ नम्बर बुँदामा पर्वतारोहणका लागि अनुमति लिनुपर्ने व्यवस्थाअनुसार दिइएको अनुमतिमा सबैभन्दा धेरै सगरमाथा आरोहणका लागि १७ दलका एक सय ४७ जना छन् । नुत्सेका लागि दुई आरोहण दलका १९ जना, आमादब्लम एक आरोहण दलबाट ११ जना, अन्नपूर्ण पहिलो दुई आरोहण दलबाट १० जना, धौलागिरि एक आरोहण दलबाट १५ जना, मकालु ६ जना, ल्होत्सेका लागि ९ जना आरोहीले आरोहण अनुमति लिएको विभागले जनायो । बाँकी अग्ला हिमालमध्ये कञ्चनजंघा आरोहणका लागि समाचार संकलनसम्म अनुमति लिएका छैनन् । विभागको तथ्यांकअनुसार सन् २०१४ सम्ममा चार हजार चार सय २८ जनाले सगरमाथाको सफल अरोहण गरेका छन् । त्यसमा दुई सय ७९ जना महिला छन् ।

तीन वर्षअघि गएको भूकम्प र हिमपहिरोका कारण दर्जनौं मानिसको मृत्यु भएपछि हिमाल आरोहण पूरै ठप्प भएको थियो । यस वर्ष आरोहण सिजनको सुरुआतमै अनुमति लिने आरोहीको संख्या ह्वात्तै बढेको महानिर्देशक ढकालले जनायो । सरकारले ६ हजारदेखि आठ हजार मिटरसम्मका आरोहण गर्न यकिन गरेको हिमालमध्ये एक सय ८६ मानवपाइला पुग्न बाँकी रहेको तथ्यांक छ ।

सरकारले चार सय १४ हिमाल आरोहणका लागि खुला गरेका छन् । आरोहणका लागि खुला गरिएका हिमालमध्ये आरोहीले सगरमाथा र धौलागिरिमा मात्र रोज्ने गरेको तथ्यांक छ । केही हिमालमा आरोहीको भीड हुने र अधिकांश हिमालमा आरोहण नगरिने भएकाले यसको प्रचारप्रसार गरी आरोहण योग्य बनाउन लागि परेकोले थप हिमाल आरोहणका लागि सहज बनाउन विभाग लागिपरेको जनायो ।

कञ्चनजंघा तीन सय ४४ जना, ल्होत्से पाँच सय ५५ जना, यालुङकाङ ५३ जना, मकालु चार सय ३४ जना, छ्यो यू चार सय ६५ जना, मनास्लु एक हजार ७९ जना र अन्नपूर्ण पहिलो दुई सय २२ जनाले सफल आरोहण गरेका छन् ।