हावाहुरी र असिनाले सास्ती

चन्द्रपुर : रौतहटमा आएको हावाहुरी र असिनापानीले तीन हजारभन्दा बढी घरमा क्षति पुर्याएको छ । जिल्लाको चन्द्रपुर नगरपालिका वृन्दावन गाउँपालिकाको बस्तीका दुई हजार आठ सयभन्दा बढी घरमा हावाहुरीले क्षति गरेको जिल्ला प्रशासन कार्यालयले जनाएको छ । क्षतिको संकलन गर्दा अझै धेरैको घर छुटेको स्थानीय मदन सापकोटाले बताए ।

कृषि कार्यालय र स्थानीय प्रशासनको टोलीले संकलन गरेको क्षतिको विवरणमा १० करोड रुपैयाँभन्दा बढी कृषिक्षेत्र र करिब चार करोड रुपैयाँबराबरको घरमा क्षति पुगेको छ । हावाहुरी र असिनापानीले घरको छानामा लगाएको खपडा, टायल फुटाएको छ भने झुपडीका छानासमेत उडाएको थियो ।जिल्लाको सन्तपुर, बैजनाथपुर, बिनवाटोल, खौरा, चेतनगर, अल्टोकी, सिन्धुरेघारीलगायत वृन्दावन गाउँपालिकाको बलेरीटोलका बासिन्दा घरको छाना नभएपछि बिचल्लीमा परेका छन् ।

सन्तपुर र बैजनाथपुर टोलमा मात्रै चार सयभन्दा बढी घरमा क्षति पुगेको छ । त्यसमा पनि सबैभन्दा बढी चेतनगर र खौराटोलमा हावाहुरी र असिनापानीले सबैभन्दा बढी घरमा क्षति गरेको छ । हावाहुरी र असिनाले खपटा फुटाएपछि घरमा बस्न समस्या भएको खौराटोलका जोगेन्द्र साहले बताए । चेतनगरका रामचन्द्र चौधरीले घरको छाना उडाएकाले घरमा बस्न भएको बताएका छन् ।

हावाहुरी र असिनापानीले घरको छानामा लगाइएको टायल फुटाएको छ भने छानासमेत उडाएको छ ।

चेतनगरटोलमा रहेको करिब ४० वटा मुसहरको फुसको झुपडीको छाना उडाएको छ । गरिब तथा दलित बस्तीमा बस्दै आएका हजारैाँ मानिस पीडित छन् । बालबालिका तथा वृद्धवृद्धा थप पीडित बनेका छन् ।

दिनहुँजसो हावाहुरी आउने गरेकाले राति घरभित्र बस्न अप्ठ्यारो भएको पीडितले बताएका छन् । खपटाले छाएको अधिकांश घरमा क्षति पुगेका र एकैपटक लाखौं खपटा आवश्यक भएकाले छाना छाउन खपटासमेत अभाव भएको सन्तपुरका स्थानीय विनोद चौधरीले बताए ।

तत्काल कहींकतैबाट राहत नपाएका पीडितको गुनासो छ । पीडितलाई त्रिपाललगायत आवश्यक सामग्री तत्काल वितरण गर्न जिल्ला प्रशासन कार्यालयलाई ध्यानाकर्षण गराएको एमाले चन्द्रपुर नगर कमिटीका सचिव राजेन्द्र तिवारीले जानकारी दिए । हावाहुरीका कारण त्यस क्षेत्रमा १० करोड रुपैयाँभन्दा बढीको अन्नबाली, तराकारी तथा फलफूल खेती नष्ट भएको जिल्ला कृषि विकास कार्यालयले जनाएको छ ।