गोबध बन्द गर्न मुस्लिम धर्मगुरुको आह्वान

नयाँदिल्लीः मुस्लिम धर्मगुरु हजरत ख्वाजा मोइनुद्दिन दरगाह दिवान सैयद जैनुल आबेदिन अली खानले मंगलबार भारत सरकारसँग देशभर गोबध र यसको मासु विक्रीमा रोक लगाउन माग गर्दै मुस्लिम धर्मावलम्बीलाई गोमांस खान छोड्न आग्रह गरेका छन् ।

गोमांसकै कारण हिन्दु र मुस्लिमबीच वैमनस्य बढ्न सक्ने भएकाले यस्तो आग्रह गरेका हुन् । भारतभर शान्ति र भाइचारा कायम राख्न आफूभन्दा पहिलेका ख्वाजा मोइनुद्दिन हसन चिस्तीले पनि गोमांस त्याग गरेको उनले स्मरण गरे । सद्भावना कायम गर्न आफूले यस्तो आग्रह गरेको उनले स्पष्ट पारे ।

उनले अजमेरमा आयोजित समारोहलाई सम्बोधन गर्दै भने गाईको मासुको विवादलाई लिएर हिन्दु र मुस्लिमबीचको भाइचारा मासिन सक्ने उनको आशंका थियो । हाम्रै समाजका दाजुभाइले आमा भनेर सम्मान गर्ने प्राणीको मासु चाहिन्छ भनेर बखेडा गर्नु कसैको हितमा नहुने उनको भनाइ थियो । गाईको मासु खान छोडेमा हिन्दुले पनि आफ्नो सम्प्रदायका कुराको सम्मान गर्ने उनको कथन छ ।

सयौं वर्षदेखि मिलेर बसेको समाजमा सद्भाव कायम गर्ने कुरा कसैल गर्छ भने आफूहरूले पनि केही त्याग गर्नुपर्ने उनको आह्वान थियो । दरगाह दिवानले गुजरात सरकारद्वारा गुजरात विधानसभामा पशु संरक्षण (संशोधन) अधिनियम २०११ पारित भएको विधेयकको स्वागत गरेका थिए ।

दिवानले भने, ‘केन्द्र सरकारले गोबधमाथि कानुन बनाएर आजीवन कारावासको सजाय गर्नुपर्ने र गाईलाई राष्ट्रिय जनावर घोषणा गर्नुपर्ने माग गरे । हिन्दुहरूको आस्थाको प्रतीक भएकाले यदि सरकारले गाई बचाउन चाहन्छ भने सबैले साथ दिनुपर्ने उनले आग्रह गरे । कसैको धर्म र आस्थाको प्रतीकलाई उसकै अगाडि मार्न पाऊँ भन्नु धर्मसंगत नभएको उनले बताए ।

यसैगरी उनले तीनपटक तलाक भनेर महिलामाथि भइरहेको दुव्र्यवहार कुरानविरोधी भएको स्पष्ट पारे । जब विवाह एकान्तमा हुँदैन भने तलाक कसरी एकान्तमा हुन सक्छ भन्दै प्रश्न गरे । कुरानमा समाजमा महिलाको गरिमा, सम्मान र सुरक्षा सुनिश्चित गर्नुपर्ने विभिन्न नियमको व्यवस्था गरिएको बताउँदै तलाक अल्लाहको भावना विपरीत भएको बताए । विवाह हुँदा दुई परिवार आवश्यक हुने तर तलाक एउटै पक्षले अर्को पक्षलाई मौका नदिई गरिनु उचित हुनै नसक्ने उनको राय थियो ।

क्षणिक भावावेशमा आएर परिवार ध्वस्त हुने डरले तीनपटक समय दिइएको उनले स्पष्ट पारे । अचेल एक मिनेटभित्रै तीनपल्ट तलाक भनेर धार्मिक भावनाको सम्मान नगरिएको उनले बताए ।