नाट्य क्षेत्रमा एक्ली मधेसी महिला 

जनकपुरधामः घरबाट निस्केर सामान्य कामकाज अपनाउनसमेत गाह्रो पर्ने मधेसी महिलाका लागि प्रियंका झा प्रेरणाकी पात्र हुन् । १८ वर्षदेखि मिथिला कला संस्कृति उत्थानका साथै नाट्य क्षेत्रमा समर्पित प्रियंका अहिले नाटक निर्देशन गर्दै गाउँगाउँमा जनचेतना फैलाउने अभियानमा छिन् । उनी एक्लो मधेसी महिला निर्देशक बनेकी छन् ।

मधेसमा महिला अघि बढ्नुपर्छ उनीहरूले समाजका कुरीतिविरुद्ध आवाज उठाउनुपर्छ भनेर भाषण दिने थुप्रै देखिए पनि आफ्ना छोरीबुहारीलाई नाटक वा कलाकारिताको क्षेत्रमा आउन दिने आँट धेरै थोरैले गर्न सकेका छन् । प्रियंकाका बुवा प्रसिद्ध नाटककार रमेशरञ्जन झाले छोरीलाई यस क्षेत्रमा आउन हौसला दिए पनि मैथिल समाजमा नाटकलाई नै प्रमुख पेसा बनाएर अघि बढ्न प्रियंकाले एक्लै लड्नु परेको हो ।

लामो समयदेखि यसै पेसामा लागिराख्दा समाजमा महिलालाई हेर्ने दृष्टिकोणमा खासै फरक नआएको प्रियंकाको अनुभव छ । तर, आफूले महिला अधिकारसहित विभिन्न समाजका कुरीतिको विरोधमा जनचेतना फैलाउने उद्देश्यले निर्माण गरिएका नाटकहरू लिएर गाउँमा पस्दा त्यहाँका छोरीबुहारीमा देखिने उत्साह नै आफ्ना लागि ठूलो उपलब्धि भएको प्रियंका बताउँछिन् ।

महिला घरबाट निस्कने बित्तिकै उसको विषयमा नकारात्मक टिप्पणी गर्ने, उसको कामलाई मूल्यांकन नै नगरी उसको चरित्रलाई कोट्याइराख्ने समाजमा कलाकारदेखि निर्देशिका बन्दासम्मको यात्रा सहज नभएको प्रियंकाको अनुभूति छ । तर, आफ्नो कर्ममाथि सदैव विश्वास गर्ने उनले हिम्मत नहारी समाजले दिएका पीडालाई नै नाटकको विषयवस्तु बनाएर व्यंग्यसमेत गर्ने गरेकी छन् ।

हाल प्रियंकाले निर्देशन गरेको ‘परिवर्तन’ सडकनाटक लिएर उनी तराईका आठ जिल्लामा पुगिन् । उक्त सडक नाटकको सिरहा, सप्तरी, धनुषा र महोत्तरीमा ४० वटा सो मञ्चन हुनेछ । स्वास्थ्य, सरसफाइ लगायतका विषयमा जनचेतना फैलाउने उद्देश्यले निर्माण गरिएको नाटकको निर्देशन गर्ने मौका पहिलोपटक पाएकी प्रियंकाले केही महिनाअघि पूर्वका विभिन्न स्थानमा मञ्चन गरिएको ‘सखी’ नाटकबाट पनि निकै चर्चा पाएकी थिइन् ।

सयौं नाटक खेलिसकेकी प्रियंकाले हालसम्म चारवटा फिचर फिल्ममा समेत अभिनय कौशल देखाइसकेकी छन् । उनले नेपाली फिल्म ‘जात्रा’मा गरेको अभिनयबाट निकै प्रसंशा पाइन् । प्रियंकाले नेपालमात्र नभई भारत र विदेशमा समेत मैथिली नाटकहरू मञ्चन गरिसकेकी छन् ।