आरआरमा स्ववियु कार्यसमितिले पूर्णता पायो
काठमाडौः रत्नराज्य लक्ष्मी क्याम्पस( आरआर)को स्वतन्त्र विद्यार्थी युनियन (स्ववियु) कार्यसमितिले पूर्णता पाएको छ । चैत १५ गते सम्पन्न चुनावले प्रत्यक्ष सिटका अाधारमा प्रतिनिधि तय गरेपछि स्ववियुले पूर्णता पाएकाे हाे ।
२१ सदस्यीय कार्यसमितिमा प्रत्यक्ष निर्वाचनबाट अध्यक्ष, सचिव, कोषाध्यक्ष र ५० प्रतिशत सदस्य निर्वाचित भएका थिए भने समानुपातिकबाट उपाध्यक्ष, सहसचिव र ५० प्रतिशत प्राप्त मतको आधारमा निर्वाचित गर्ने व्यवस्था रहेको थियो ।
समानुपातिक निर्वाचनबाट प्राप्त मतको आधारमा सङ्गठनले कार्यसमिति मनोनीत हुने प्रतिनिधि पठाएपछि पूर्णता पाएको निर्वाचन समितिका सदस्यसचिव कृष्णप्रसाद ज्ञवालीले जानकारी दिए । उनले निर्वाचनमा सहभागी अनेरास्ववियु, नेपाल विद्यार्थी सङ्घ र संयुक्त प्यानलले समानुपातिकमा पाएको मतको आधारमा पदाधिकारी र सदस्य पठाएको बताए ।
प्रत्यक्षबाट ११ सदस्यीय र समानुपातिकबाट १० सदस्यीय चयन गर्ने व्यवस्था रहेको थियो । उनका अनुसार समानुपातिक मतको आधारमा अनेरास्ववियुले पाँच, नेपाल विद्यार्थी सङ्घले तीन, अनेरास्ववियु क्रान्तिकारी र संयुक्त प्यानलबाट एक÷एक जना स्ववियु कार्यसमितिमा आएका छन्।
‘अनेरास्ववियु क्रान्तिकारीबाहेक सबैले बन्दसूचीमा भएको नाम अनुसार समानुपातिकमा पाएको मतको आधारमा सदस्य पठाउनु भएको छ' उनले भने- ‘स्ववियुले पूर्णता पाएपछि आफ्ना गतिविधि सञ्चालन गर्न पाउँछ ।'
स्ववियु सभापति तपेन्द्रबहादुर शाहीले स्ववियु उपाध्यक्षमा श्रीकृष्ण उप्रेती र सहसचिवमा इन्द्रहाङ राईलाई चयन गरिएको जानकारी दिए ।
यसैबीच, सर्वोच्च अदालतले आरआरमा भएको निर्वाचन बदरको माग गरी दायर गरिएको रिटमा अन्तरिम आदेश दिन नपर्ने भएको जनाएको छ ।
मङ्गलबार न्यायाधीश दीपक जोशीको एकल इजलासले अन्तरिम आदेश दिन नपर्ने निर्णय गरेको हो । अनेरास्ववियु क्रान्तिकारीका धुर्वराज वाग्लेले चैत १५ गतेको स्ववियु निर्वाचन बदर गर्न माग गदै चैत १६ गते सर्वोच्च रिट दायर गरेका थिए । रासस
प्रतिक्रिया दिनुहोस !
