महासंघ निर्वाचनः सहमति प्रयास विफल

काठमाडौः नेपाल उद्योग वाणिज्य महासंघमा सर्वसम्मत नेतृत्व चयनका लागि गरिएको प्रयास विफल भएको छ । महासंघ अध्यक्ष पशुपति मुरारकाले बुधबार सर्वसम्मत नेतृत्वका लागि प्रयास गरेका थिए । वरिष्ठ उपाध्यक्षका प्रत्यासी शेखर गोल्छा र किशोर प्रधान प्यानलसहित चुनावी मैदानमा उत्रिएका छन् । उनले दुवै समूहलाई बोलाएर सहमति प्रयास गरेका थिए ।

महासंघ सचिवालयमा भएको छलफलमा गोल्छा र प्रधानसहित उपाध्यक्ष र केन्द्रीय सदस्यका उम्मेदवार सहभागी थिए । करिब १५ मिनेटसम्म चलेको छलफल सहमतिमा नपुगी टुंगिएको हो । प्रधानले सहमतिका लागि समय गुज्रिसकेको प्रतिक्रिया दिएका थिए । अन्तिम समयमा सहमति खोज्नु औचित्यहीन भएको उनको भनाइ छ ।

महासंघमा स्वतः अध्यक्ष बन्ने भवानी राणा एउटा पक्षको प्रचारमा हिँडेको भन्दै प्रधान समूह रुष्ट बनेको छ । छलफलमा प्रधानले अध्यक्ष मुरारकालाई एउटा पक्ष समाएर प्रचार गरिदिँदै हिँडेको आरोप लगाएका थिए । मुरारका र राणा बुटवल र काठमाडौंमा आयोजित गोल्छा प्यानलको चुनावी घोषणा सभामा सहभागी थिए । राणाले मंगलबार काठमाडौंमा गोल्छा नेतृत्वको प्यानल घोषणा गरेकी थिइन् ।

प्रधानले सहमतिका लागि धेरै ढिलो भएको बताएका छन् । एउटा पक्षलाई खुलेर भोट मागिरहेका अध्यक्ष मुरारकाले हामीलाई चुनावी मैदान छोड भन्न छलफलमा बोलाएको उनको आरोप छ । अध्यक्ष मुरारकाले मंगलबार प्रधानलाई फोन गरेर सहमतिको प्रयासका लागि छलफलमा आउन आग्रह गरेका थिए । महासंघको हितका लागि सहमत खोजेको मुरारकाको भनाइ छ ।

आचासंहिता मिचेको दाबी

महासंघका अध्यक्ष मुरारका र वरिष्ठ उपाध्यक्ष राणाले एउटा पक्षको प्रचार गरेकामा प्रधान समूहले आपत्ति जनाएको छ । राजधानीमा बुधबार पत्रकार सम्मेलन गरी वर्तमान अध्यक्ष र भावी अध्यक्षले निर्वाचन आचारसंहिता विपरीत आचरण देखाएको भन्दै प्रधान समूहले आपत्ति जनाएको हो ।

महासंघका जिम्मेवार पदाधिकारीले एउटा पक्षलाई ‘मेरो टिम' भन्दै भोट मागेर हिँड्नु संस्थाको विधान र आचारसंहिता विपरीत कार्य भएको प्रधान समूहले आरोप लगाएको छ । यस्तो कार्यले महासंघको गरिमा र मर्यादाउपर गम्भीर आँच पुर्‍याएको प्रधान समूहले बतायो ।

प्रधान समूहले मुरारका र राणाले गोल्छा समूहको पक्षमा भोट मागेर मतदातालाई प्रभावित पार्ने प्रयास गर्दै हिँडेको आरोप लगाएको छ । गोल्छा समूहको हकहित हुने गरी विभिन्न संस्थागत निर्णय एक पक्षीय ढंगबाट गरिएका, आचारसंहिता र संस्थाको विधान विपरित भएका कामप्रति गम्भीर ध्यानाकर्षण भएको भन्दै प्रधान समूहले आपत्ति जनाएको छ ।

 शेखर गोल्छा र किशोर प्रधान प्यानलसहित चुनावी मैदानमा उत्रिएका छन् । महासंघका अध्यक्ष पशुपति मुरारकाले दुवै समूहलाई बोलाएर सहमति प्रयास गरेका थिए ।

‘महासंघको निर्वाचनलाई स्वच्छ र सरल बनाउने उद्देश्य राखी गरिएको विधान संशोधनका प्रावधानलाई महासंघको नेतृत्वमा आफ्नो कब्जा जमाउने र आफ्नो नियन्त्रणमा चल्ने व्यक्तिलाई पुर्‍याउने वदनियतपूर्ण प्रयास गरिँदा महासंघको गरिमामा आँच पुग्ने र संस्था कमजोर हुनेछ', प्रधान समूहले जारी गरेको विज्ञप्तिमा भनिएको छ । डर, धाक, धम्की, लोभ लालचका जोडवलमा महासंघका सदस्यको मत आफूतिर तान्न प्रयत्न भइरहेको प्रधान समूहले दाबी गरेको छ ।

प्रधान समूहले महासंघको निर्वाचनमा वर्तमान अध्यक्ष र विधानत स्वतः बन्न लागेकी अध्यक्षले निर्वाचनमा एउटाको पक्षमा लाग्नु अमर्यादित, अशोभनिय र महासंघको आचारसंहिता विरुद्ध भएको दाबी गरेको छ ।‘वर्तमान तथा आगामी नेतृत्व सबैको साझा हुनुपर्ने हो कि होइन ? ' प्रधान समूहको प्रश्न छ, ‘एउटा पक्षलाई ‘मेरो गुट' भन्ने समूहको पराजयको अवस्थामा उहाँ (आगामी अध्यक्ष राणा) नेतृत्वको भविष्य कस्तो हुनेछ ? ' प्रधान समूहले महासंघको नेतृत्व उद्योगी÷व्यवसायीले निर्वाचन प्रक्रियाबाट चयन गर्ने कि वर्तमान नेतृत्वले मनोनयन गर्ने भन्ने प्रश्न उठाएको छ । महासंघको नेतृत्वले व्यवसायीको भावना, विद्यान, आचारसंहिताको पालना गर्ने कि नगर्ने ? भन्दै प्रधान समूहले मुरारका र राणाप्रति आधा दर्जन प्रश्न उठाएको छ ।