निमार्ण सम्पन्न गर्नुपर्ने समयमा २६ प्रतिशत मात्रै काम !

घोराहीः निर्माण सम्झौतामा तोकेको अवधि सकिँदासम्म पनि ठेकेदारको लापरबाहीले दाङको लमही–तुलसीपुर सडकखण्डको कटुवा खोलामा निर्माण सुरु भएको पुल पूरा हुन सकेको छैन । दुई वर्षअघि सुरु भएको पुल निर्माणको समय २०७३ असोस १० गतेसम्म थियो, त्यो पनि म्याद थप गरेर । तर, अहिलेसम्म पुलको काम २६ प्रतिशत मात्र भएको छ ।

पुल निर्माणका लागि विनियोजन गरिएको आधा रकम ठेकेदारले भुक्तानी लिइसकेको छ । मुख्य सडकको पुल समयमा निर्माण सम्पन्न नहुँदा स्थानीयले सास्ती भोग्नु परेको छ । तोकिएको समयमा निर्र्माण सम्पन्न नहुँदा आवतजावत गर्नसमेत समस्या छ । ४ करोड १० लाखको लागतमा निर्माण भइरहेको पुल अस्तब्यस्त छ । २ करोड रुपैयाँ ठेकेदारलाई भुक्तानीसमेत गरिसकिएको छ । पुल निर्माणको जिम्मा शंकरमाली निर्माण सेवाले लिएको छ । एक सय मिटर लामो पक्की पुल निमार्णका लागि अहिले दुईवटा पिलर उठाउने काम मात्रै भएको छ । निर्माणस्थल आसपासमा धुलोका कारण समस्या भएको स्थानीय रवि बुढाले बताए ।

सडक डिभिजन कार्यालय दाङले पुल निर्माणमा ताकेता गरे पनि निर्माणले गति लिन सकेको छैन । निमार्णको जिम्मा लिएको कम्पनीले पनि कामलाई तीव्रता दिन नसकेको स्वीकार गरेको छ । सडक कार्यालय दाङका इन्जिनियर शेखर योगीले निर्माणका लागि दबाब दिइएको र छिट्टै निमार्ण सुरु हुने बताए । उनले निर्माणमा ठेकेदारको लापरबाही भएको बताए । निर्माण कम्पनीका प्रतिनिधि पदमराज शर्माले यो वर्षाअघि जसरी पनि पुल निमार्ण सम्पन्न गर्ने बताए । उनले विभिन्न कारणले केही समय ढिला भएको स्वीकार गर्दै अब त्यस्तो नहुने बताए ।