ठेक्का लागेपछि मेडिकल कलेज बन्ने आशा बढ्यो

धनगढीः तीन सय शड्ढयाको अस्पताल भवन र तीनतले कलेज भवनको ठेक्का लागेपछि कैलालीको गेटामा निर्माण हुने भनिएको सहिद दशरथचन्द स्वास्थ्य विज्ञान प्रतिष्ठान (गेटा मेडिकल कलेज) बन्ने आशा पलाएको छ । कलेज भवन निर्माणका लागि लुम्बिनी-रमन-केएस जेभीले ५८ करोड १४ लाख रुपैयाँमा ठेक्का पाएको छ ।

तीन सय शड्ढयाको अस्पताल भवन भने एक अर्ब ३ करोड रुपैयाँमा शर्मा, राजेन्द्र, कुमार जेभीले ठेक्का पाएको छ । ‘एक महिनाबीचमै दुई ठूला ठेक्का लागेपछि मेडिकल बन्ने आशा पलाएको छ', गेटाका ८३ वर्षका पृथ्वीराज अवस्थीले भने । कलेज भवनको यसै मार्चदेखि निर्माण सुरु गरी दुई वर्षभित्र निर्माण सम्पन्न गर्ने समय तोकिएको छ । निर्माण कम्पनीले पनि सम्झौतामा तोकिएको समय अथवा मार्चदेखि निर्माण सुरु गरिसकेको जनाएको छ । ‘हामीले फिल्ड मोबिलाइजेसन गरिसकेका छौं, कच्चापदार्थ संकलनको काम पनि सुरु भइसकेको छ', कलेज भवनको ठेक्का पाएका निर्माण व्यवसायी भीमबहादुर पालले भने ।

तीनसय शड्ढयाको अस्पताल भवनको पनि यही माघ २८ गते टेन्डर खुलेकामा अहिले निर्माण कम्पनीका इन्जिनियर फिल्डको कामका लागि गेटा आएका छन् । ‘हामीले परियोजना निर्देशक सुनिल पौडेल र उपनिर्देशक किशोरराज पाण्डेलाई ‘साइड' हेर्न खटाएका छौं', अस्पताल भवनको ठेक्का पाएका कुमार निर्माण सेवाका सञ्चालक सुशील श्रेष्ठले भने । अस्पताल भवन निर्माण गर्न पनि मेडिकल कलेज प्रवद्र्धन समितिले दुई वर्षको म्याद दिएको छ ।

२०५६ सालमा कैलालीको गेटामा जगद्गुरु शंकराचार्य आयुर्विज्ञान प्रतिष्ठानबाट मेडिकल कलेजको पहल थालिएको हो । शंकराचार्यले सानो भवन मात्रै बनाएपछि त्यो काम अलपत्र थियो । त्यसको डेढ दशकपछि सरकारको लगानीमा सहिद दशरथचन्द स्वास्थ्य विज्ञान प्रतिष्ठानका नाममा मेडिकल कलेज बनाउने सरकारले निर्णय गरेको हो । २०६६ सालदेखि निर्माणका लागि बजेट विनियोजन हुन थाले पनि पाँच/छ वर्षसम्मको बजेट फ्रिज हुँदै आएको थियो । वातावरणीय प्रभाव मूल्याकंनमा भएको ढिलाइका कारण मेडिकल कलेज निर्माण आठ वर्ष ढिलाइ भएको हो ।

एकैपटक कलेज, अस्पताल र प्रशासनिक भवन निर्माण प्रक्रिया सुरु भएकाले निर्माणस्थलमा चहलपहल बढेको छ । यसले सुदूरपश्चिमबासी खुसी भएका छन् ।

मेडिकल कलेजका अन्य दुई ठेक्का पनि यसअघि नै भइसकेका छन् । वातावरण प्रभाव मूल्यांकन नभएकै बेला तीन वर्षअघि १३ करोड रुपैयाँमा प्रशासनिक भवनको ठेक्का पाएको रबिना कन्स्ट्रक्सनले पनि यसपालिदेखि काम सुरु गरेको छ । ‘हामीले साइड हेर्न इन्जिनियर खटाइसकेका छौं', रबिना कन्स्ट्रक्सनका सञ्चालक गोपालमान श्रेष्ठले भने ।

एकैपटक कलेज, अस्पताल र प्रशासनिक भवन निर्माण प्रक्रिया सुरु भएकाले निर्माणस्थलमा चहलपहल बढेको छ । यसले सुदूरपश्चिमबासी खुसी भएका छन् । सुदूरपश्चिमका सीमामा पर्ने सहरबाट ठूलो संख्यामा सर्वसाधारण उपचारका लागि भारत जाने गरेका छन् । मेडिकल बनेसँगै चिकित्सकको पढाइ र उपचार पाउनेमा यस क्षेत्रका बासिन्दा आशावादी छन् ।

मेडिकल कलेजको भोगाधिकारमा रहेको झन्डै ५१ बिगाहा क्षेत्रफलमा चार करोडको ठेक्कामा कच्ची सडक पनि निर्माण भइसकेको छ । ‘सडक निर्माणको काम अन्तिम चरणमा छ', सडक निर्माणको ठेक्का पाएका निर्माण व्यवसायी दिलबहादुर ओलीले भने ।

चालू आर्थिक वर्षमा सरकारले मेडिकल कलेज निर्माण गर्न ५५ करोड रुपैयाँ विनियोजन गरेको छ । ‘यसपालि आएको बजेटको काम हुन्छ नै', मेडिकल कलेजका निर्देशक हेमराज पुजाराले भने । मेडिकल कलेजको मुख्य सडकको पनि छिट्टै टेन्डर हुने तयारी रहेको उनले बताए ।