टेलिफोन टावर बनाउनेलाई भोट

जाजरकोटः साविकको रग्दा गाविस ४ रोलीका नरबहादुर ध्यार स्थानीय तहको पुनर्संरचनापछि नगरवासी भएका छन् । अहिले उनी त्रिवेणी नलगाड नगरपालिकाका स्थायी बासिन्दा हुन् तर उनको गाउँमा न बिजुली छ न त सञ्चार सुविधा नै । जाजरकोट–डोल्पा बाटोले गाउँलाई छोएको भए पनि नियमित र भरपर्दो यातायात सेवा सञ्चालनमा छैन ।

‘गाउँमा टेलिफोनको टावर नहुँदा फोनले काम गर्दैन । टेलिफोन गर्न चार घन्टा पैदल हिँडेर रुकुमको राडीबजार जानुपर्छ’, ध्यारले भने, ‘त्यसैले हाम्रो समस्या बुझ्ने र तत्काल टेलिफोनको टावर बनाउन पहल गरिदिने नेता र पार्टीलाई भोट दिन्छौं ।’

जिल्लाको त्रिवेणी नलगाड नगरपालिकाका रग्दा, रोली, चौखा गाउँमा न टेलिफोनले काम गर्छ न त आमसञ्चारका कुनै साधनले काम गर्छन् । पत्रपत्रिका र टेलिभिजनको त कुरै छोडौं, ती गाउँमा रेडियोसम्म सुनिँदैन । यी तीनवटा गाउँमा एफएम रेडियोको पहुँचसमेत छैन । चौखाका किशोर मल्लले भने, एनटीसी, स्काई र एनसेल कुनै पनि फोनले काम गर्दैनन् ।

फोन सुविधा नहुँदा ती गाउँका स्थानीय निकै मर्कामा छन् । सहर तथा विदेशमा रहेका आफन्तलाई सम्पर्क गर्नु परे एक कल फोन गर्न आतेजाते गरी ४ सय रुपैयाँ खर्चेर रुकुमको राडीबजार पुग्नुपर्ने बाध्यता छ । टावर निर्माणका लागि राजनीतिक दलका नेतादेखि सम्बन्धित निकायमा अनुरोध गर्दा पनि सुनुवाइ नभएको मल्लले बताए । उनले यसपटकको स्थानीय तहको निर्वाचनमा जसले हाम्रा माग सम्बोधन गर्छन् त्यसैलाई जिताउँछौ । जुन नेता र पार्टीले विश्वास दिलाउँछ पूरै गाउँलेले त्यही पार्टीलाई भोट हाल्ने निर्णय भएको उनले बताए ।

गत संविधानसभाको निर्वाचनमा कांग्रेस, एमाले, माओवादी केन्द्रलगायतका पार्टीका उम्मेदवारले यहाँको टेलिफोन समस्या समाधानका लागि टावर निर्माणमा आवश्यक पहल गर्ने प्रतिवद्धता गरेका थिए । ‘माओवादी केन्द्रबाट उम्मेदवार भएका शक्तिबहादुर बस्नेत गृहमन्त्रीसम्म भए तर उनले समेत फर्केर हेरेनन्’, रोलीकी माया रावतले भनिन् । चुनावपछि कुनै पनि नेता गाउँ गएका छैनन् ।

रग्दा गाउँमा ६०, रोली गाउँमा ९१ र चौखा गाउँमा स्वास्थ्यचौकी, विद्यालय, प्रहरीचौकी, खाद्य डिपोसहित ४५ घर छन् तर ती गाउँमा टेलिफोन र सञ्चारका कुनै पनि साधनले काम नगर्दा स्थानीय समस्यामा परेका छन् । आन्तरिक सञ्चारदेखि देशविदेशका खबरबाट वञ्चित हुनु परेको स्थानीयको गुनासो छ । ठूली भेरीको किनारमा रहेका ती गाउँको पाल्लोपट्टि रुकुम गोतामकोटको ठूलो पहाड पर्छ भने यतापट्टि रग्दाकै ठूलो पहाड छ ।

गाउँमा टेलिफोनको टावर नहुँदा फोनले काम गर्दैन । टेलिफोन गर्न चार घन्टा पैदल हिँडेर रुकुमको राडीबजार जानुपर्छ । त्यसैले हाम्रो समस्या बुझ्ने र तत्काल टेलिफोनको टावर बनाउन पहल गरिदिने नेता र पार्टीलाई भोट दिन्छौं । नरबहादुर ध्यार स्थानीय, त्रिवेणी नलगाड नगरपालिका

खाेंचमा भएकाले सञ्चारका कुनै पनि साधनले काम नगर्ने स्थानीयको भनाइ छ । जाजरकोट–डोल्पा सडकखण्डमा पर्ने सुन्दर ती गाउँमा सञ्चार सुविधाको विकास गर्न र विद्युत् सेवा विस्तार गर्न स्थानीयले माग गरेका छन् ।

केन्द्र दिनेलाई भोट

त्रिवेणी नलगाड नगरपालिका खगेनकोटका तिलकबहादुर खत्री नगरपालिकाको केन्द्र खगेनकोटको मनमईमा गराउने प्रतिबद्धता गराउने उम्मेदवारलाई भोट दिने बताउँछन् । मनमईनजिकै घर भएका खत्री कांग्रेसका पूर्वगाउँ कार्य समितिका सभापति हुन् । मनमईमा केन्द्र बनाउन पार्टीमै लबिङ गरे पनि सफल नभएपछि उनी पार्टीकै नेताप्रति आक्रोशित छन् ।

राजपत्रमा त्रिवेणी नलगाड नगरपालिकाको केन्द्र खगेनकोटको मनमईमा तोकिएको थियो । चैत १ गते सदरमुकाममा बसेको सर्वदलीय बैठकले राजपत्रमा प्रकाशित भएको ठाउँलाई परिवर्तन गरी पायक पर्ने भन्दै खगेनकोटकै दल्लीमा तोकेपछि खत्रीजस्तै मनमई, मैदे, खगनेकोट, रग्दा र भगवतीका स्थानीय आक्रोसित भएका हुन् । साविकका रग्दा, भगवती, खगेनकोट, लहँ र डाँडागाउँ गाविसको बीचमा मन्मै पर्ने भए पनि सर्वदलीय बैठकले दल्लीमा सारेपछि स्थानीय आफूलाई अनुकूल नपर्ने भन्दै आक्रोशित भएका हुन् ।

आक्रोशित स्थानीयले मनमई केन्द्र अस्वीकार गर्ने कुनै पनि पार्टीका उम्मेदवारलाई भोट नदिने चेतावनी दिएका छन् । माओवादी केन्द्रका स्थानीय नेतासमेत रहेका वुद्धि गुरुङले नगरको केन्द्रमा बदमासी गर्ने आफ्नै पार्टीका उम्मेदवारलाई पनि भोट नदिने दाबी गरे । मनमई केन्द्र बनाउन प्रतिबद्धता गर्ने जुनसुकै पार्टीको भए पनि भोट दिने उनले बताए । तर लहँ, डाँडागाउँ र दल्लीका स्थानीयले पायक पर्ने दल्ली भएकोले केन्द्र दल्लीमै हुनुपर्ने अडान लिएका छन् ।

विवादका कारण दुई ठाउँमा केन्द्र उद्घाटन गरिए पनि हाल कुनै पनि कर्मचारी कुनै पनि ठाउँमा गएका छैनन् । उक्त नगरपालिकाका कार्यकारी अधिकृत सुरेन्द्र सिंह केन्द्र विवादका कारण नगरपालिकामा गएका छैनन् ।