मतपेटिका केरुङ आइपुगे

विदुरः स्थानीय तहको निर्वाचनका लागि चीनबाट खरिद गरिएका मतपेटिका चीनको केरुङ आइपुगेका छन् । नेपाल-चीन प्रवेशका लागि हाल सञ्चालनमा रहेको एकमात्र रसुवागढी नाका हुँदै हजारौं थान मतपेटिका नेपाल भित्रिने निर्वाचन आयोगले जनाएको छ ।

चीनले २७ किलोमिटर दूरीको रसुवागढी-केरुङ सडकमार्गको बीचमा रहेको ठोङ्सालगायत स्थानमा पहिरो पन्छाउन लागेका कारण बिहीबारदेखि पुनः एक साताका लागि रसुवागढी नाका हुँदै आवतजावत पूर्ण रूपमा बन्द गरेको छ । पहिरोमा खसेका ठूला ढुंगा पन्छाउन विस्फोटक पदार्थको प्रयोग गर्नुपरेका कारण सुरक्षाका लागि आवतजावत बन्द गरिएको हो ।

निर्वाचन आयोगले नेपाली सप्लायर्समार्फत खरिद गरेको ३० हजार थान मतपेटिका चीनको केरुङ आइपुगेको रसुवा उद्योग वाणिज्य संघका अध्यक्ष कैसाङनुर्बु तामाङले जानकारी दिनुभयो । दर्जनौं ट्रकमा चीनको ग्वाङझाओबाट सिगात्से हुँदै चीनको केरुङ आइपुगेको उहाँले बताउनुभयो ।

स्थानीय चुनावका लागि चीनबाट खरिद गरिएका मतपेटिका रसुवागढीमा भन्सार प्रक्रिया मिलाउन दुई सातादेखि केरुङमै थन्किएको उहाँको भनाइ छ । रसुवागढी भन्सार र मतपेटिका सप्लायर्स कम्पनीबीच भन्सार छुटलगायत विषयमा मतभेद रहेका कारण मतपेटिका नेपाल भित्रिन नसकेको अध्यक्ष तामाङले बताउनुभयो । यस सम्बन्धमा वाणिज्य मन्त्रालयका टोलीसँग कुराकानी भइसकेको उहाँको भनाइ छ ।

मतपेटिका सप्लायर्स कम्पनीले एक प्रतिशत मात्र भन्सार तिर्ने दाबी गरिरहेको र रसुवागढी भन्सारले नियमअनुसार अन्य सामानसरह भन्सार तिर्नुपर्ने अडान लिएको छ । चीनको केरुङ आइपुगेका मतपेटिका सडक अवरुद्ध भएका कारण सरासर नेपाल भित्रिन नपाएका हुन् । भन्सार प्रक्रियाका सम्बन्धमा सम्बन्धित निकायबाट स्पष्ट धारणा आएपछि निष्कर्षमा पुगेर प्रक्रिया सुरु हुने रसुवागढी भन्सार प्रमुख केदार पनेरुले बताए ।

निर्वाचन आयोगले ३० हजार मतपेटिका चीनबाट खरिद गरी ल्याउन लागेको आयोगका प्रवक्ता सूर्यप्रसाद शर्माले जानकारी दिए । ‘सप्लायर्सलाई ठेक्कामा दिएका हौं', उहाँले भन्नुभयो, ‘वैशाख पहिलो साता सप्लायर्सले हामीलाई मतपेटिका बुझाइसक्नुपर्छ ।' केरुङ ल्याइएका मटपेटिका १० करोड रुपैयाँबराबरका छन् । एउटा मतपेटिकाको मूल्य तीन हजार तीन सय रुपैयाँ पर्ने आयोगले जनाएको छ । ‘स्थानीय तह निर्वाचनका लागि ८२ हजार थान मतपेटिका आवश्यक पर्छ', शर्माले भने, ‘६० हजार पुरानै छन् ।'

सात दिन नाका बन्द

रसुवागढी-केरुङ सडकखण्डमा पहिरो गएका कारण बिहीबारदेखि एक साताका लागि चीनले नाका बन्द गरेको छ । पहिरो पन्छाउने कार्य जोखिमपूर्ण रहेका कारण मान्छेको आवतजावत रोकेर नाका बन्द गरिएको बताइएको छ । चीनतर्फ मितेरी पुलको रेसुओपोर्ट-केरुङ सडकखण्ड पहिरोले ठोङ्सालगायतका ठाउँठाउँमा अवरुद्ध भएकाले सडक सफा गर्न एक साताको समय लाग्ने चिनियाँ सुरक्षा अधिकारीले रसुवागढीमा रहेका नेपाली सुरक्षाकर्मीलाई जानकारी गराएका छन् ।