समाजले स्वीकारेमात्र सेलिब्रेटी
पढाइसँगै मोडलिङमा क्रियाशील छिन् इटहरीकी शर्मिला ढकाल । सानै उमेरदेखि मोडलिङ र अभिनयमा रुचि राख्ने उनी विद्यालय एवं कलेजमा विभिन्न कलाकारको एक्टिङ गरेर साथीभाइलाई रमाइलो प्रदान गर्थिन् । उनको यही मोह र लगनशीलताले मोफसलमा रहेर पनि म्युजिक भिडियो एवं चलचित्रमा काम गर्ने मौका पाएकी छन् । इटहरीस्थित नमुना कलेजमा आमसञ्चार पत्रकारिता विषयमा स्नातक तेस्रो वर्षमा अध्ययनरत शर्मिला ५ फिट ५ इन्च अग्ली छन् ।
म्युजिक भिडियोमा मोडलिङसँगै निर्देशन पनि गर्न थालेकी छन् । हालैमात्र साजन राईको 'नरोएर रातोहरू' एवं चित्र राईको 'बिर्सिंदैन मायालु' बोलको गीतको भिडियोमा मोडलिङ गरेकी छन् । बिर्सिंदैन मायालु बोलको भिडियो शर्मिलाले निर्देशन गरेकी हुन् । यी दुई म्युजिक भिडियोलगत्तै उनले 'लिभिङ टुगेदर' नामक लघुचलचित्रको मुख्य नायिकाका रूपमा अभिनय गरेकी छन । इटहरीमा क्रियाशीलमध्ये रोजाइमा पर्ने मोडल हुन् उनी । अहिले विभिन्न म्युजिक भिडियोका लागि कुरा आइरहे पनि स्नातक तेस्रो वर्षको परीक्षाको तयारीका कारण चाहेर पनि काम गर्न नसकेको उनको भनाइ छ । परीक्षापछि पुनः यस क्षेत्रमा क्रियाशील हुने उनको योजना छ ।
मोफसलमा रहेर मोडलिङ एवं अभिनयबाट अघि बढ्न सजिलो छैन तापनि शर्मिलाले आँट गरेकी छन् । यो क्षेत्रमा लागेर पहिचान पनि बनेको छ । जसका कारण उनलाई प्रेमप्रस्ताव राख्ने युवाहरूको जमात पनि ठूलै छ । 'आई लभ यू भन्नेलाई धन्यवादभन्दा बढी के भन्नु र', उनी ठट्ठा गर्छिन् । माया गर्छु भन्नेहरू धेरै भए पनि मन मिल्ने, आफूले चाहेजस्तो असल जीवनसाथीको खोजीमा रहेको उनले खुलासा गरिन् । 'अहिलेको समयमा बाबुआमाले रोजेकोभन्दा आफैंले मन पराएको जीवनसाथी राम्रो हुन्छ', उनले भनिन् । आफ्नो सपना पूरा भएपछि, आफ्नो खुट्टामा उभिएपछि मात्र विवाह गर्ने उनको सोच छ । आफूले प्रेमविवाह गरे पनि बुवाआमालाई सोधेरमात्रै विवाह गर्ने पक्षमा छिन् उनी ।
मोडलिङ क्षेत्रमा होस् वा अभिनय ग्ल्यामर्स छवि आवश्यक भए पनि अंग प्रदर्शनको पक्षमा उनी छैनन् । यस क्षेत्रमा आउने कलाकार छोटो समयमा आफूलाई चर्चित बनाउन कतिपयले अंग प्रदर्शनको सहारा लिएको प्रति लक्षित गर्दै उनले भनिन्, 'त्यो सही बाटो होइन ।' समाजले स्वीकारेमात्रै सेलिब्रेटीको अर्थ र महत्व हुने भएकाले आफू असल र सफल नारी भएर समाजमा स्थापित हुन चाहेको बताइन् ।
प्रतिक्रिया दिनुहोस !
