एकसिंगे गैंडा मारियो

भरतपुर : चितवनमा चोरी सिकारीका कारण गतराति दुर्लभ एकसिंगे गैंडा मारिएको छ । जगतपुरको बेलटट्टा हरियाली सामुदायिक वन क्षेत्रस्थित राप्ती नदी बगरमा सिकारीले कञ्चटमा गोली हानेर गैंडा मारेका हुन् । उनीहरूले खाग र पुच्छर लगेका छन् ।

चितवन राष्ट्रिय निकुञ्जमा चोरी-सिकार नभएको झण्डै तीन वर्षपछि गैंडा मारिएको हो । पर्यटकलाई जंगल घुमाउन लैजाँदा होटलका नेचर गाइडले मृत गैंडा देखेपछि निकुञ्जमा खबर गरेका थिए । गोली हानेको र खाग काटेको प्रकृति हेर्दा पेशेवर सिकारीले गैंडा मारेको हुनसक्ने निकुञ्जका प्रमुख संरक्षण अधिकृत रामचन्द्र कँडेलले बताउनुभयो ।

मारिएको गैंडालाई पोस्र्टमाटम गरी खाल्डोमा गाडिएको छ । निकुञ्जका कर्मचारी र सुरक्षाकर्मी गैंडा स्थानान्तरणमा व्यस्त भएको मौका छोपी गैंडा मारिएको कँडेलले जानकारी दिनुभयो ।अनुसन्धानका लागि सीआईबीको टोली शनिबार चितवन आएको छ । टोलीले सेनाको कुकुरसमेतको सहायताले सिकारीको खोजी गरिरहेको छ । तस्कर पत्ता लगाउन सुराकीसमेत प्रयोग गरिएको निकुञ्जको सुरक्षार्थ खटिएको श्रीजंग गणका गणपति माधव थापाले बताउनुभयो ।

गत सोमबारदेखि चितवनबाट शुक्लाफाँटा र बर्दिया राष्ट्रिय निकुञ्जमा गैंडा स्थानान्तरणको काम भइरहेको छ । शुक्लामा चार र बर्दियामा एक गैंडा लगिसकिएको छ । यसअघि ७१ साल वैशाख १९ गते सिकारीले सोही क्षेत्रमा गोली हानी एक भाले गैंडा मारेर खाग लगेका थिए । पछिल्लो गणनाअनुसार नेपालमा भएका ६ सय पैंतालीस गैंडामध्ये चितवन निकुञ्जमा मात्र ६ सय पाँच थिए ।