साहित्यकार विजय हितानका दुई पुस्तक सार्वजनिक

काठमाडौं : ब्रिटिस गोरखाबाट सेवानिवृत्त कवि तथा साहित्यकार विजय हितानका दुईवटा पुस्तक सार्वजनिक भएको छ । आइतबार कान्तिपथस्थित उपराष्ट्रपति भवनमा आयोजित एक कार्यक्रमबीच हितानद्वारा लिखित 'बाग्मती ब्लुज' नामक कवितासंग्रह र विभिन्न पत्रपत्रिकामा प्रकाशित लेखहरुको संगालो रहेको 'इको उत्सर्जन' निबन्धसंग्रह उपराष्ट्रपति नन्दबहादुर पुनले सार्वजनिक गर्नु भएको छ । वातावरण साहित्य र संरक्षणमा जोड दिँदै आएका कवि हितानले आफ्ना कृतिमा पर्यावरणसम्बन्धी धेरै सिर्जना समेटेका छन् ।

यसअघि पनि हितानले विछोडअघिको रात (कवितासंग्रह, थकित पृथ्वी (कथासंग्रह) सार्वजनिक गरिसक्नु भएको छ त्यसैगरी जयबहादुर हितान व्यक्तित्व र कृतित्व पुस्तकको सम्पादन समेत गर्नु भएको छ । हाल बेलायतको केन्टमा बस्दै आउनु भएका हितानको रचनामा बढी प्रकृतिप्रेम भेटिने भएकाले उहाँ अलग धारका बगेका स्रष्टाको रुपमा समेत परिचित हुँदै जानु भएको छ ।

कार्यक्रममा प्रमुख अतिथी उपराष्ट्रपति नन्दबहादुर पुनले मगर, नेवार, तामाङ लगायत आदिवासी जनजातिको भाषा, संस्कृति संकटमा रहेको भन्दै त्यसको संरक्षण गर्ने दायित्व स्रष्टाहरुको रहेको बताउनु भयो । उहाँले भन्नुभयो 'हाम्रो भाषा, संस्कृति रहेन भने हाम्रो अस्तित्व पनि रहँदैन, त्यसको संरक्षण गर्न कवि तथा साहित्यकारहरुले कलम चलाउनुपर्छ ।' पुनले शान्ति सम्झौतापछि सबै भाषा, संस्कृतिबारे खुला रुपमा बहस र छलफल गर्ने मौका मिलेको भन्दै यसबाट भाषा फल्ने, फुल्ने विश्वास व्यक्त गर्नुभयो ।

जितबहादुर सिन्जाली मगर प्रतिष्ठानद्वारा आयोजित कार्यक्रममा पूर्वमन्त्री मालबरसिंह (एमएस) थापासहित तीनलाई पुरस्कृत गरिएको थियो । नगद २० हजार रुपैयाँसहित पूर्वमन्त्री थापा जयबहादुर हितान मगर स्मृति पुरस्कार २०७२, ५५ हजार राशिसहित जीबसीम साहित्य पुरस्कारबाट प्रेमप्रकाश मायालु र १० हजार पुरस्कार राशिको जीबसीम नवप्रतिभा साहित्य पुरस्कार २०७२ बाट हेमा मगर पुरस्कृत भइन् । उनीहरुलाई उपराष्ट्रपति पुनले प्रमाणपत्र र नगदसहित सम्मान गर्नु भएको थियो ।