बारामा बोराभित्र पुरुषको शव भेटियो
सिमराः बारामा एक व्यक्तिकाे शव फेला परेकाे छ महागढीमाई नगरपालिका–२ स्थित लक्ष्मनवा र मैनी गाउँकोबीच बाटोमा मंगलवार बिहान अन्दाजी ५५ वर्षीय पुरुषको शव फेला परेको हो। सडकको छेउमै शव राखेको अवस्थामा बिहान स्थानीयले देखेपछि प्रहरीलाई खबर गरेका थिए।
धारिलो हतियारले टाउँको र अनुहार काटेर हत्या गरी बोराभित्र राखेर सडककोबीचमै फालेको अवस्थामा शव भेटिएको जिल्ला प्रहरी कार्यलयका प्रहरी निरीक्षक अरुण कुशवाहाले जानकारी दिनुभयो। प्लाष्टिकमा बेरेर बोराभित्र शव हालिएको र वरपर रगत देखिएको कुशवाहाले बताउनुभयो।
मारिएका व्यक्तिको पहिचान भने हुन सकेको छैन। शव पोष्टमार्टमका लागि जिल्ला अस्पतालमा पठाइएको छ। कुशवाहाका अनुसार रगत आलो देखिएकाले घटना बिहानको समयमा भएको हो। प्रहरीले घटनाबारे अनुसन्धान सुरु गरेको कुशवाहाले जानकारी दिनुभयो।
यसअघि चैत्र १३ गते प्रसौनी–८ नौतन नजिकैको सिङ्याही खोलाबाट एक महिलाको शव बोराभित्र राखेर फालिएको अवस्थामा फेला परेको थियो।
प्रतिक्रिया दिनुहोस !
