मेलानिया ट्रम्पलाई यौनकर्मी आरोप लगाउने डेली मेललाई जरिवाना

न्युयोर्कः अमेरिकी प्रथम महिला मेलानिया ट्रम्पलाई यौनकर्मी आरोप लगाएको बेलायती पत्रिका ‘डेली मेल'ले जरिवाना तिर्ने भएको छ । मेलानियाले डेली मेलले गल्ती स्वीकार गरेको हुनाले माफी दिने बताएकी छिन् । डेली मेलले मेलानियाको मोडलिङका बारेमा लेख प्रकाशित गरेको थियो । उसले मेलानियाले कुनै बेला यौनव्यवसायी भएको आरोप लगाएको थियो । उक्त लेखको विरोध भएपछि उसले आफ्नो लेख हटाएको थियो । डेली मेल हाल अनलाइन मात्रै प्रकाशन हुन्छ । गत वर्ष अमेरिकी राष्ट्रपतीय निर्वाचनका बेला उनले वेश्यावृत्ति गर्ने गरेको भन्दै छापिएको थियो ।

लन्डन उच्च अदालतमा सुनुवाइका क्रममा पत्रिकाका तर्फबाट मागिएको माफी उनले स्वीकार गरेकी थिइन् । यसैगरी जरिवाना रकम पनि उनले कम गरिदिएकी थिइन् । फेब्रुअरीमा उनले डेली मेलविरुद्ध मुद्दा दायर गर्दा १५ करोड अमेरिकी डलर क्षतिपूर्ति माग गरेकी थिइन् । रोयटर्सका अनुसार हाल पत्रिकाले माफी मागेको हुनाले लचिलो बन्दै ३० लाख डलरमा उनले मानेकी छन् ।

४६ वर्षीया मेलानियाको जन्म युरोपीय मुलुक स्लोभानियामा भएको थियो । सन् १९९० मा मोडलिङ गर्न उनी अमेरिका आएकी थिइन् । सन् २००५ मा डोनाल्ड ट्रम्पसँग उनको विवाह भएको थियो । अमेरिकी राष्ट्रपतीय निर्वाचनका बेला सञ्चारमाध्यमले मेलानियाको निकै आलोचना गरेका थिए । ट्रम्प अमेरिकी राष्ट्रपति भएमा यौनव्यवसायी अमेरिकी प्रथम महिला हुने भन्दै व्यंग्य गरेका थिए । ट्रम्पको विजयपछि पनि सार्वजनिक सञ्चारमाध्यममा मेलानियामाथि आपत्तिजनक टिप्पणी गरिएका थिए ।