दलाई लामाको यात्राबाट सम्बन्ध बिग्रने चीनकाे चेतावनी
बेइजिङः बौद्ध धर्मगुरु दलाई लामाको भारतको अरुणाचल भ्रमणलाई लिएर चीनले बुधवार भारतसँगको सम्बन्ध बिग्रने सक्ने चेतावनी दिएको छ । चिनियाँ विदेश मन्त्रालयका प्रवक्ता लुई काङले दलाई लामाको भ्रमणबाट दुई देशबीचको सीमा विवाद सुल्झाउन अप्ठेरो हुने बताएका छन् । भारतले तिब्बत मामिलामा प्रतिबद्धता तोडेको आरोप पनि लगाएको छ । काङले चीनले आफ्नो सीमा रक्षा गर्न जस्तोसुकै करबाही गर्ने स्पष्ट पारे ।
दलाई लामा र अरुणाचल प्रदेशका मुख्यमन्त्री पेमा खाण्डुको भाषण पनि भड्काउपूर्ण भएको भन्दै उनले निन्दा गरे । खाण्डुले अरुणाचलको सिमाना चीनसँग नभई तिब्बतसँग मात्र जोडिने बताएका थिए । चीनले विरोध गर्दागदै पनि भारतले दलाई लामाको यात्रा व्यवस्था गरेको जानकारी दिएका थिए ।
चिनियाँ प्रवक्ताले खाण्डुको नाम नलिई केही भारतीय अधिकारीले उत्तेजक वक्तव्य दिएको भन्दै विरोध गरेका थिए । काङले भने, ‘१४औं दलाई लामाको गतिविधिले सीमा नाघेको छ ।’ दलाई लामाले भने आफ्नो यात्रा विशुद्ध धार्मिक भएको बताएका छन् । उनले आफ्नो यात्रालाई राजनीतिक विवादको विषय नबनाउन आग्रह गरेका छन् । काङका अनुसार भारतले एक चीन नीतिको पालना नगरी तिब्बतको समस्या बल्झाउन खोजेको आरोप लगाए । भारतको यस्तो गतिविधि चीनलाई सह्य नहुने उनको भनाइ थियो ।
चीनले यो महिना मात्रै तीनपटकभन्दा बढी भारतको विरोध गरिसकेको छ । चीनले अरुणाचलको तवाङ तिब्बतको दक्षिणी भाग भएकाले यो आफ्नो भूभाग भएको दाबी गर्दै आएको छ भने भारतले एक्त क्षेत्र आफ्नो भएको दाबी गर्छ ।
प्रतिक्रिया दिनुहोस !
