महिला उम्मेदवार खोज्दै दल
हेटौंडाः स्थानीय तह निर्वाचनमा प्रमुख र उपप्रमुखमध्ये एक महिला उम्मेदवार अनिवार्य बनाउनुपर्ने प्रावधानका कारण कतिपय राजनीतिक दललाई उपयुक्त महिला उम्मेदवार खोज्न मुश्लिक परेको छ । धेरैजसो महिला उम्मेदवारको चर्चा उपप्रमुखमा मात्रै छ ।
स्थानीय निर्वाचनमा मकवानपुरका आठवटा गाउँपालिका, एक नगरपालिका र एक उपमहानगरपालिकाकामा केही दलले आफ्ना प्रमुख र उपप्रमुखको उम्मेदवारी घोषणा गरिसकेका छन् भने अन्य दलहरूले केही दिनमा नै उम्मेदवार घोषणा गर्ने जनाएका छन् । प्रायः राजनीतिक दलमा हालसम्म महिला उम्मेदवारको चर्चा भने उपमा मात्र सीमित छ ।
नेपाली कांग्रेसभित्र मेयर र गाउँपालिका अध्यक्षमा महिलाको नाम चर्चामा समेत छैन । हेटौंडा उपमहानगरपालिकाको मेयरमा नेताहरू आनन्दराम पराजुली, प्रदीप कोइराला, अशोक शाक्य, तारानाथ चौलागार्इंको नाम चर्चामा छ । उपमेयरमा भने प्रसस्तै महिला आकांक्षी देखिएका छन् । नेत्रीहरू लक्ष्मी श्रेष्ठ, इन्दिरा न्यौपाने, राधा कोइराला, पवित्रा विश्वकर्मा, लक्ष्मी थिङ, तारा कार्कीलागायतको चर्चा छ ।
थाहा नगरपालिकामा हालसम्म कांग्रेसभित्र महिला आकांक्षी देखिएका छैनन् । थाहाको मेयरमा खड्क गोपाली, भरत लामा, ईश्वरनाथ पौडेल, योगेन्द्रमान श्रेष्ठले दाबी गरेको कांग्रेस मकवानपुरले जनाएको छ ।
मकवानपुरका आठवटा गाउँपालिका, एक नगरपालिका र एक उपमहानगरपालिकाकामा केही दलले आफ्ना प्रमुख र उपप्रमुखको उम्मेदवारी घोषणा गरिसकेका छन् भने बाँकी दलहरूले केही दिनमा नै घोषणा गर्ने जनाएका छन् । प्रायः राजनीतिक दलमा हालसम्म महिला उम्मेदवारको चर्चा भने उपमा मात्र सीमित छ ।
आठ गाउँपालिकाको अध्यक्षमा दाबी गर्नेमा सबै पुरुष रहेका कांग्रेस मकवानपुरका प्रवक्ता प्रदीप कोइरालाले बताए । ‘अध्यक्षमा पुरुषकै चर्चा छ, उपाध्यक्षमा ककसलाई उठाउने भन्नेबारे तयारी भइरहेको छ', उहाँले भन्नुभयो । ६ गतेभित्र नगर र गाउँपालिकका उम्मेदवार टुंगो लगाएर केन्द्रमा पठाइने कोइरालाले जानकारी दिनुभयो ।
२०७० सालको निर्वाचनमा मकवानपुरका तीनवटा निर्वाचन क्षेत्रमा जित हात पारेको एमालेभित्र भने मेयरमा महिलाको पनि चर्चा छ । हेटौंडा उपमहानगरपालिकाको मेयरमा एमाले जिल्ला अध्यक्ष मुनु सिग्देलसँगै नेताहरू हरिबहादुर महत, गोपाल श्रेष्ठ, श्रीधर पोखर, एकलाल श्रेष्ठलगायतको चर्चा छ भने उपमेयरमा फुर्वा लामा, मीना लामालगायतको चर्चा छ ।
थाहा नगरपालिकासहित आठै गाउँपालिकामा पनि अध्यक्षका आकांक्षी पुरुष मात्रै रहेको एमाले मकवानपुरकी अध्यक्ष मुनु सिग्देलले बताउनुभयो । ‘अरू पार्टीमाजस्तो महिला उम्मेदवार खोज्दै हिँड्नुपर्ने अवस्था नै त छैन', उनले भनिन्, ‘तर प्रायः गाउँपालिकाको अध्यक्ष दाबी गर्नेहरूमा पुरुष नै हुनुहुन्छ ।' वैशाख ६ गतेभित्र सबै उम्मेदवार टुंगो लगाएर प्रदेशमा सिफारिस गरिने सिग्देलले जानकारी दिनुभयो ।
सरकारको नेतृत्व गरिरहेको दल नेकपा माओवादी केन्द्रभित्र पनि मेयर र अध्यक्षमा महिलाको चर्चा छैन । माओवादीले हेटौंडा उपमहानगरपालिकाको मेयरमा बलराम बल र उपमेयरमा कमला पौडेललाई उम्मेदवार बनाएको छ । अन्य नगर र गाउँहरूमा भने उम्मेदवार टुंगो लगाउने क्रममा रहेको माओवादी केन्द्र मकवानपुरका सञ्चार विभाग प्रमुख कमानसिं पाख्रिनले बताउनुभयो ।
राप्रपाभित्र प्रमुख पदमा महिलाको चर्चा छैन । हेटौंडा उपमहानगरपालिकाको मेयरमा मधु अधिकारी, दीपक सिंह र गणेश थापाको चर्चा छ । उपमेयरमा महिला उम्मेदवारको खोजी भइरहेको राप्रपाले जनाएको छ । अन्य नगर र गाउँपालिकाहरूमा पनि नेतृत्वमा महिलाको दाबी नरहेको राप्रपा जिल्ला अध्यक्ष रामहरि न्यौपानेले बताउनुभयो ।
नयाँ शक्ति पार्टीभित्र पनि मेयर र अध्यक्षमा सबै पुरुष आकांक्षी देखिएका छन् । हेटौंडा उपमहानगरपालिकाको मेयरमा राजेन्द्र सिम्खडा, राजन मैलानी र सुरेन्द्र भट्टराईको चर्चा छ । नेकपा मालेले जिल्ला सचिव भीमसेन महतलाई मेयरको उम्मेदवार बनाएको छ ।
प्रतिक्रिया दिनुहोस !
