प्रमुखभन्दा उपप्रमुखमा महिला आकांक्षी बढी

सन्धिखर्कः जिल्लामा चुनावी माहोल तात्दै जाँदा सम्भावित उम्मेदवारको चर्चा सुरु भएको छ । अर्घाखाँचीका तीन गाउँपालिका र तीन नगरपालिकामा मुख्यतः कांग्रेस एमालेकै प्रतिस्पर्धा हुनेछ । कुनैकुनै ठाउँमा नेकपा माओवादी केन्द्र बलियो छ ।

अहिलेको स्थानीय तहको निर्वाचनमा प्रमुख र उपप्रमुख पदमध्ये एकजना महिला अनिवार्य उठाउनुपर्ने भएपछि महिला उम्मेदवार बनाउन पार्टीमा लबिङ सुरु भएको छ । गाउँपालिका र नगरपालिकाको प्रमुखभन्दा पनि उपप्रमुखमा महिला बढी आकांक्षी देखिएका छन् । स्थानीय निर्वाचनका लागि दलबाट टिकट पाउन नेताहरू दौडधुपमा छन् ।

अर्घाखाँचीमा जनसंख्याको हिसाबले सन्धिखर्क ठूलो नगरपालिका हो । यो नगरपालिकामा कांग्रेसका तर्फबाट मेयरमा कमलप्रसाद भुसाल, हरिबहादुर खड्का, नामलाल श्रेष्ठ, रिसब अधिकारीको नाम चर्चामा छ । उपमेयरमा राधा आचार्य, शान्ता भण्डारी, कमला आचार्य, लक्ष्मी श्रेष्ठ र सीता भुसाल सबै महिलाको नाम चर्चामा छ ।
एमालेबाट मेयरमा कृष्णप्रसाद श्रेष्ठ, खुबीराम आचार्य, सिद्धिप्रसाद भुसाल, भरत पौडेल, शम्भु पोख्रेल र श्रीकृष्ण भुसालको नाम चर्चामा छ । उपमेरमा ईश्वरा पोख्रेल, बिजुला रायमाझी, मि श्रा आचार्य र सुशीला गैरेको नाम चर्चामा छ ।

नेकपा माओवादी केन्द्रबाट ठाकुर विक, रामबहादुर रायमाझी र केबी भुसाल उम्मेदवार हुने चर्चा छ । उपमेयरमा महिलाहरू कमला भुसाल, राधा नेपाली र इन्दिरा हमालको नाम चर्चामा छ । राष्ट्रिय जनमोर्चाले मेयर र उपमेयरका लागि कल्पना पोख्रेल र पशुपति ढकाललाई उम्मेदवार तोकेको छ । २०७० सालको परिणामअनुसार सन्धिखर्क नगरपालिकामा कांग्रेसका मतदाता बढी छन् । कांग्रेस, एमाले र माओवादी छुट्टाछुट्टै लडेमा कांग्रेसको जित हुने सम्भावना छ तर यी तीनबीचमा कांग्रेस र माओवादी वा एमाले र माओवादीको तालमेल हुनसक्ने चर्चा चलेको छ ।

जिल्लाको अर्को शीतगंगा नगरपालिका हो । यहाँ कांग्रेसका तर्फबाट सूर्य अधिकारी, छविलाल पौडेल र माधव पौडेले मुख्य दाबेदारका रूपमा देखा पर्नुभएको छ । उपमेयरका लागि माया अर्याल, मीना पाण्डे, मेनुका भटराई र पवित्रादेवी बेलवासेको नाम चर्चामा छ । त्यस्तै वसन्त श्रेष्ठ र पीताम्बर सारु चाहिँ एमालेको तर्फबाट मेयर उम्मेदवारको रूपमा देखापर्नु भएको छ । उपमेयरमा गीता भाटको नाम चर्चामा छ । माओवादीबाट ओपी पाण्डे, टीका रेस्मी र रीता खड्काको नाम चर्चामा छ ।अघिल्ला निर्वाचनको मत परिमाण हेर्दा शीतगंगा नगरपालिकामा कांग्रेस बलियो छ । यो नगरपालिकामा कांग्रेस र एमालेकै प्रतिस्पर्धा हुनेछ ।

जिल्लाको अर्को नगरपालिका भूमिकास्थान हो । यहाँ कांग्रेसबाट प्रेम बेलवासे चिरञ्जीवी पौडेल, षडानन्द बेलबासे र धनीश्वर खनालको नाम चर्चामा छ । उपको लागि संगीता बेलबासे, चन्द्रा गैरे, सकुन्तला खत्री, रेमकला खत्री र वसन्ता पौडेलको नाम चर्चामा छ । एमालेबाट पीताम्बर भुसाल, प्रेम गैरे र मणि पौडेलको नाम चर्चामा छ । उपको लागि पवित्रा पौडेल, सुनिता बेलवासे र पुष्पा भाटको चर्चा छ । माओवादीबाट छमकुमारी खनाल, रेशम थापा र बालकृष्ण बन्जाडेको चर्चा गरिँदैछ । त्यस्तै राष्ट्रिय जनमोर्चाले मेयरमा कविराम खनाल र उपमेयरमा शकुन्तला रानालाई उम्मेदवार बनाएको छ । अघिल्ला निर्वाचनको मतअनुसार यो नगरपालिकामा एमाले बलियो शक्ति मानिन्छ । तर एमाले, कांग्रेस, माओवादी र राष्ट्रिय जनमोचा चार पार्टीकै प्रतिस्प्रधा हुनेछ ।

पाणिनि गाउँपालिका प्रमुखमा कांग्रेसबाट इन्द्रमणि पौडेल, अच्युत गौतम, श्यामनाथ कास्यप, यादव घिमिरे र रामप्रसाद घिमिरे आकांक्षी छन् । उपप्रमुखका लागि अम्विका पोख्रेल, गीता घिमिरे र पार्वता घिमिरेको चर्चा छ । एमालेबाट रामजी घिमिरे र जीवनारायण कोइरालाको नाम चर्चामा छ । उपको लागि लक्ष्मी गौतमको नाम चलेको छ । छत्रदेव गाउँपालिकाको प्रमुखका लागि कांग्रेसबाट मात्र १२ जना आकांक्षी देखिएका छन् । उनीहरूले गाउँपालिकाको कांग्रेस बैठकमा उम्मेदवारी दाबी गरेका छन् जसमा युवाको संख्या बढी छ ।

एमालेबाट प्रमुखमा ऋषिराम अधिकारी, ध्रुव पाण्डेलगायतका नेताको नाम चर्चामा छ । उपप्रमुखका लागि विष्णुमाया उपेक्षितको नाम चर्चामा छ । मालारानी गाउँपालिकामा कांग्रेसबाट प्रमुखमा कृष्ण खनाल र निर्मला क्षेत्रीको नाम चर्चामा छ । उपप्रमुखमा शान्ता खनाल, कमला भुसाल, दीपा रेग्मी र चुमकला विकको नाम चर्चामा छ ।

एमालेबाट प्रमुखमा पीताम्बर भुसाल, दलबहादुर भट्टराई, बालकृष्ण आचार्य र रामबहादुर चौहानको नाम चर्चामा छ । उपप्रमुखका लागि प्रमिला क्षेत्री, पुतला खनाल र दीपा पोख्रेलको नाम र्चामा छ । माओवादीवाट पदम क्षेत्री र मानबहादुर पाण्डेको नाम चर्चामा छ । दुई नगरपालिकामा कांग्रेसलाई बलियो मानिएको भए पनि २०७० सालको निर्वाचनमा माओवादी र एमालेका उम्मेदवार विजयी भएका थिए । माओवादीका टोपबहादुर रायमाझी र एमालेका दुमनसिंह थापा विजयी भएका हुन् । अर्घाखाँचीमा एक लाख ३२ हजार चार सय २१ मतदाता छन् ।