सल्लाहकार परिषद्मा अधिकारी नियुक्त
काठमाडौंः नेकपा (एमाले) केन्द्रीय सल्लाहकार परिषद्को पाँचौं पूर्ण बैठकले रिक्त पदमा मनोनयन गरेको छ । बैठकले केन्द्रीय सल्लाहकार परिषद्को उपाध्यक्षमा खगराज अधिकारी र सचिवमा राजेन्द्र गौतमलाई सर्वसम्मतिले मनोनयन गरेको हो ।
बैठकले मुलुकको समसामयिक परिस्थितिको ठोस विश्लेषण गर्दै पार्टीले अगाडि सार्नुपर्ने प्रमुख कार्यभारका बारेमा, स्थानीय निर्वाचन र त्यसको व्यवस्थापनका सम्बन्धमा र पार्टीले निकाल्ने केन्द्रीय घोषणापत्रमा समावेश गर्नुपर्ने विषयमा सुझाव दिने निर्णय भएको परिषद्का अध्यक्ष केशवप्रसाद बडालले बताउनुभयो ।
स्थानीय तहहरु (गाउँपालिका, नगरपालिका, उपमहानगरपालिका, महानगरपालिका) ले अनिवार्य आ–आफ्ना स्थानीय घोषणापत्र (प्रतिबद्धता) जारी गर्दै पार्टीलाई आन्तरिक रुपमा सुदृढ र एकतावद्ध बनाएर निर्वाचनमा जाने, स्थानीय तहको निर्वाचनमा पार्टीलाई पहिलो पार्टीका रुपमा स्थापित गर्ने भूमिका खेल्ने बैठकले निर्णय गरेको बडालले बताउनुभयो ।
परिषद्का अध्यक्ष एवम् स्थायी समितिका सदस्य केशवप्रसाद बडालको अध्यक्षता एवम् पार्टी कार्य वाहक अध्यक्ष ड वामदेव गौतमको प्रमुख आतिथ्यमा बिहीबार पार्टी कार्यालय धुम्बाराहीमा बैठक बसेको थियो ।
प्रतिक्रिया दिनुहोस !
