वर्ष गुञ्जाएका गीत

मेलम्चीको पानी काठमाडौंमा आउने सपना धेरैले देखेका थिए । त्यसैगरी पूर्व-पश्चिम रेल गुडे त्यसमा चढेर सररर यात्रा गर्ने चाहना पनि धेरैमा छ । कुरामात्र चलेका यी प्रसंगलाई समेटेर तयार पारिएको गीत पूर्वपश्चिम रेल बोलको गीतले गायक एवं संगीतकार राजनराज शिवाकोटीलाई वर्ष २०७३ मा लोभलाग्दो उचाइ दिएको छ ।

सम्बन्धित निकायलाई झकझकाएर काठमाडौंमा चाँडै मेलम्चीको पानी ल्याउने र रेल पनि गुडाउने उद्देश्यले यो गीतलाई करिब तीन वर्षअगाडि नै तयार गरिएको थियो । चलचित्र ‘छक्का पन्जा'को गीतको कुराकानी चल्दा निर्माता दीपकराज गिरीले यही गीत राख्ने भनेपछि चलचित्रमा समेटिन पुग्यो । लोकदोहोरी शैलीको गीतलाई अलि पृथक् रूपमा प्रस्तुत गरिएको छ । यो गीत २०७३ सालमा झन्डै साढे एक करोड ३५ लाखभन्दा बढी दर्शकले युट्युबमा हेरेर वर्षकै धेरै सुनिएको र हेरिएको गीतमध्येमा पर्न सफल भयो ।

आफूले बनाएका गीतसंगीतले दर्शक एवं श्रोतालाई कुनै पनि हिसाबले सन्देश दियोस् भन्ने चाहना गायक एवं संगीतकार राजनराज शिवाकोटीको छ । अलि बढी विकासे खालका गीत रुचाउने शिवाकोटी सही समयमा सही गीत परेका कारण दर्शकले रुचाएका तर्क गर्नुहुन्छ । कुनै पनि गीतमा रचनाकार, संगीतकार र गायकगायिकाले आफ्नो तर्फबाट शतप्रतिशत दिने प्रयास गरेको हुन्छ । यद्यपि कतिपयलाई श्रोताले मन पराउँछन् भने कतिपय त्यत्तिकै सेलाएर जान्छ । त्यसैले सिर्जना भनेका कहिल्यै पनि पूर्ण नहुने र यो गीतको सन्दर्भमा मात्रै नभई साहित्यमा पनि लागू हुने उहाँको बुझाइ छ ।

२०७३ सालमा आफूले गरेका कामका कमीकमजोरीलाई वर्ष २०७४ मा सुधार्दै लैजाने सोच उहाँको छ । हाल चलचित्रका गीतमै व्यस्त शिवाकोटीद्वारा संगीतबद्ध चलचित्र ‘दुई रुपैयाँ' र ‘पिँजडा ब्याक अगेन' रिलिजको तयारीमा छ । त्यसैगरी अहिले सातआठवटा चलचित्रमा एकसाथ काम गरिरहेको उहाँको भनाइ छ । चलचित्र ‘मेरो बेस्ट फ्रेन्ड'बाट काम सुरु गर्नुभएका शिवाकोटीले गायक प्रमोद खरेलका साथमा भर्खरै बजारमा ल्याएका एल्बम ‘लाइदेऊ न मायाले'का गीत पनि अहिले श्रोता दर्शकमाझ लोकप्रिय भएको छ ।

नयाँ वर्षको आगमनसँगै पुरानो सालमा रहेका बाँकी कामलाई पूरा गर्ने उहाँको पहिलो प्राथमिकता छ । त्यसपछि दुई महिनाजति शान्त ठाउँमा गएर बिताउने सोच राख्नुभएका उहाँको आफ्नो जिल्ला दोलखाका गाउँघर र पाखा पँधेरी अनि बनजंगलमा गएर शान्त ठाउँमा रमाउने, गाउँले साथीसँग दुःखसुख बाँड्ने धोको पनि छ । नयाँ वर्षमा एकल एल्बम निकाल्ने सुरुमा रहनुभएका शिवाकोटीले सम्पूर्ण गीत तयार पारिसक्नुभएको छ । हिजो अग्रजले गरेका कुरालाई आज आफूले निरन्तरता दिएजसरी नै नयाँ वर्षमा नयाँ संगीतकर्मीले पनि अझै राम्रा गीतसंगीत लिएर आउने उहाँको अपेक्षा छ ।

बिदेसिनु आज कतिपयको रहर हो भने धेरैको बाध्यता बनेको छ । प्रायः नेपालीका हरेक परिवारबाट कम्तीमा पनि एक सदस्य परदेसिएकै छन् । देशको यही यथार्थ समेटेर गीतकार एवं संगीतकार कालीप्रसाद बास्कोटाले तयार पारेका ‘सुन साइँली' पनि यो वर्ष भाइरल गीत बन्यो । दुबई कतारमा मात्रै नभई युरोप अमेरिकामा जाने नेपाली पनि त्यहाँ दुःख गरेर कमाएको पैसा लिएर नेपालमै बस्ने मनस्थिति बनाउनेहरुको मन छोएका कारण सुन साइँली धेरैलाई मन परेको बास्कोटाको भनाइ छ ।

आफूले सोचेभन्दा गीत राम्रो भएको र त्यसमा पनि भिडियोले गीतलाई चर्चित बनाउन सहयोग पुर्‍याएको उहाँको बुझाइ छ । यो वर्ष श्रोतादर्शकमाझ आएको चलचित्र पुरानो डुंगाको ‘नीर जहिले रिसाउने', र लुट २को ‘ठमेल बजार'बोलको गीतले पनि बजार पिट्यो । ठमेल बजार एक करोड ४० लाखभन्दा बढी दर्शकले हेरिसकेका छन् । अहिले नेपाल आइडल र अन्य विभिन्न कार्यक्रमले गर्दा गीत रचना गर्न नभ्याएको उहाँको भनाइ छ । नयाँ वर्ष २०७४ को सुरुआतसँगै सिर्जनात्मक कामलाई निरन्तरता दिने उहाँको भनाइ छ । वर्ष २०७३ मा आफू धेरै व्यस्त भएकाले समय व्यवस्थापन गर्न नसक्नुलाई उहाँले कमजोरी ठान्नुभएको छ । नयाँ वर्षमा आफूलाई अलि व्यवस्थित बनाउने प्रयास गर्ने योजना उहाँको छ ।

दुबई कतारमा मात्रै नभई युरोप अमेरिकामा जाने नेपाली पनि त्यहाँ दुःख गरेर कमाएको पैसा लिएर नेपालमै बस्ने मनस्थिति बनाउनेहरुको मन छोएका कारण सुन साइँली धेरैलाई मन परेको हो ।

चलचित्र ‘लुट २'को गीत ‘ठमेल बजार' पनि युट्युबमा अत्यधिक हेरिएका गीतमध्येको एक हो । यस गीतकी गायिका मीना निरौलाले कालीप्रसादसँग भेटेर आफ्नो स्वर सुनाएपछि गाउने अवसर पाउनुभयो । त्यो अवसर उहाँको करिअरका लागि कोशेढुंगा साबित भयो । त्यो अवसर वर्ष २०७३ सालमा मिलेकाले यो वर्ष उहाँका लागि अविस्मरणीय बनेको छ ।

गायिका मीनाले नै गाएको चलचित्र ‘पर्व'को काले दाइ बोलको गीत पनि अहिले उत्तिकै चर्चित छ । वर्ष २०७३ मा मेहनतका साथ बितेकाले खासै कमजोरी नरहेको उहाँको भनाइ छ । तर वर्ष २०७४ मा आफूले अहिलेसम्म गाएका गीतभन्दा अलि फरक खालका गीत गाउने उहाँको योजना छ । आफूले काम गर्ने आगामी चलचित्रका लागि अझ मेहनत गर्ने उहाँको लक्ष्य छ ।

गायिका मेलिना राईका लागि पनि वर्ष २०७३ सफल रह्यो । यो वर्ष आफ्नो लागि ‘भाग्यमानी' साबित भएको उहाँको भनाइ छ । यस वर्ष दर्शकमाझ आएको चलचित्र ‘हाउ फन्नी'को ‘शिरैमा शिरबन्दी', चलचित्र राधाको ‘छपक्कै फूल फुल्यो बोटैमा' र एल्बममा समेटिएको ‘तिमीले बाटो फेर्‍यौ रे' बोलका गीतलाई श्रोतादर्शकले अत्यधिक रुचाए । आफ्ना गीतहरू जति चर्चित भए पनि त्यसमा अझै धेरै सुधार गर्नुपर्ने महसुस हुने उहाँको भनाइ छ । नयाँ वर्षमा आफ्नो कामलाई अझै सुधार्दै जाने, मेहनत गर्ने उहाँको सोचाइ छ । तीन वर्षअघि एल्बम बहार ल्याएर सांगीतिक क्षेत्रमा आफ्नो पहिचान बनाउनुभएकी मेलिना वर्ष २०७४ मा आफ्नो दोस्रो एल्बम ल्याउने तयारी गरिरहनुभएको छ ।

वर्ष २०७३ अञ्जु पन्त, आस्ता राउत, ज्योति मगर लगायतका गायिकाका लागि पनि सफल साबित भएको छ । अञ्जुले राजनराज शिवाकोटीसँग गाएको चलचित्र छक्का पन्जाको पूर्वपश्चिम रेलबाट आफ्नो दबदबा कायम राख्न सफल हुनुभएको छ । नेपाली सांगीतिक क्षेत्रमा लामो समयदेखि प्रभावकारी गायिकाका रूपमा आफूलाई उभ्याउनुभएका उहाँ वर्ष २०७३ मा पनि उत्तिकै व्यस्त रहनुभयो । स्टेज कार्यक्रममा इन्दिरा जोशी, सुनीता दुलाल, आस्था राउत, ज्योति मगरको माग बढी देखियो ।