आठ महिनामै दुई लाख मोटरसाइकल दर्ता

अन्नपूर्णः चालू आर्थिक वर्षको आठ महिनामै दुई लाख मोटरसाइकल दर्ता भएका छन् । सहरी क्षेत्रको अस्तव्यस्त सडक र सार्वजनिक सवारीसाधनको सहज पहुँच नहुँदा मोटरसाइकल खरिद गर्नेको संख्या बढ्दो छ । समयमै अफिस पुग्न र उपत्यकाको लामो जामबाट मुक्ति पाउन पनि चार पांग्रे सवारी प्रयोग गर्नेले पनि बाइक प्रयोग गरिरहेका छन् ।

यातायात व्यवस्था विभागका अनुसार फागुन मसान्तसम्म मात्रै एक लाख ९९ हजार नौ सय आठ मोटरसाइकल दर्ता भइसकेका छन् । विभागका अनुसार माघ र फागुन महिनामा मोटरसाइकलको दर्ताका अन्य महिनाको तुलनामा केही कमी आएको थियो । साउनमा २६ हजार आठ सय ८७ मोटर साइकल दर्ता भएका थिए भने फागुन महिनामा १९ हजार आठ सय ७९ थान मोटरसाइकल दर्ता भएको देखिन्छ । गत आर्थिक वर्षमा दुई लाख ६७ हजार चार सय ४२ थान मोटरसाइकल दर्ता भएका थिए ।

 बैंकले अटो लोनमा गरेको कडाइका कारण माघ र फागुन महिनामा सवारी दर्तामा केही कमी आएको हो । फागुन मसान्तसम्म देशभर सबै प्रकारका सवारी गरी दुई लाख ६३ हजार आठ सय १७ थान दर्ता भएको यातायात व्यवस्था विभागको तथ्यांकले देखाउँछ । विभागका अनुसार फागुन मसान्तसम्म तीन हजार नौ सय ६५ थान बस, एक हजार ६ सय ५५ मिनी बस/ट्रक र नौ हजार सात सय ५१ थान क्रेन/डोजर/एस्काभेटर/ट्रक/टिपर दर्ता भइसकेका छन् ।

यसै गरी फागुन मसान्तसम्म १७ हजार एक सय ७१ थान कार/जिप/भ्यान दर्ता भइसकेको छ । यी सवारीसाधनको दर्तामा राष्ट्र बैंकले लागू गरेको अटोलोनका कारण पुस महिनादेखि निरन्तर कमी आइरहेको छ । पुसमा २२ सय ९७ दर्ता थियो भने त्यसपछि माघमा १७ सय ८६ र फागुनमा १३ सय सात मात्रै दर्ता भएका छन् ।

अन्य सवारीसाधनको दर्तामा बैंक लोनले खासै समस्या परेको छैन । राष्ट्र बैंकले सवारी खरिद गर्दा ५० प्रतिशत डाउनपेमेन्ट गर्नै पर्ने गरी ल्याएको नियमका कारण निजी चारपांग्रे सवारीको दर्ताका कमी आएको नेपाल अटोमोबाइल्स एसोसियसन (नाडा) का अध्यक्ष अञ्जन श्रेष्ठ बताउनुहुन्छ ।

उहाँका अनुसार निजी सवारीसाधनको दर्तामा घटेसँगै राजस्वमा पनि कमी आइसकेको छ । निजी सवारीसाधन खरिद गर्दा लागत मूल्यको सात प्रतिशत सडक सम्भार शुल्क, २४० प्रतिशत भन्सार शुल्कलगायतका विभिन्न शीर्षकमा राज्यले कर लिने गर्छ । यसैगरी आठ हजार एक सय ३३ वटा पिक अप, तीन सय पाँच वटा माइक्रो, ३६ सय ६७ वटा टेम्पो दर्ता भएको विभागको तथ्यांकले देखाउँछ ।  यसैगरी १० हजार तीन सय वटा पावरटेलर ट्र्याक्टर, आठ हजार सात सय ७४ वटा ई-रिक्सा र एक सय ६२ थान अन्य सवारी दर्ता भएको देखिन्छ ।