सिवातालार्इ सम्झेर..
काठमाडौः धेरैजसो अभिभावक सन्तानका लागि सपना देख्छन् । उनीहरूबाट आफ्नो सपना पूरा गर्छन् । केहीले सन्तानको सपना पूरा गर्छन् । ललितकला प्रज्ञाप्रतिष्ठानकी कुलपति रागिनी उपाध्यायले गत वर्ष निधन भएकी छोरीको सपना पूरा गर्न खोज्दैछिन् । यसका लागि उनले शिवाताको जन्मदिन पारेर शनिबार ‘शिवाता लभ फाउन्डेसन' स्थापना गरेकी छन् ।
फाउन्डेसनमार्फत तीन विद्यार्थीलाई छात्रवृत्ति दिएर रागिनीले छोरीको सपना पूरा गर्दैछिन् । छोरीको हातमा ‘इन माई ड्रिम' लेखेर बनाएको टाटु देख्दा त्यति बेला उनले त्यो सपनाको कल्पना गर्न सकेकी थिइनन् । छोरीको सपना शिक्षाको ज्योति बाँडेर पूरा गर्ने अठोट रागिनीले गरेकी छन् । ‘थुप्रै शिवातालाई शिक्षाको प्रकाश छर्न सकूँ', उनले भनिन्, ‘योभन्दा ठूलो बर्थ डे गिफ्ट के हुनसक्छ ।'
नेदरल्यान्डमा इन्टरनेसनल कम्युनिकेसन पढिरहेकी शिवाताको मेनेन्जाइटिसका कारण मृत्यु भएको थियो । कार्यक्रममा सांगीतिक एल्बम ‘रंग रागिनी' पनि विमोचन गरिएको थियो । रागिनीले आठ वर्षअघि जीवन, समय, महिलाका विषयमा लेखेका गीतहरू एल्बममा समावेश छन् । कार्यक्रममा निशा देशारले एल्बममा समावेश गीत ‘गाईजस्तै बिक्छु म बम्बईको बजारमा' गाएकी थिइन् ।
चेलीबेटी बेचबिखनको विषयमा लेखिएको यो गीत सुनेर कार्यक्रमकी प्रमुख अतिथि तथा माइती नेपालकी संस्थापक अध्यक्ष अनुराधा कोइरालाले बेचबिखनको गन्तव्य परिवर्तन भएको बताइन् । उनले पहिले छोरीहरू भारतमा बेचिन्थे अहिले इराक, इरान, सिरिया, तान्जानिया लगायतका देशमा बेचिन थालेको बताइन् । युद्धमा पुगेका पुरुषलाई ‘रिल्याक्सेसन'का लागि छोरीहरू बेचिन थालेको उनको भनाइ थियो । नेपालमा डान्स बार, क्याबिन रेस्टुराँमा हुने गरेको वेश्यावृत्ति कम गर्न शिक्षाकै आवश्यकता भएको पनि उनले बताइन् ।
धेरैपटक देशका नेतासँग यसबारे कुरा गरे पनि उनीहरूले कुर्सीमोहका कारण समाधान नगरेको अनुराधाले बताइन् । शिवाता लभ फाउन्डेसनले छोरीहरूको शिक्षाका लागि सुरु गरेको छात्रवृत्ति यो समस्या सामाधानका लागि कोशेढुंगा साबित हुने विश्पास पनि उनले व्यक्त गरिन् ।
प्रतिक्रिया दिनुहोस !
