यमन द्वन्द्व रोकः राष्ट्रसंघ

आदेनः संयुक्त राष्ट्रसंघका महासचिव एन्तोनियो गुतेरेसले यमनी नागरिकको द्वन्द्व र यसबाट सिर्जित पीडा अन्त्यका लागि राजनीतिक समाधान खोज्दै स्थायी शान्तिका लागि काम गर्न विश्व समुदायलाई आग्रह गरेका छन् ।

‘दुई वर्षको द्वन्द्वले सर्वसाधारण यमनी नागरिकको जीवन लिएको यमनमा आजभोलि पनि ठूलो दरमा दुःखान्त घटनाका अनुभव सुनिरहनुपरेको छ’, गुतेरेसले भने । उनले मानवीय संकट निवारणका लागि उच्चस्तरीय कार्यक्रममा मंगलबार यमनमा बोल्दै यस्तो आह्वान गरे ।

द्वन्द्वका कारण यमनको अर्थतन्त्रमा व्यापक असर परेको, स्वास्थ्य सेवासमेत नराम्ररी प्रभावित भएको उनले जानकारी दिए । करिब ३० लाख मानिस आन्तरिक तथा बाह्य रूपमा विस्थापित भएको बताउँदै हाल लाखौं यमनी सर्वसाधारणले जीवन जीउनका लागि पनि समस्या परेको उनले स्पष्ट पारे ।

द्वन्द्वका कारण विस्थापित हुनुपर्दा स्थानीयहरूले आफ्नो जमिनमा खेती समेत गर्न असमर्थ हुँदा मानवीय सहयोगको भरमा जीवन निर्वाह गर्नु उनीहरूको बाध्यता भएको दुःख चित्रण गरे । यमनमा विस्थापित भएका नागरिकलाई मानवीय सहयोग पठाएर भन्दा यहाँको समस्याको स्थायी समाधान खोज्नुपर्नेमा गुतेरेसको जोड थियो । उनले यमनमा जारी द्वन्द्वका कारण यहाँका आधारभूत सेवाका संरचनासमेत ध्वस्त बनेकाले लाखौं मानिस रोग र अन्य खतराको त्रासमा बाँचेको बताए ।

यमनकोे झन्डै दुई तिहाइ जनसंख्या अर्थात् १ करोड ९० लाख नागरिकलाई बाँच्ने आधार मानवीय सहायता मात्रै रहने गरेको छ । यहाँका एक करोड ७० लाख मानिसले असुरक्षित खाद्यान्नको मार सहनुपरेको छ । यमनमा प्रत्येक २२ जनामध्ये सातजना असुरक्षित खाद्यान्नको मारमा बाँचिरहेका राष्ट्रसंघको तथ्यांक छ ।

गुतेरेसले यमनमा द्वन्द्वरत पक्षलाई राष्ट्रसंकका यमनका लागि विशेष दूत इस्माइल वल्ड शेख अहमदको पहलमा हुने शान्तिवार्तामा सहभागी बन्न आग्रह गर्दै यसमा सम्बन्धित सवैले सघाउनुपर्ने बताए । गुतेरेसले यमनमा सन् २०१७ का लागि २ अर्ब १० करोड रकम आवश्यक रहेकोमा हाल मात्र १५ प्रतिशत माग पूरा हुने गरेको पनि उनले खुलासा गरे ।