यस्ता छन् २०१७ मा विश्व परिवर्तन गर्ने प्रविधि

२१औं शताब्तीमा सूचना र प्रविधिले दिनानुदिन फड्को मारिरहेको छ । सन् २०१७ मा संसारलाई नै परिवर्तन गर्ने प्रविधि विकास भइरहेको फोब्र्स म्यागेजिनले उल्लेख गरेको छ । प्रविधिको पहुँच र प्रयोग व्यापक हुन थालेपछि मानिसको जीवनशैली पनि त्यहीअनुसार चल्न थालेको छ । सूचना, सञ्चार र प्रविधिलाई मानिसले आफ्नो दैनिक जीवनमा उपयोग गरिहेका छन् । तीमध्ये सन् २०१७ मा यी प्रविधिको विकासले संसारलाई परिवर्तन गर्नसक्ने विश्वास गरिएको छ ।

स्मार्ट होम

संसारलाई एउटा गाउँजस्तो बनाइदिने काम इन्टरनेटले गरेको छ । सूचना र सञ्चारको काम इन्टरनेटले अहिले निमेषभरमा गरिरहेको छ । मानिस यसलाई अधिकतम उपयोग गरेर स्मार्ट जीवनशैलीमा रमाइरहेका छन् । सन् २०१७ मा इन्टरनेटमा आधारित बजार, व्यवसाय र प्रशासन आउने पक्का छ । यसका साथै मानिसले आफ्नो घरलाई स्मार्ट हब बनाउनेछन् । विश्वका ६० प्रतिशत मानिसले घरमा वायरलेस वाइफाई टेक्नोलोजी जडान गर्नेछन् भने आफ्नै होम सिस्टम राख्ने नियम बसाउने देखिन्छ । अबको युगमा मानिस घरमा बसीबसी इन्टरनेटमा काम खोज्ने छन् ।

एआर र भीआर

मानिसको वास्तविकतालाई प्रत्यक्ष अनुभव गर्ने वास्तविकतामा आधारित प्रविधि (भर्चुअल रियालिटी)को विकास सन् २०१७ मा पूर्ण रूपमा भइसक्ने देखिएको छ । वास्तविकतालाई आभास हुनसक्ने गरी रूपान्तरण गर्ने प्रविधिको प्रयोग यो वर्षमा हुनेछ । यस प्रकारका प्रविधि ओकुलस, भीआर र पोक मेन गेम, हन्ड्रेड मिलियन गेमलगायतका भर्चुअल रियालिटी प्रविधिहरू पूर्ण रूपमा विकसित भइसक्नेछन् ।

मेसिन लर्निङ

मेसिन लर्निङ प्राविधिक रूपमा धेरै अगाडि बढिसकेको छ । यसमा गुगलको सर्च इन्जिन सबभन्दा अगाडि छ । यही प्रकारको प्रविधिले सबैलाई नयाँ कुरा सिक्न र पढ्न सघाउनेछ । मानिसमा प्रविधिसम्बन्धी देखिएको चेतना र प्रयोगमा व्यापकताले पनि मेसिन लर्निङको महत्व बढाएको छ ।

अटोमेसन

अहिले प्रविधिको बजार अटोमेसनमा बढी आकर्षित छ । एडभान्स टेक्नोलोजीलाई मानिसले बढीभन्दा बढी प्रयोगमा ल्याएर काम गरिरहेका छन् । अटोमेसनबाटै रोबटको काम हुने गरेको छ । त्यसैगरी यसले रोजगारी सिर्जनामा समेत मद्दत गर्दै आएको छ ।

डाटाको सुरक्षा

मानिसले शब्द भण्डारणलाई प्रविधिमा पुर्‍ याएको ६ वर्ष भइसकेको छ । यसलाई थप दस्तावेजीकरण गर्न नयाँ प्रविधिको खाँचो देखिएको छ । यसैलाई ध्यानमा राख्दै मानवनिर्मित प्रविधिको विकासले यो वर्ष उचाइ लिनेछ, जसमा धेरै शब्द अडियो भिडियो डाटालाई स्तरीय अनि सुरक्षित ढंगले राख्न सकिनेछ ।

फिजिकल डिजिटल इन्टिग्रेसन

मोबाइल अहिले हरेकको हातहातमा पुगेको छ । यसले मानिसको जीवन शैलीलाई नै फेरिदिएको छ । स्मार्टफोन र स्मार्टपनको समयमा मानिस सूचनाको झन् नजिक पुगेका छन् । चाहेको सूचना र जानकारी क्षणभरमै प्राप्त गर्ने र मानिसको सन्तुष्टि पूरा गर्ने माध्यम बनेको छ स्मार्टफोन । यसकारण फिजिकल डिजिटल इन्टिग्रेसनमा अमेजन, अनलाइन प्रोडक्ट र म्यापिङ सन् २०१७ मा महत्वपर्ण कदम हुनेछ ।

मोबाइल एप्स

प्रविधि विकासको कुरा गर्दा मोबाइल एप्सको पनि चर्चा हुन्छ । पछिल्लो समय यस्ता एप्सप्रति झनै आकर्षण बढेको छ । जुनसुकै वेबसाइट बनाउँदा पनि अहिले मोबाइल एप्सको माग बढ्दो छ । मानिस मोबाइल एप्समार्फत शिक्षा, स्वास्थ्य खानेपानी, विद्युत् आदिलाई बढीभन्दा बढी उपयोग र सहज बनाउन चाहन्छ । यही कारण मोबाइल एप्स मानिसको दैनिकी परिवर्तन गर्ने माध्यम बनेको छ । यो क्रम सन् २०१७ मा अझ विस्तार र व्यापक हुने देखिन्छ ।  (एजेन्सीको सहयोगमा)