मिस पिंक हुनुको गर्व

थाइल्यान्डमा आयोजना गरिएको 'मिस पिंक क्विन इन्टरनेसनल २०१६'मा आफ्नो प्रतिभा देखाएर भर्खरै नेपाल फर्किएकी छन् एनी लामा । नेपालमा आयोजना भएको 'मिस पिंक २०१६'मा अठारजना तेस्रोलिंगी प्रतिस्पर्धीलाई उछिन्दै शीर्ष उपाधि चुमेर उनले नेपालको प्रतिनिधित्व गर्दै थाइल्यान्डका लागि बाटो खोलेकी थिइन् ।

प्रतियोगितामा सहभागी भई थाइल्यान्डमा बिताएका १० दिन अविस्मरणीय भएको उनको भनाइ छ । '२६ मुलुकका ३० जना तेस्रोलिंगी सुन्दरीसँग बिताएका १० दिन अविस्मरणीय रह्यो । धेरै कुरा सिक्ने र बुझ्ने मौका मिल्यो', एनीले भनिन्, 'मेरो रुम पार्टनर म्यानमारकी थिइन् । हामी एकअर्काको भाषा नबुझ्ने भएकाले इशारामा कुरा गथ्र्यौं । तर उनी एकदमै सहयोगी थिइन् ।'

एनीका अनुसार भारतकी प्रतियोगी पनि मिलनसार थिइन् । आफ्नो मुलुकमा तेस्रोलिंगीलाई कसरी हेरिन्छ भन्ने उनीहरू सुनाउँथे । थाइल्यान्ड, फिलिपिन्स, म्यानमारजस्ता मुलुकमा तेस्रोलिंगीहरू समाजमा घुलमिल भइसकेका छन् । सरकारले जेजस्तो गरे पनि समाजले स्वीकार गरिसकेको सहभागीहरूको भनाइ थियो । तर मलेसिया, इन्डोनेसिया लगायतका केही मुलुकमा भने नेपालको जस्तै अवस्था रहेछ । सरकारी तवरबाट तेस्रोलिंगीलाई स्वीकारे पनि समाजले अझै स्थान दिएको छैन ।

प्रतियोगितामा अन्य प्रतिस्पर्धीको भन्दा फरक तर उत्कृष्ट खाले परिचयात्मक भिडियो थियो उनको । उक्त भिडियो देखाउँदा हलमा तालीको गडगडाहट छाएको थियो । भिडियो नेपालमा तेस्रोलिंगीलाई कसरी हेरिन्छ भन्ने विषयमा आधारित थियो । 'मेरो भिडियोलाई अवार्ड दिने भनिएको थियो तर त्यो टाइटल आयोजकले अन्त्यमा झिके', एनीले भनिन्, 'किन त्यसो गरियो मलाई थाहा भएन ।'

अन्तर्राष्ट्रियस्तरको प्रतिस्पर्धामा उत्रिनु उनका लागि उपलब्धिमुलक भयो । 'मैले त्यहाँ मिस वल्र्ड, मिस युनिभर्सलाई सिकाउने कोरियोग्राफरबाट क्याटवाक गर्ने, बस्ने, बोल्ने, खानेलगायतका धेरै कुरा सिक्ने मौका पाएँ । त्यो मेरो लागि महत्वपूर्ण भयो ।'

प्रतियोगितामा समावेश गरिएको मिस ट्यालेन्ट उपाधिको उत्कृष्ट चारमा परेकी एनीले आफ्नो मुलुकलाई कसरी चिनाउन सकिन्छ भन्नेमा केन्द्रित भएर प्रस्तुति दिएको बताइन् । उनले नेपालको संस्कृतिलाई अन्तर्राष्ट्रिय रूपमा चिनाउने उद्देश्यले 'माइतीघर' बोलको गीतमा सांस्कृतिक नृत्य देखाएकी थिइन् । तर, 'मिस ट्यालेन्ट'को उपाधि इटालीकी प्रतियोगीले जितिन् जो त्यहाँकी चर्चित गायिका पनि हुन् । 'मिस पिंक क्विन इन्टरनेसनल २०१६ को उपाधि भने थाइल्यान्डकै प्रतियोगीले जितिन् ।

संयोग पनि उस्तै, मुलुकलाई चिनाउन इच्छुक एनीको भागमा प्रश्न पनि त्यस्तै पर्‍यो । एनीलाई नेपालमा तेस्रोलिंगीको अवस्था कस्तो छ भन्ने प्रश्न निर्णायकले सोधेका थिए । उत्तरमा उनले नेपाल सरकार तेस्रोलिंगीको पक्षमा उदार बने पनि समाजमा चाहे जति खुल्न नसकेको र समाजले पनि स्विकारी नसकेको बताएकी थिइन् । उनले नेपाललाई धनी देशको सूचीमा हेर्न चाहेको र धेरै संख्यामा रहेका तेस्रोलिंगी जनशक्ति खेर गइरहेको बताएकी थिइन् ।

तेस्रोलिंगीले रोजगारीका लागि सरकार र नीलहीरा समाजको मुख ताक्नुभन्दा आफंैले केही गर्नुपर्छ भन्ने लागेको उनको भनाई छ । खासगरी मोडलिङ, डिजाइनिङ, मेकअप आर्टिस्टका रूपमा आफूले केही गर्न चाहेको उनले खुलाइन् । 'नेपाल फेसन इन्स्टिच्युट'मा दोस्रो सेमेस्टर अध्ययन गरिरहेकी एनी भन्छिन्, 'आफूले सिकेको सीप तेस्रोलिंगीलाई सिकाउन चाहन्छु ।' उनको बुझाइमा तेस्रोलिंगीमा केही न केही क्षमता हुन्छ, मेकअप गर्न उनीहरू बच्चादेखि माहिर हुन्छन् । उनले मेकअप आर्टिस्टको कोर्स चार वर्षअगाडि नै लिएकी थिइन् ।

खाना बनाउन समेत सिपालु एनीले मिस पिंक क्विन इन्टरनेसनलको रिहर्सलमा आफैंले बनाएको पिंक रङको गाउन लगाएकी थिइन् । प्रतियोगिताको फाइनलमा भने डिजाइनर यूबी थापाले बनाएको पहिरनमा उनी स्टेजमा देखा परेकी थिइन् । एनी आफ्नो उत्प्रेरणाको स्रोत तेस्रोलिंगी मोडल अञ्जली लामालाई मान्छिन् ।