सेरेनाको सपना च्याम्पियन मम्मी बन्ने

एउटी महिलाको लागि आमा बन्नु सौभाग्यको कुरा हुन्छ । विश्वमा आमाको भूमिका मन नपराउने महिला विरलै होलान् । सफलता र लोकप्रियताको जुनसुकै उचाइ चुमे हरेक महिला आमाको भूमिका निर्वाह गर्दै एउटा सुन्दर र असल परिवार बनाउने चाहना राख्छन् । फरक यति हो कोही आमा बन्दा आफ्नै घेरामा सीमित हुन्छन् भने सेलिब्रेटीहरूको चर्चा संसारभर हुन्छ । उनीहरूले चाहे पनि नचाहे पनि फ्यानहरूले पछ्याइरहन्छ । विश्वभरका फ्यानहरूले त्यसरी नै पछ्याइरहेका छन् टेनिस सुन्दरी सेरेना विलियम्सलाई । किनकि उनी अहिले आमा बन्ने तयारीमा छिन् ।

केही महिना यतादेखि प्रायः सार्वजनिक कार्यक्रममा टेनिस कोर्टमा खासै देखा नपरेकी सेरेनाले अप्रिल १९ तारेखका दिन स्न्यापच्याट र इन्टाग्राममा एउटा फोटो पोस्ट गरिन् । बढेको पेट (बेबी बम्प) देखाइएको सो फोटोको क्याप्सनमा उनले उल्लेख गरेकी छन्, '२० हप्ता' । यो फोटो सार्वजनिक भएपछि उनको चर्चाको पारो उक्लियो । तर फोटो पोस्ट गरेको केही समयमै उनले मेटाएकी थिइन् । सेरेनाले फोटो मेटाउनुअघि नै सो फोटो र उनी गर्भवती भएको खबर भाइरल बनिसकेको थियो ।

गत जनवरीमा आफ्नै दिदी भेनस विलियम्सलाई पराजित गर्दै अस्ट्रेलियन ओपन जितेर उनी सातौं पटक उक्त टुर्नामेन्टको विजेता बनेकी हुन् । यो जितसँग उनी संसारको सबभन्दा शक्तिशाली महिला खेलाडीको रूपमा उदाइन् । ३५ वर्षीया सेरेना व्यवसायी एवं अमेरिकाको वेस्ट सेलिङ अथर ३३ वर्षीय फिएर एलेक्सिस ओहानिनसँग १६ महिनादेखि डेटिङमा थिइन् । सेरेना र फिएरले गत डिसेम्बरमा इन्गेजमेन्ट गरेका थिए । उनीहरूको पहिलो भेट रोममा भएको बताइएको छ ।

सेरेनाले आफू आमा बन्न लागेकोमा निकै खुसी लागेको 'द एसोसिएट प्रेस' लाई बताएकी छन् । उनको बेबी बम्पसहितको फोटो एवं समाचार 'द मिरर' ले पनि प्रकाशित गरिसकेको छ । आमा बनेपछि अर्को वर्ष पुनः टेनिसमा फर्कने आशा व्यक्त गरेकी छन् । 'फेरि एउटा उत्कृष्ट च्याम्पियन मम्मी बन्न चाहन्छु', उनले भनेकी छन् । सेरेना अहिले बिदामा रही आराम गरिरहेकी छन् ।

विश्व टेनिस इतिहासमा सेरेना सबभन्दा शक्तिशाली खेलाडी मानिएकी छन् । सेरेनाले जति लामो समय खेल्ने र सफलता पाउने अन्य महिला टेनिस खेलाडी देखिएका छैनन् । सेरेनाका पति फिएर एलेक्सिस ओहानिनले व्यवस्थापन र इतिहासमा भर्जिनिया विश्वविद्यालयबाट स्नातकोत्तर गरेका छन् । उनी अमेरिकाका सफल व्यवसायी र सेलिब्रेटी लेखक हुन् । फिएरकी आमा भने जर्मन नागरिक हुन् । फिएरले पनि आफूहरू अभिभावक बन्न लागेकोमा असीमित खुसी भएको प्रतिक्रिया दिएका छन् । एजेन्सी