अन्नपूर्ण इन्टरनेसनल ब्याडमिन्टनको छनोट प्रतियोगिता आजदेखि

नेपालगन्ज : अन्नपूर्ण पोस्ट्ले सञ्चालन गरेको अन्नपूर्ण अन्तर्राष्ट्रिय कर्पाेरेट ब्याडमिन्टन प्रतियोगिताको मध्यपश्चिमस्तरीय छनोट आजदेखि नेपालगन्जमा सुरु हुँदैछ । त्यसका लागि सम्पूर्ण तयारी पूरा भइसकेको अन्नपूर्ण पोस्ट्का मध्य तथा सुदूरपश्चिम क्षेत्रीय इन्चार्ज प्रेम केसीले जानकारी दिएका छन् ।मध्यपश्चिमका १५ जिल्लाबाट एक सयभन्दा बढी खेलाडीले यो प्रतियोगितामा आवेदन दिएका छन् । खेलाडी, अम्पाएर तथा प्राविधिक टोलीहरू सबै नेपालगन्ज आइसकेका छन् ।

राष्ट्रिय खेलकुद परिषद्का कोषाध्यक्ष सुरेन्द्रबहादुर हमालले आज बिहान नेपालगन्ज रंगशालामा प्रतियोगिता उद्घाटन गर्नेछन् । यसअघि धनगढीमा सूदूरपश्चिमाञ्चलस्तरीय छनोट प्रतियोगिता भइसकेको छ । त्यस्तै आजैदेखि बुटबलमा पश्चिमाञ्चलको, पोखरामा वैशाख २१ देखि २३ गतेसम्म र पूर्वाञ्चलको इटहरीमा वैशाख २६ देखि २८ गतेसम्म क्षेत्रीय प्रतियोगिता सञ्चालन हुनेछन् । क्षेत्रीयस्तरको प्रतियोगितामा पहिलो र दोस्रो हुने खेलाडीले काठमाडौंमा आयोजना हुने 'अन्नपूर्ण पोस्ट् इन्टरनेसनल कर्पोरेट ब्याडमिन्टन प्रतियोगिता'मा सहभागिता जनाउने अवसर पाउनेछन् ।

नेपाल ब्याडमिन्टन संघको सहकार्यमा काठमाडौंमा हुने अन्तिम चरणको प्रतियोगितामा पुरुष एकल खुला, महिला एकल खुला र पुरुष डबल्स खुलासँगै कर्पोरेट डबल्स, पुरुष एक्जुकेटिभ एकल र एक्जुकेटिभ डबल्स स्पर्धा पनि समावेश गरिनेछ । काठमाडौंमा हुने प्रतियोगितामा विभिन्न देशका चर्चित खेलाडीको समेत सहभागिता रहनेछ ।
अन्तिम चरणको प्रतियोगितामा सहभागिता जनाउन काठमाडौं बाहिरबाट छनोट भई आउने खेलाडीका लागि यातायातको समेत व्यवस्था गरिएको छ । देशभर छरिएर रहेका ब्याडमिन्टन खेलाडीको प्रतिभा उजागर गर्न यसपल्टदेखि देशव्यापी रूपमा छनोट खेल प्रतियोगिता सुरु गरिएको हो ।