राति छोरीसँगै सुतेकी आमाको कुटीकुटी हत्या
महोत्तरी : मंगलबार राति खाना खाएर सुतेकी भंगाहा गाउँपालिका ९ की ३५ वर्षीया शीलादेवी दासको हत्या भएको छ। मंगलबार राति १० बजे १६ वर्षीया छोरीसँगै सुतेकी शीलादेवीको शव बुधबार बिहान घरको पछाडि भेटिएको हो। उहाँका श्रीमान १६ वर्षदेखि वैदेशिक रोजगारीमा हुनुहुन्छ।
शीलादेवीको हत्या भएको प्रहरी प्रारम्भिक अनुसन्धानबाट खुलेको जिल्ला प्रहरी कार्यालय महोत्तरीका डिएसपी दीपक पोखरेलले जानकारी दिनुभयो। पोखरेलका अनुसार शीलादेवीको टाउकोमा चोट भएकाले उहाँलाई इँटा, ढुंगा वा लट्ठीले हिर्काएर हत्या भएको हुन सक्छ।
केहीबेर अघि मात्र डिएसपी पोखरेलको टोली घटनास्थल पुगेर अनुसन्धान सुरु गरेको छ। मृतक शीलादेवीको शव पोस्टमार्टमका लागि जिल्ला अस्पताल जलेश्वर पठाइको छ। घटनास्थल सदरमुकाम जलेश्वरबाट करिब ४० किलोमिटर उत्तर पूर्वमा पर्छ। प्रहरीले घटनाको विषयमा थप अनुसन्धान भइरहेको बताएको छ।
प्रतिक्रिया दिनुहोस !
