लुक्ला विमानस्थमा दैनिक डेढसय उडान
लुक्ला सोलुखुम्बु : विश्वकै खतरा सूचीमा परेको तेन्जिङ हिलारी लुक्ला विमानस्थलले दैनिक डेड सयभन्दा बढी उडान भर्दै आएको छ । वैशाख ३ गते यस विमानस्थलबाट एक सय २५ उडान भएका नागरिक उड्ययन प्राधिकरण लुक्लाले जनाएको छ ।
सगरमाथा आधार शिविरको मुख्य मार्गले गर्दा पर्यटक आवगमन तीव्र भएपछि उडानको संख्या दैनिक रूपमा बढ््दो रहेको प्राधिकरणका एयर ट्राफिक कन्ट्रोलर दीपक पोख्रेलले जानकारी दिनुभयो । गत चैत महिना नियमित उडानतर्फ सात सय ६४ र हेलिकोप्टरले एक हजार सात सय ५० गरी दुई हजार पाँच सय १४ वटा उडान गरेको पोख्रेलले जानकारी दिनुभयो । खतरा सूचीमा रहेको यस विमानस्थल त्रिभुवन विमानस्थलपछिको व्यस्त विमानस्थल भएको उहाँले दावी गर्नुभयो ।
उडान गर्न जहाजलाई भु-बनावट अप्ठ्यारो, धावनमार्ग छोटो, साँघुरो, एक तर्फीबाट मात्र अवतरण गर्न सकिने, चाँडै मौसम परिर्वतन हुने र जहाज पार्किङ समस्या यस विमानस्थलको मुख्य समस्या भएको प्राधिकरणले जनाएको छ । तारा, गोमा, सीता, सिम्रिक र नेपाल एयरलाइन्सले गरी दैनिक ६० देखि ७० वटासम्म नियमित उडान गर्ने गरेका छन् । हेलिकोप्टरले एक सय २० वटासम्म उडान गर्ने गरेको प्राधिकरणको तथ्यांकमा उल्लेख छ । चार वर्षअघि एकै दिन दुई सयसम्म उडान गरेको तथ्यांक छ ।
धावनमार्ग छोटो र भू-बनावट अप्ठ्यारो भएपछि लेट, डोरनियर, ट्विनअटरजस्ता जहाजले मात्र उडान भर्दै आएका छन् । विमानस्थलमा एक पटकमा चारवटा जहाज र पाँचवटा मात्र हेलिकोप्टर पार्किङ गर्न सक्ने क्षमता छ । उडान धेरै हुँदा जहाज र हेलिकोप्टर होल्ड हुनु पर्ने समस्या भएकाले तत्काल पार्किङ विस्तार गर्न सम्बन्धित निकायसँग माग गरिएको स्थानीय व्यवसायी टासी शेर्पाले बताउनुभयो । विमानस्थलमा एकतर्फी अवतरण गर्नुपर्ने भएकाले हावा चल्दा दुर्घटना हुने खतरा रहेको शेर्पाले बताउनुभयो ।
व्यस्त भएकाले प्राधिकरणले विमानस्थलबाट राम्रो आम्दानी गर्ने हुँदा यहाँबाट भएको आम्दानीलाई लुक्ला विमानस्थल विस्तारमा लगानी गर्न लुक्लाका व्यवसायीले माग गरेका छन् । दुई हजार आठ सय ४० मिटर उचाइमा रहेको यस विमानस्थलमा एकै पटकमा आठवटासम्म जहाज उड्ने भएकाले अवतरण गर्न समस्या हुने गरेको प्राधिकरणको भनाइ छ । अधिकांश हेलिकोप्टर लुक्लामै बस्ने भएकाले अवतरण, वास, सुरक्षा र सञ्चार शुल्कबाट प्राधिकरणले राम्रो आम्दानी गर्ने गरेको छ । प्राधिकरणको नाफामा रहेको विमानस्थलमध्ये तेन्जिङ हिलारी विमानस्थल लुक्ला मुख्य हो ।
प्रतिक्रिया दिनुहोस !
