हेली एभरेष्टको हेलिकोप्टर लुक्ला विमानस्थलमा ‘फोर्स ल्यान्डिङ’

लुक्ला :  हेली एभरेष्टको हेलिकोप्टर ठूलो दुर्घटनाबाट जोगिएको छ । आइतबार बिहान सगरमाथा आधार शिविरबाट यात्रु लिएर आएको हेलिकोप्टर ‘नाइन एन ए केजी’ लुक्ला विमानस्थलमा ‘फोर्स ल्यान्डिङ’ गर्नुपरेको हो ।

नागरिक उड्डयन प्राधिकरण लुक्लाका योगेन्द्र कुँवरका अनुसार लुक्लाबाट उडेको हेलिकप्टर एभरेष्ट बेसक्याम्पको सेभेन समीट हेलीप्याड र लुवुचे हेलिप्याडमा दुई पटक अवतरण गरेको र हावाको बहावढी भएका कारण असहज तरिकाले अवतरण गर्दा हेलिकप्टरको टेलबम्ममा क्षति पुगेको हो ।

टेलिकप्टरका पाइलट स्वीजरल्याण्डका ग्रेगर वीर थिए । हेलिकप्टरमा रहेका एक भारतीय पर्यटकलाई लुक्ला बिमानस्थलमा सुरक्षित अवतरण गरिएको कुँवरले जानकरी दिनुभयो । नागरिक उड्डयन प्राधिकरणको फ्लाइ सेफ्टी डिपार्टले चेकजाँच गरेपछि मात्र हेलिकप्टरलाई उडानको अनुमति दिने जनाइएको छ।

 लुक्लामा कार्यरत आङटासी शेर्पाका अनुसार हेलिकोप्टरको पुच्छरमा ठोक्किएका जानकारी आए लगत्तै ‘फोर्स ल्यान्डिङ’ भएको थियो । तर कहाँ र केसँग ठोक्किएको भन्ने जानकारी नभएको उहाँको भनाई छ । उक्त हेलिकोप्टर ईञ्जिनियरले हेर्न बाँकी रहेको र ईञ्जिनियरले हेरेपछि मात्र कति क्षति भएको, उडान भर्न मिल्ने/ नमिल्ने थाहा हुने उहाँको भनाई छ ।

सबै यात्रु सकुसल रहे पनि हेलिकोप्टरमा सामान्य क्षति पुगेको छ। फोर्स ल्यान्डिङका क्रममा हेलिकोप्टरको इन्जिनमा क्षति पुगेको हुनसक्ने अनुमान पाइलटको छ ।

यसैबीच सगरमाथा आरोहणका क्रममा निधन हुनुभएका सगरमाथा आरोही मिनबहादुर शेरचनलाई आधारशिबिरबाट लुक्ला ल्याइएको छ । मुचुल्का उठाएर टिचिङ अस्पताल लैजाने तयारी भएको शेर्पाले जानकारी दिनुभयो ।