गहुँ उत्पादन बढ्यो
बर्दिया : बर्दियामा यसवर्ष गहुँ उत्पादन बढेको छ । जिल्लामा गत वर्षको तुलनामा यसवर्ष २.७६ प्रतिशतले गहुँ उत्पादन वृद्धि भएको हो । जिल्ला कृषि विकास कार्यालय बर्दियाका बाली विकास अधिकृत जयबहादुर महतराले यसवर्ष १७ हजार आठ सय हेक्टर क्षेत्रफलमा गहुँखेती गरिएको जानकारी दिनुभयो । यसमा ६१ हजार चार सय सय १० मेट्रिक टन गहुँ उत्पादन भएको छ ।
बर्दियामा गरिएको गहुँखेतीबाट गत वर्ष ५९ हजार सात सय ५५ मेट्रिक टन उत्पादन भएको थियो । यस वर्ष खेतीयोग्य जमिन दुई सय २५ हेक्टर क्षेत्रफल वृद्धि भएको छ । उहाँले थप्नुभयो, 'जिल्लामा मल अभाव भए पनि सीमावर्ती भारतीय बजारबाट किसानले आपूर्ति गरेका हुनाले आवश्यक समयमा खेतीले मल पाउँदा उत्पादन बढेको छ ।
गहुँखेतीमा पहिला सिँचाइ र पछि युरिया मल अभाव रहे पनि सीमावर्ती भारतीय बजारबाट मलको आपूर्ति गरिँदा उत्पादन बढेको पाइएको छ । हिउँदे वर्षा राम्रो भएको र किसानले व्यक्तिगत रूपमा मल आयात गर्नुनै उत्पानको प्रमुख कारण भएको जिल्ला कृषि विकास कार्यालय बर्दियाको दाबी छ । बर्दिया जिल्ला धान उत्पादनको दृष्टिले प्रमुख मानिए पनि गहुँ उत्पादनका हिसाबले राम्रै मानिन्छ ।
गहुँ उत्पादनका लागि बर्दियाका विभिन्न क्षेत्रमा राम्रो उत्पादकत्व पाइएको जिल्ला कृषि विकास कार्यालय बर्दियाले जनाएको छ । कार्यालयका अनुसार राजापुर क्षेत्रमा ४.२, गुलरिया नगरपालिकामा ३.९, सूर्यपटुवामा ३.८, कालिकामा ३.४, मैनापोखरमा ३ .५, सोरहवामा २.७५, धवारमा २.४४ मेट्रिक टन प्रतिहेक्टर क्षेत्रफल उत्पादकत्व छ ।
प्रतिक्रिया दिनुहोस !
