फ्रान्सको सन्देश

फ्रान्समा राष्ट्रपति पदको लागि सम्पन्न निर्वाचनको नतिजा युरोपले मात्र हैन, विभिन्न मुलुकले नियालिरहेका थिए । ३९ वर्षीय इम्यान्युल म्याक्रनले दुईतिहाइ मत हासिल गरी अति दक्षिणपन्थीका रूपमा चित्रित ली पेनलाई पराजित गरेका छन् । प्राप्त पहिलो प्रतिक्रियामा फ्रान्सेलीहरूले आफूलाई बढी सुरक्षित महसुस गरेका छन् । दुईतिहाइको त्यो अभिमत सुरक्षित र समृद्ध फ्रान्सको लागि थियो भनी सामान्य अनुमान लगाउन सकिन्छ ।

खासगरी अमेरिकामा गत वर्ष डोनाल्ड ट्रम्पको विजय र त्यसले अमेरिकालगायत अन्तर्राष्ट्रिय जगत्मा ल्याएको हलचलबाट एकपछि अर्को आतंकवादी अग्रमणको सिकार बनेको फ्रान्स अप्रभावित थिएन । म्याक्रनले आफ्नो विजयलगत्तै फ्रान्सेली सभ्यताको पक्षमा अभिव्यक्ति दिएर सहिष्णुता, उदारता र बौद्धिकता 'फ्रान्सेली सभ्यता' का अंग मानिन्छन् र त्यस अर्थमा आतंकवादप्रतिको स्वाभाविक कठोरतासँगै विविधताप्रति सहिष्णु व्यवहार हुने सन्देश दिए उनले । ली पेनविरुद्धको जनमतको सन्देशलाई उनले स्पष्टसँग अभिव्यक्त गरे । फ्रान्सलाई युरोपेली संघबाट निकाली फ्रान्सको एकल हैकम स्थापना गर्ने उनको नारा अस्वीकृत भएको छ ।

म्याक्रनको विजय फ्रान्सको राष्ट्रिय जीवनमा एउटा चुनौतीपूर्ण चरणमा भएको छ । छिमेकी बेलायत युरोपेली संघ अलग भएको अवस्थामा बलियो र सुसंगठित युरोप पक्षधरको विजय फ्रान्सका राष्ट्रपतिको रूपमा हुनु सम्भवतः बेलायत र बेलायतको वर्तमान सत्ताको लागि त्यति रुचिकर विषय हैन । जर्मनीका चान्सलर एन्जेला मर्केलले म्याक्रनको विजयप्रति व्यक्त गरेको 'न्यानो अभिवादन' मा सम्भवतः उनले बलियो युरोपको पक्षधर सहयात्री भेट्टाएको अनुभूति गरेकी छन् । एउटा बलियो युरोपले विश्व परिदृश्यमा आफ्ना केही स्पष्ट संकेत र प्रभाव दिन सक्छ र विजयलगत्तै म्याक्रनमाथि त्यो युरोपेली आशा जोडिएको छ ।

तर यो निर्वाचन विश्वका विविध भाग र खासगरी प्रजातन्त्र अपनाएका कमजोर मुलुकहरूका लागि पनि विशेष अर्थ राख्छ । प्रजातन्त्रमा सबैलाई सम्हालेर या मिलाएर या कसैलाई निषेध नगर्ने शक्तिले प्रधानता र जनअनुमोदन पाउँछ, केही अपवादबाहेक । ली पेनको पराजय त्यसको सूचक हो । यसले सम्भवतः अर्को संकेत पनि दिएको छ, 'राजनीतिक पृष्ठभूमि' का नेतृत्वभन्दा नयाँ र सम्भाव्यता बोकेका 'युवा' नेताहरूले जनताको समर्थन हासिल गर्ने गरेका छन् ।

तत्कालको लागि म्याक्रोनलाई युरोपेली संघको 'रक्षक' को रुपमा हेरिनेछ । ली पेनको विजयले युरोपेली संघलाई तहसनहस पार्ने निश्चित थियो । त्यस अर्थमा फ्रान्सको अर्थतन्त्र र बढ्दो बेरोजगारलाई सम्बोधन गर्ने विजयपछिको अभिव्यक्तिसँगै म्याक्रोन युरोपेली संघका आशा र अपेक्षाका रूपमा पनि उदाएका छन् । त्यस्तै ट्रम्पको राजनीतिले उब्जाएका आशंका र विश्वका अन्य मुलुकमा पनि असहिष्णु तथा 'देशभक्ति' को उन्मादले निर्वाचनलाई प्रभावित गर्ने भयमा 'ब्रेक' लागेको छ । त्यो नै म्याक्रनको विजयको विशेषता र चुनौती पनि हो, जसको सकारात्मक असर फ्रान्स र युरोपभन्दा धेरै टाढा पनि अपेक्षित छ ।